Саха Өрөспүүбүлүкэтин Судаарыстыбаннай Мунньаҕын — Ил Түмэн алтыс уонна билиҥҥи сэттис ыҥырыыларын депутата, «Сахатранснефтегаз» хампаанньа генеральнай дириэктэрин солбуйааччы — кылаабынай инженер, Бүлүү улууһун Дьөккөнүттэн төрүттээх Александр Гоголев төрөөбүт дойдутугар улахан дирбиэнэ-дарбаана суох элбэх көмөнү оҥорор: улахан бырайыактарга улуус дьаһалтатын кытта ыкса сибээһи тутуһан таһаарыылаахтык үлэлиир, быыбардааччыларын итэҕэллэрин таһымнаахтык толорор, Бүлүү дьонугар-сэргэтигэр, спорт уонна култуура тэрээһиннэригэр күүс-көмө буолар.
Ил Түмэн депутата Александр Гоголев бэйэтин үбүнэн СВО саҕаланыаҕыттан байыаннай сулууспалаахтарга араас кэриҥнээх көмөнү куруук оҥорор. Ааспыт ый саҕаланыыта СВО-ҕа олох үчүгэй туруктаах икки УАЗ: «Патриот» пикап уонна микроавтобус массыыналары ыыппытын улуус дэлэгээссийэтэ, ол иһигэр, Дьөккөн баһылыга Антон Михайлов, Бүлүү улууһуттан сылдьар байыаннай сулууспалаахтарга туттарбыта. Александр Гоголев хампаанньа сүүрэ сылдьар массыыналарын атыылаһан, көрөн-истэн бэлэмнэтэн, УАЗ-ры фураҕа тиэйтэрэн СВО буола турар сиригэр тиийэ ыыппыта.
Александр Гоголев СВО-ҕа гуманитарнай көмөнү ыытыыга, үбүнэн көмөнү оҥорууга мэлдьи кыттар. Кини СВО кыттыылаахтарыгар бэйэтин үбүнэн квадрокоптердары, дронтан көмүскэнэр сыаналаах сааны атыылаһан ыыппыта.
Итини сэргэ, «Сахатранснефтегаз» хампаанньа СВО кыттыылаахтарыгар көмө оҥороругар Александр Гоголев эмиэ көхтөөх кыттыыны ылар.
СВО-ҕа сылдьар байыаннайдар, Бүлүү улууһун олохтоохторо итэҕэллэрин толорор Ил Түмэн депутата Александр Гоголевка махталлара улахан!
Николай Куприянов.