Бүлүү улууһун “Үрүҥ көмүс” волонтердара Нам улууһугар “Үһүс саас оскуола” сайыҥҥы лааҕырыгар сынньанан кэллилэр.
“Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор Пуун “Үрүҥ көмүс” волонтердара бэс ыйын 22-28
күннэригэр Илья Винокуров аатынан Нам улууһун педагогическай колледж иһинэн “Ай кут” дНу иэн аҕам саастаахтарга ананан арыллыбыт доруобуйаны чэбдигирдэр “Үһүс саас оскуолатын” сайыҥҥы сынньалаҥ лааҕырыгар 10 буолан биир нэдиэлэ олус үчүгэйдик сынньанан, оонньоон, маастар- кылаастарга сылдьан, элбэххэ үөрэнэн кэллибит.
Дойдубутуттан Бүлүүттэн бэс ыйын 21 күнүгэр улууспут дьаһалтата автобуһу кэпсэтэн, суоппарбыт анал байыаннай дьайыы кыттыылааҕа Еремей Ермолаевынан сарсыарда 9 чааска араҕан, баай устуоруйалаах, Максим Кирович Аммосов, Илья Егорович Винокуров-Чаҕылҕан ааттарынан аатырар үтүө дьоннордоох, Эҥсиэли хочотугар, Алгыстаах Нам сиригэр-уотугар киэһэ 10 чаас саҕана айаннаан тиийдибит. Педколледж уопсай дьиэтигэр түстүбүт, үлэһиттэр Оксана Николаевна, биэксэл Варвара Сергеевна, лааҕырга практикаларын бара хаалбыт устудьуон оҕолор биһигини үөрэ-көтө көрүстүлэр, малбытын-салбытын барытын бэйэлэрэ иккис этээскэ таһааран хосторунан олохтоотулар. Түспүт хосторбут барылара аныгылыы хааччыллыылаахтара саастаах дьону биһигини наһаа үөртэ.
Сарсыныгар мунньахтаатыбыт, лааҕырга уопсайа 30 аҕам саастаах дьон кэлбиттэр, 3 этэрээтинэн араартаабыттар, биһиги “Бүлүү Далбардара” диэн ааты ылыммыппыт. Хас биирдии этэрээккэ баһаатайдары анаабыттара, биһиэхэ Нарыйаана диэн педколледж устудьуонката баһаатайынан анаммыта. Лааҕыр арыллыытыгар бары сахалыы таҥастаах, бэйэни билиһиннэрэр плакаттаах, девизтээх, ырыалаах кэлэҕит диэн сорудахтаах тарҕаспыппыт. Киэһээҥи аһылык кэнниттэн Намнааҕы педколледж дириэктэрин иитэр үлэҕэ солбуйааччы Мария Петровна Дьяконова колледж быыстапкалыыр саалатыгар устудьуоннар дипломнай үлэлэриттэн талыллыбыт саамай үчүгэй оҥоһуктарын кэпсии-кэпсии көрдөрдө. Салгыы педколледж пааркатыгар сырыттыбыт, араас маһынан оҥоһуктар тастарыгар хаартыскаҕа түстүбүт. Онтон сарсыҥҥы тэрээһиммитигэр бэлэмнэнэ бардыбыт.
Плакаппытын баһаатайбыт Нарыйаана наһаа үчүгэйдик уруһуйдаабыта, үөһэ өттүгэр девизпитин “Бүлүү улууһа эһигинниин бииргэ”диэн, онтон улууспут гербэтин анныгар “Бүлүү улууһа-2026” диэн суруйан, хаҥас өттүгэр Бүлүү, Орто Сурт икки ардыгар баар Ытык бэлиэни, ортотугар эбэбитин, эбэни кыйа бэстэрбитин, уҥа өттүгэр Бүлүүгэ киириигэ баар стелланы, аллара ааппытын “Бүлүү Далбардара” диэн суруйан наһаа үчүгэйдик оҥорбута.
Үһүс күммүтүгэр лааҕыр үөрүүлээх аһыллыыта үөрэнэр куорпус актовай саалатыгар буолла. Биһиги бастакы этэрээт буоламмыт бастакынан плакаппытын тутан, үөһэ сыанаҕа тахсан, бэйэбитин билиһиннэрдибит, ааппытын, девизпитин эттибит, ырыабытын Екатерина Герасимовна уонна Надежда Прокопьевна таһаардылар. Плакаппытыгар уруһуйдаммыт Ытык бэлиэлэрбитин билиһиннэрдим.Ол курдук улууспут кыраныыссатыгар турар Ытык бэлиэни хомуһу Бүлүү-хомус биһигэ буоларын көрдөрөрүн, ол үрдүнэн айылҕабыт барҕа баайын гааспытын уустаан ураннаан көрдөрөр күөх төлөн, кыталыктар Саха сирин кэрэтин бэлиэтэ буоларын, дьөһөгөй оҕолоро баай-дуол, уйгу-быйаҥ бэлиэлэрэ, күөрэгэйдэр үтүө санаа, дьол, сайын уонна үлэ-хамнас кэлбитин кэрэһилиир ытык көтөрдөр диэн барытын быһаардым. Итини сэргэ анал байыаннай дьайыыга сылдьар уолаттарбытыгар көмөлөһөр волонтерскай үлэбитин кыратык сэгэтэн кэпсээтим. Хас биирдии этэрээт сыанаҕа тахсан бэйэлэрин билиһиннэрдилэр.
