Биллэрин курдук, балаҕан ыйын 18-20 күннэригэр Госдума депутаттарын быыбардара ыытыллар. Бүлүү улууһугар күһүҥҥү быыбардарга бэлэмнэнии үлэтин туһунан ТИК бэрэссэдээтэлэ Тимофей Иванов билиһиннэрэр:
— Арассыыйа Киин быыбардыыр хамыыһыйата Госдума депутаттарын быыбардарын балаҕан ыйын 18-20 күннэригэр ыытарга анаабыта. Ол эбэтэр, быйыл күһүн үс күннээх быыбардар тэриллиэхтэрэ.
Саха Өрөспүүбүлүкэтигэр күһүҥҥү Госдума, элбэх улуустарга муниципальнай быыбардарга бэлэмнэнии үлэтэ бара турар. Билигин Арассыыйа, Саха Өрөспүүбүлүкэтин Киин быыбардыыр хамыыһыйаларыгар Госдума быыбарыгар баартыйалар испииһэктэрин, биирдии мандаттаах уокуруктарга хандытааттары бигэргэтии бара турар. Муниципальнай быыбардар ыытыллар куораттарыгар, улуустарыгар ТИК-тар эмиэ докумуоннары туталлар.
Саха Өрөспүүбүлүкэтин Киин быыбардыыр хамыыһыйатын бэрэссэдээтэлэ Евгений Федоров быйыл күһүн дойдуга улахан суолталаах Госдума быыбара быстах байыаннай эпэрээссийэ кэмигэр ыытылларынан уратыланарын, быыбар хамыыһыйалара сокуоҥҥа олоҕуран, турар ирдэбиллэри барытын толорон үлэлиэхтэрин, быыбар аһаҕастык уонна ыраастык ааһыаҕын бэлиэтээбитэ.
Соторутааҕыта Дьокуускайга улуустааҕы быыбар хамыыһыйаларын салайааччыларыгар, “Быыбар” ГАС системнай администратордарыгар хастыы да күннээх үөрэтэр семинардар тэрилиннилэр. Москубатааҕы Быыбар технологияларын киинэ (РЦОИТ) ТИК, учаастактааҕы быыбар хамыыһыйаларын чилиэннэригэр тэйиччиттэн үөрэтиини эмиэ тэрийиэ.
Аҕыйах хонуктааҕыта Дьокуускай куорат мэрин быыбара 33 федеральнай сокуонунан тэрилиннэ. Дьокуускай куорат Думатын депутаттара куонкуурс хамыыһыйата киллэрбит икки хандьытаатыттан Дмитрий Садовниковы мэринэн таллылар.
Эмиэ итинник кэриҥнээх быыбардар быйыл күһүн Бүлүү улууһугар икки муниципальнай тэриллиилэргэ – Хаҕыҥҥа уонна II Күүлэккэ ыытыллыахтара. Баһылыктары олохтоох нэһилиэктэр Сэбиэттэрин депутаттара быыбардыахтара.
Бүгүҥҥү күҥҥэ 6-лыы киһилээх куонкурус хамыыһыйалара тэрилиннилэр, үс чилиэни улуус баһылыга, үһү – нэһилиэктэр Сэбиэттэрэ анаатылар. Хамыыһыйалар сокуонунан болдьонор кэмҥэ хандьытааттар докумуоннарын тутуохтара, нэһилиэктэр Сэбиэттэрин депутаттарын көрүүлэригэр киллэриэхтэрэ.
Улуустааҕы быыбар хамыыһыйата үлэтин от ыйын 20 күнүттэн саҕалаата. ТИК от ыйын 20 күнүттэн атырдьах ыйын 3 күнүгэр диэри сарсыарда 10 чаастан күнүс 14 чааска диэри үлэлиир. Атырдьах ыйын 14 күнүттэн балаҕан ыйын 17 күнүгэр диэри 10 чаастан киэһэ 18 чааска диэри эбиэт кэмигэр тохтобуллаах үлэлиэ. Ити кэмҥэ ТИК өрөбүл күннэригэр 10 чаастан 16 чааска диэри үлэлиэ.
ТИК Бүлүү куорат Ленин уулуссатын 49 нүөмэрдээх улуус дьаһалтатын дьиэтин бастакы мэндиэмэнин 9 нүөмэрдээх кабинетыгар үлэлиир.
Николай Куприянов.