Инбэлииттэр улуустааҕы уопсастыбаларын спортсменнара, култуура эйгэтигэр сыһыаннаах чилиэннэрэ быйылгы сыл бастакы кыбаарталыгар элбэх тэрээһиҥҥэ кытыннылар, ситиһиилэннилэр.
Тохсунньу 18-19 күннэригэр доруобуйаларынан хааччахтаах дьоҥҥо чэпчэки атлетикаҕа өрөспүүбүлүкэ чемпионатыгар уопсастыба 10 чилиэнэ кыттыбытыттан 7 киһи миэстэлэспитэ.
200 м сүүрүүгэ Наталия Прокопьева кыһыл көмүс мэтээли ылары ситистэ, Илья Павлов 200 м үрүҥ көмүс, 400 уонна 800 м сүүрүүгэ боруонса мэтээллэри ылла, Ирина Гаврильева дьаадыра быраҕыыга иккис көрдөрүүлэннэ, Алла Николаева атын бөлөххө дьаадыра быраҕыытыгар эмиэ үрүҥ көмүс мэтээли ылла. Алексей Федоров дьаадыра быраҕыытыгар эр дьоннорго үрүҥ көмүс мэтээлгэ тигистэ. Көрбөттөр ортолоругар Тимофей Тутукаров 200 м сүүрүүгэ боруонса мэтээли ылла.
Олунньу 9 күнүгэр Бүлүү инбэлииттэрин уопсастыбатын хамаандата «хабылык» уонна «хаамыска» остуол оонньууларыгар тэриллибит өрөспүүбүлүкэ чемпионатыгар кытынна. Истибэттэр ортолоругар Мичил Дьяконов, сүһүөхтэрэ эчэйиилээх дьоҥҥо Александр Спиридонов, остуол оонньууларыгар маастардар ортолоругар Анастасия Боронова кыһыл көмүс мэтээллэри ыллылар. Сүһүөхтэрэ эчэйиилээх дьоҥҥо Тамара Федорова боруонса мэтээли ылары ситистэ.
Олунньу 22 күнүгэр сытан эрэн гиирэни анньыы спордугар өрөспүүбүлүкэ чемпионатыгар 54 киилэ ыйааһыннаахтарга Илья Павлов кыһыл көмүс мэтээли ылары ситистэ.
Кулун тутар 29-31 күннэригэр остуол тенниһин өрөспүүбүлүкэтээҕи чемпионатыгар Бүлүүттэн 4 спортсмен кытынна, икки киһи миэстэлэстэ.
Кулун тутар 22 күнүгэр «Эн кыайыаҕыҥ» диэн трениҥҥэ 2 эдэр инбэлиит кытынна.
Кулун тутар 15 күнүгэр «Я — автор» диэн инбэлииттэр бэстибээллэрин I тура онлайн ыытыллыбыта. Дьокуускайга тэриллибит II турга Бүлүүттэн Елена Протопопова хоһооннорун ааҕан, Бороҕонтон Ульяна Фомина ылбаҕай ырыатынан дьону сэҥээртилэр. «Полярная звезда» сурунаалга кинилэри таһаарарга анал сертификат бэрилиннэ.
Биһиги общ. корр.