Аҕыйах хонуктааҕыта «Олох суола» редакциятыгар Бүлүү куорат Мир уулусса 108 «в» элбэх квартиралаах дьиэтин олохтооҕо туһаныллыбыт ууну ыытар ситим сүгүн-саҕын үлэлээбэтин туһунан биллэрбитэ. Биһиги дьиэни көрөр-истэр салайар хампаанньа — «Вилюит» МУП дириэктэрин Егор Степановы кытта көрсөн ити туһунан ыйыталаспыппытыгар, кини бу курдук быһааран биэрдэ:
— Биһиэхэ Мир уулусса 108 «в» дьиэтиттэн канализация ситимэ бүөлэнэр диэн этии киирэ илик. Киирэр сайаапкалары күнүнэн, түүн да, өрөбүл да буоллун, тутатына суһаллык быһаара сатыыбыт. Сайаапка киирдэҕинэ быһаарыахпыт.
Элбэх квартиралаах дьиэҕэ олорооччулар тиэхиньиичэскэй ууну ыытар ситими туттуу ирдэнэр быраабылаларын тутуһуохтаахтарын, турбаны бүөлүүр кыахтаах бөҕү-саҕы туһаныллыбыт уу ситимигэр ыытыа суохтаахтарын, харыстабыллаахтык сыһыаннаһыахтаахтарын өссө биирдэ санатыам этэ.
Николай Куприянов.