Бүлүү улууһугар улуус дьаһалтатын 2024 сыллааҕы үлэтин отчуотун туруоруу салҕанар. Бүгүн улуус ыраах хоту уһугар сытар нэһилиэктэригэр отчуоттуур мунньахтарга үлэ түмүгүн истэ, санааларын үллэстэ элбэх киһи кытынна. Үгүлээккэ 40-тан, Тылгыныга 70-тан тахса киһи мунньахтарга сырытта, элбэх ыйытыктары биэрдэ, отчуоту сэргээтэ.
Ааспыт сылга улууска бэлиэтэммит кэрэ-бэлиэ түгэннэри, элбэх үлэ түмүгүн улуус баһылыгын бастакы солбуйааччы Иван Евсеев билиһиннэрдэ.
Үгүлээккэ олохтоохтор үөрэҕирии, саха ынаҕын иитии, уотунан хааччыйыы, сибээһи тупсарыы уо.д.а. боппуруостары, Тылгыныга тыа хаһаайыстыбатыгар көрүллэр субсидия үбүн үүтү туттарыыга аныырга, оскуола-саад, амбулатория тутууларын, сибээһи тупсарыыны уо.д.а. туруорустулар.
Тыа хаһаайыстыбатын боппуруостарыгар улуус баһылыгын бастакы солбуйааччы Иван Евсеев, норуокка ааттанарынан КлиКра сокуонун оройуон Сэбиэтин бэрэссэдээтэлэ Гаврил Корякин сиһилии быһааран биэрдилэр.
Оройуоннааҕы балыыһа кылаабынай бырааһа, Ил Түмэн депутата Егор Григорьев нэһилиэктэр амбулаторияларыгар олунньу ыйга саҥа массыыналар, лабораториялар оборудованиелара бэриллиэхтэрин иһитиннэрдэ, кэскиллээх былааннары, Ил Түмэн хамыыһыйаларыгар ыытыллар үлэ торумун билиһиннэрдэ.
Отчуоту туруорар бөлөх салгыы II уонна I Күүлэт нэһилиэктэригэр олохтоохтору кытта көрсүө, санааларын истиэ.
Николай Куприянов.