Ааспыт нэдиэлэҕэ, ыам ыйын 18 күнүгэр, Бүлүү куоратын «Эрчим» спорт комплексыгар Улуу Кыайыы 79 сылыгар аналлаах Бүлүү улууһун инбэлииттэрин уопсастыбаларын Кубогар адаптивнай спорт көрүҥнэригэр улуустааҕы таһымнаах күрэхтэһии тэрилиннэ.
Биһиги инбэлииттэр уопсастыбаларын салайааччы э.т. Лука Николаевы көрсөн, күрэхтэһии хайдах кэриҥнээхтик ааспытын ыйыталаспыппытыгар, кини бу курдук билиһиннэрдэ:
— Бүлүү улууһун инбэлииттэрин уопсастыбатын Кубогын күрэхтэһиитигэр улуус араас нэһилиэктэриттэн барыта 27 доруобуйаларынан хааччахтаах спортсменнар кытыннылар. Күрэхтэһии дьахталларга уона эр дьоҥҥо, көрбөт, истибэт спорстменнарга тус-туһунан 7 көрүҥҥэ: сүүрүүгэ, дьаадыра анньыытыгар, хабылык уонна хаамыска курдук остуол оонньууларыгар, дуобакка уо.д.а. көрүҥнэргэ ыытылынна.
Буоларын курдук, бэрт тыҥааһыннаах киирсиилэри көрдүбүт. Эр дьоҥҥо Бүлүү куоратыттан Александр Спиридонов дартска, хабылыкка уонна хаамыскаҕа, бэйэтин идэтийбит көрүҥэр – дьаадыра анньыытыгар бастаата уонна Кубок абсолютнай чемпионун аатын ылла. Кини былырыын сайын Аммаҕа тэриллибит доруобуйаларынан хааччахтаах спортсменнар Саха Өрөспүүбүлүкэтин «Дьулуур» XIV спартакиадатын дьаадыра анньыытыгар үрүҥ көмүс призерунан буолар.
Эр дьоннорго мөлтөхтүк көрөр спортсменнарга 100 м сүүрүүгэ Василий Каратаев, Чинэкэттэн квисто (мөлтөхтүк көрөр спортсменнарга дартс) көрүҥҥэ, дуобакка Владимир Лукин, бочча көрүҥҥэ (олорон эрэн мээчигинэн быраҕыы) Хампаттан Тимофей Егоров, Бүлүү куоратыттан 100 м сүүрүүгэ Айтал Попов чемпион буоллулар.
Дьахталларга Дьөккөнтөн Аида Капитонова дуобакка бастакы, 60 м сүүрүүгэ, дьаадыра анньыытыгар –үһүс, бочча көрүҥэр иккис миэстэлэри ылары ситиһэн, Кубок абсолютнай чемпионунан ааттанна.
Дьахталларга хабылыкка уонна хаамыскаҕа, дартска Хампаттан Анастасия Боронова бастаата, 60 м сүүрүүгэ, дьаадыра анньыытыгар Бүлүүттэн Туйаара Михайлова, боччаҕа Тааһаҕартан Мария Иванова чемпионка буоллулар.
Абсолютнай чемпионнарга Кубоктар, призердарга мэтээллэр, барыларыгар грамоталар, харчынан сертификаттар туттарылыннылар.
* * *
Ааспыт сайын Аммаҕа ыытыллыбыт доруобуйаларынан хааччахтаах спортсменнар «Дьулуур» XIV спартакиадаларыгар Бүлүү улууһун хамаандата бэйэтин бөлөҕөр Дьокуускай куорат уонна Мэҥэ-Хаҥалас улууһун кэннилэриттэн үһүс миэстэни ылары ситиспитэ
Бүлүү хамаандатын спорстменнара «Дьулуур» спартакиада түмүгүнэн 2 кыһыл көмүс, 8 үрүҥ көмүс уонна 4 боруонса мэтээллэри, ытыыга хамаанданан бастаан Кубогы, чэпчэки атлетикаҕа сүһүөхтэрэ ыалдьар спортсменнар күрэхтэһиилэригэр хамаанданан 3 миэстэни ылбыттара.
2026 сыллаахха «Дьулуур» XV спартакиада Бүлүү куоратыгар ыытыллыахтаах.
Николай Куприянов.