Ааспыт нэдиэлэҕэ куорат баанньыгын үлэтэ тохтообутугар социальнай ситимнэр «оргуйа» түспүттэрэ, «өрөмүөн ыытыллар» диэн быһаарыы арыый уоскуппута. «Олох суола» редакция хаһыатын, социальнай ситимнэрин күндү сурутааччылара «баанньык хаһан үлэлиэй?» диэн боппуруоһу туруорсаллар.
Биһиги ити боппуруоһу баанньыгы көрөн үлэлэтэр «Вилюит» муниципальнай тэрилтэ дириэктэрэ Егор Степановтан чуолкайдастыбыт.
— 40 тахса сыл анараа өттүгэр тутуллубут куорат баанньыгын паар оҥорор, тымныы, итии ууларын инженернэй ситимнэрэ биллэ эргэрдилэр. Баччааҥҥа диэри биир да улахан хапытаалынай өрөмүөн ыытылла илик. Бүгүҥҥү үп-харчы кырыымчык кэмигэр улахан өрөмүөнү ыытар кыахпыт да суох. Бүгүҥҥү күҥҥэ бэйэбит күүспүтүнэн кыра өрөмүөнү ыытан баанньыгы үлэлэтэ сылдьабыт.
Баанньык социальнай тэрилтэ буоларын быһыытынан үлэлэтиитэ ньочооттооҕун санатыам этэ. Холобура, дьон сылдьарыттан сылга киирэр 3 мөл. солк. суумалаах дохуот үлэһиттэр хамнастарыгар, ОДьКХ ГУП филиалыттан ууну атыылаһыыга, уокка, туттуллубут ууну оботторууга уо.д.а. барар. Сыччах ууну атыылаһыы 600 тыһ. солк. тэҥнэһэр. Куорат дьаһалтата паарга, ититиигэ диэн 4,2 мөл. солк. көрөр. Онтон ититиигэ сылга 1639018.10 солк., паарга 2575414.60 солк. барар.
Өрөмүөн үлэтин бүтэрдибит да, бүгүн, чэппиэргэ холбоон көрүөхпүт, этэҥҥэ буоллаҕына, баанньыгы үлэлэтиэхпит, — диэн Егор Степанов быһаарда.
Николай Куприянов.