Кыһыммыт тымныытын кыайан ыһыктыбакка, уһуннук хатаан турда. Биһиги, Өкүндү нэһилиэгин олохтоохторо, сааскы ылааҥы күннээх, сылаас салгынынан илгийэн кэлэр сааспыт кэлэрин күүтэммит, кыһыны атаарыы, сааһы көрсүү бырааһынньыгар үөрэ-көтө мустаммыт, астына оонньоотубут, күрэхтэстибит.
Урукку сыллартан уратыта диэн быйыл тэрилтэлэринэн куоталастыбыт. Ол курдук оҕо садын коллектива хотугу норуоттар буоллулар. Оскуола коллектива бурят, дьаһалта уонна «Чэчир» сынньалаҥ киинин үлэһиттэрэ татаар омуктар буоллулар. Бары анаммыт норуоттарбыт ырыаларын, үҥкүүлэрин, астарын астаан аҕалан, биирдии норуоттарын оонньууларын көрдөрдүбүт.
Оҕо садын коллектива түмсүүлээхтэрин, барыга бары дьоҕурдаахтарын, асчыттарын көрдөрөн бэйэлэрин тэҥнээхтэрин булбатылар. Барытыгар бастаатылар. Оскуола коллектива спортивнай көрүҥҥэ кыахтаахтара билиннэ. Дьаһалта үлэһиттэрэ талааннарын көрдөрөн көрөөччүлэр биһирэбиллэрин ыллылар. Маны таһынан массыына соһуута күрэххэ 9-с кылаас үөрэнээччитэ Марсель Петров кыайан, лаппа ыарахаттары кыайар кыахтааҕын биллэрдэ.
Араас күрэхтэргэ барытыгар ким туох кыахтааҕынан, талааннааҕынан кыттан, халлаан төһө да тымныы тыалынан силбиэтэммитин иһин, онтон толлубакка үөрэн — көтөн, оонньоон-көрүлээн тарҕастыбыт. Кыайыылаахтарга эҕэрдэ буоллун. Кыттааччыларга кыаххыт өссө да баарынан кыттан дьону-сэргэни үөрдэ тураргытыгар баҕарабыт. Бары этэҥҥэ буолуҥ.
Анна Мандарова, Өкүндү.