Намҥа Сибэкки Дуунньаҕа ыалдьыттаатыбыт.
Бэс ыйын 25 күнүгэр Нам нэһилиэгэр арыллыбыт “Ай-Кут” диэн аҕам саастаах дьоҥҥо “Үһүс саас оскуолатын” сайыҥҥы лааҕырыгар сынньана сылдьан, Нам сэлиэнньэтин олохтооҕо Евдокия Степановна Гаврильева-Сибэкки Дуунньа 2022 сыллаахха тутуллубут, гаас уматыгынан сылытыллар, 224 кв. миэтэрэ иэннээх, толору хааччыллыылаах кыһыҥҥы теплицатын көрдүбүт.
Бу теплицаҕа анал таҥаһа, мааската суох мээнэ киирбэт эбиккин, ол иһин аан аттыгар туран көрдүбүт. Кини оҕурсуу үүнэн бүппүт сэбирдэхтэрин ыраастаан баран, угун хайдах эрийэри быһаарда. Салгыы помидор, виноград теплицаларыгар киирэн, виноград Саха сиригэр үүммүтүн саҥа көрөн наһаа сөхтүбүт-махтайдыбыт.
Кыраһыабай кашполарга сибэкки арааһын олордубут, үөһээ өттүнэн сабыылаах, олус тупсаҕай тутуулаах сайыҥҥы улахан верандаҕа сырыттыбыт, араас үүнээйинэн киэркэйбит бу кэрэ миэстэлэргэ хаартыскаҕа түстүбүт.
Өрөспүүбүлүкэҕэ киэҥник биллэр уопуттаах оҕуруотчуттан Евдокия Степановнаттан олус элбэҕи биллибит, астына кэпсэттибит, бэйэтэ үүннэрэн хомуйбут араас оҕуруотун аһын, сибэккилэрин сиэмэлэрин атыыластыбыт. Евдокия Степановнаҕа оҕуруоту үүннэриигэ элбэх сүбэтин иһин улахан махталбытын тириэрдэбит. Маннык кэрэни кэрэхсиир, дьонугар-сэргэтигэр оҕуруокка сыһыаннаах элбэх сүбэни-аманы биэрэр, бэйэтин уопутун үллэстэр үтүө санаалаах Далбар Хотуҥҥа Сибэкки Дуунньаҕа ыалдьыттаабыппытыттан олус астынан, үөрэн-көтөн кэллибит.
От ыйын 1 күнэ – Бойобуой дьайыылар бэтэрээннэрин күнэ.
Бу бэлиэ күн Саха Өрөспүүбүлүкэтигэр 2021 сылтан Аҕа дойду интэриэһин араас сылларга көмүскээбит, Аан дойду иккис сэриитэ бүппүтүн кэнниттэн сэбилэниилээх киирсиилэргэ уонна анал байыаннай дьайыыга кыттыбыт, кытта сылдьар буойуннар чиэстэригэр дириҥ ытыктабыл бэлиэтин быһыытынан олохтоммута.
От ыйын 1 күнүгэр Бүлүү куоратыгар Албан аат болуоссатыгар Бойобуой дьайыылар кыттыылаахтарын пааматынньыгын таһыгар ыытыллыбыт өйдөбүнньүк миитиҥҥэ “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор Пуун волонтердара кыттан, Бойобуой дьайыылар кыттыылаахтарын пааматынньыгар сибэкки дьөрбөтүн уурдулар.
Улуус баһылыга Сергей Николаевич Винокуров бэйэтин этиитигэр биһиги Пууммут волонтердарын анал байыаннай дьайыыга сылдьар уолаттарбытыгар көмөлөһөр үлэлэрин үрдүктүк сыаналаата уонна улахан махталын тириэртэ.
От ыйын 7 күнүгэр “Үрүҥ көмүс” волонтердар Саха Өрөспүүбүлүкэтин бэтэрээннэрин Сэбиэтин Кыһыл Знамятын Бүлүүгэ көрүстүбүт.
Саха Өрөспүүбүлүкэтин сэрии, тыыл уонна үлэ бэтэрээннэрин Сэбиэтин тэрилтэтэ тэриллибитэ 40 сыллаах үбүлүөйүгэр аналлаах бэтэрээн Сэбиэтин Кыһыл Знамятын эстафетата Бүлүүбүт улууһун нэһилиэктэринэн айаннаан, Чернышевскай нэһилиэгиттэн от ыйын 7 күнүгэр Бүлүүгэ кэллэ.
Сарсыарда 10 чааска “Вилюйск” диэн Бүлүүгэ киирэр аартыкка турар өйдөбүнньүк бэлиэ таһыгар Чернышевскай нэһилиэгин баһылыга Антон Сергеевич Амбросьев бэтэрээн Сэбиэтин Кыһыл Знамятын дохсун ытыс тыаһынан Бүлүү куоратын баһылыгар Ян Анатольевич Поповка туттарда. Өрөспүүбүлүкэтээҕи бэтэрээннэр Сэбиэттэрин бэрэссэдээтэлэ Аркадий Филиппович Саввинов кэлбит дьону эҕэрдэлээтэ, үлэтин сүрүн соруктарын кэпсээтэ. Бүлүү улууһун баһылыгын социальнай бэлиитикэҕэ солбуйааччы Александр Игоревич Комаров, Бүлүү улууһун бэтэрээннэрин Сэбиэтин салайааччыта Федор Федорович Николаев, Бүлүү куоратын баһылыга Ян Анатольевич Попов тыл эттилэр.
12 чааска В.О.Каратаев аатынан Олоҥхо дьиэтигэр волонтердары кытары көрсүһүү буолла. Тэрээһини “Дьүрүйүү” хомусчуттар түмсүүлэрин салайааччыта, алгысчыт Нюргуяна Капитоновна Саввинова сахалыы алгыһынан арыйда. Алгыс кэннэ “Харысхал” волонтердара алаадьынан, кымыһынан айах туттулар. Өрөспүүбүлүкэтээҕи бэтэрээннэр Сэбиэттэрин бэрэссэдээтэлэ Аркадий Филиппович волонтердары эҕэрдэлээтэ, үлэтин туһунан билиһиннэрдэ, Бүлүү улууһун бэтэрээннэрин Сэбиэтин бэрэссэдээтэлэ Федор Федорович, куорат бэтэрээннэрин Сэбиэтин бэрэссэдээтэлэ Галина Ивановна, нэһилиэктэртэн кэлбит бэтэрээн Сэбиэтин бэрэссэдээтэллэрэ, волонтердар тыл эттилэр.
Салгыы Аркадий Филиппович, Федор Федорович, Галина Ивановна, Прасковья Иннокентьевна “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор Пууҥҥа сырыттылар. Сахалыы толору астаах сандалы остуол тула олорон, мин Пуун салайааччытын быһыытынан 2022 сылтан Пуун арыллыаҕыттан бүгүҥҥү күҥҥэ диэри волонтердар хайдах үлэлии сылдьарбытын, анал байыаннай дьайыыга барбыт, контрагынан барар, уоппускаҕа кэлэн барар уолаттарга туох көмөнү оҥорорбутун, ый аайы аадырыстаммыт баһыылкалары ыытарбытын, Москваҕа, Хабаровскайга госпиталларга, срочниктарга сылдьыбыппытын, өрөспүүбүлүкэ волонтердарынан, биирдиилээн дьонунан госпитальга көмө ыытарбытын кэпсээтим. Аркадий Филиппович бэрт элбэҕи ыйыталаста. Салгыы уолаттары хайдах тэрийэн ыытарбытын, тугу тигэрбитин, оҥорорбутун көрдөрө-көрдөрө сиһилии кэпсээтим. Биһиги маннык үлэбитигэр улуус уопсастыбаннай түмсүүлэрэ, нэһилиэктэр, куорат олохтоохторо, тэрилтэлэр улахан күүс-көмө буолалларын бэлиэтээн эттим.
Наһаа үчүгэй хаачыстыбалаах матырыйаалынан фабрика киэниттэн итэҕэһэ суох тигэр, биир уолга элбэҕи даҕаны биэрэн ыытар эбиккит диэн Аркадий Филиппович ордук тоһоҕолоон бэлиэтээтэ. Туох баар тикпит таҥастарбыт, оҥорбут малларбыт, өрбүт харыстанар сиэккэлэрбит, биэрэн ыытар малларбыт барыта чөкөтүллэн ыйанан, полкаларга сааһыланан ууруллан туралларын быыстапка курдук сиһилии көрөн, сөҕөн-махтайан, инникитин да маннык бары бииргэ сомоҕолоһон үлэлиэхпит диэн санаатын эттэ.
Саха Өрөспүүбүлүкэтин сэрии, тыыл уонна үлэ бэтэрээннэрин Сэбиэтин бэрэссэдээтэлэ Аркадий Филиппович Саввинов “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор Пууҥҥа кэлэн биһиги үлэбитин көрөн, билсиһэн, бэйэтин санаатын этэн барбытыгар махтанабыт.
Аркадий Филипповичка үлэтигэр үрдүк ситиһиилэри, саха алмааһыныы кытаанах доруобуйаны баҕарабыт.
Мария Томская,
«Бүлүү улууһа эһигинниин бииргэ» диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор Пуун салайааччыта, Бүлүү куоратын бочуоттаах олохтооҕо.