Күн аайы сарсыарда 7:30-8:00 диэри сэрээккэ, 8 чаастан сарсыардааҥы аһылык, 10 чаастан маастар-кылаастар саҕаланаллар.
Биһиги 5 араас маастар-кылааска сырыттыбыт:
Иискэ педколледж дириэктэрэ Елена Вячеславовна Никитина уһун быалаах суотабай уктар сумочканы тигэргэ, таһын сибэккинэн, сэбирдэҕинэн киэргэтэргэ үөрэттэ.
Лариса Ефимовна Тавакалова туойунан хайдах үлэлиири барытын бэйэтэ көрдөрө-көрдөрө, наһаа үчүгэй оту уматан ыраастанарга аналлаах иһити оҥоттордо.
Уруһуйга Дарья Лаврична Соловьева үөрэттэ. Үөрэнэр саалабытыгар киирбиппит хас биирдиибитигэр мальберт бэлэмнэнэн турар, ортотугар остуолга ууруллубут сибэккилээх вазаны, фрукталары уруһуйдаатыбыт. Хантан саҕалаан, хайдах уруһуйдуурбутун барытын сиһилии быһааран үөрэттэ.
Стекляннай бааҥкаҕа акриловай кыраасканан киистэнэн уруһуйдуурга Надежда Александровна Слепцова үөрэттэ.
Хаһан даҕаны киистэни туппатах, туойунан туттубатах, уруһуйдаабатах дьоннор манна кэлэммит элбэххэ үөрэннибит уонна бары бэйэбит оҥорбут оҥоһуктарбытын, уруһуйбутун дьиэбитигэр илдьэ кэллибит.
Наталья Климовна Спиридонова тойукка, хомуска оонньуурга, хомуһу хайдах тутан охсорго, хомус сүрүн чаастарын, космоска тахса сылдьыбыт Бүлүүбүт хомуһугар тиийэ экраҥҥа көрдөрө-көрдөрө кэпсээтэ.
Бүлүүтээҕи педколледжка саха тылын уонна төрүт культураны үөрэппит Тарагаева Степанида Степановна кыыһа, биһиги биир дойдулаахпыт Нарыйаана Семеновна Татаринова Дьокуускай куораттан кэлэн саҥаралларыгар ыарырҕатар, тылларыгар кэһиллиилээх, ону тэҥэ кыайан саҥарбат уонна кэккэ дорҕооннору сатаан таһаарбат оҕолорго аналлаах логопедическай варган (хомус) туһунан бэрт сонун авторскай бырайыагын кэпсээтэ. Сүрүнэ диэн — оҕо саҥарар кыаҕын сайыннарыы, артикуляцияҕа туһуламмыт дьарыктар уонна сөпкө тыыныы методикатын сэргии иһиттибит. Маныаха ити эппит лого-варгаммыт аныгы олох тэтимигэр олоҕуран — 3Д технологиянан бэчээттэнэн тахсара сонун. Автор этэринэн, оҕо тутарыгар табыгастаах, ол эбэтэр форматынан арыый кыра кээмэйдээх, оҕо уостарынан тутар сиринэн ойдор сирдээх уонна ыйааһына бэрт чэпчэки буолан дьарыктанарга ордук барсар. Лого-варган биопластиктан оҥоһуллар буолан доруобуйаҕа куттала суох, сымнаҕас тыаһы таһаарар кыамталаах, ону тэҥэ оҕо тылын эчэппэт. Аны маннык тэрил сыаната да удамыр буолан хас биирдии эдэр ыал уйунар кыахтанар. Күн бүгүн учуонайдары кытта экспериментальнай группалардаах үлэ барыахтаах, ол кэннэ анал сертификацияны ааһан киэҥ араҥаҕа тахсар кыахтаныа.
Байаанынан ырыаҕа, үҥкүүгэ, интелликтуальнай оонньууга күрэхтэр буоллулар. Үҥкүү күрэҕэр матырыйаал була охсон, бэргэһэлэрин бэйэлэрэ тиктэн, Тааһаҕар нэһилиэгиттэн “Күбэйэ” түмсүү салайааччытын солбуйааччы Надежда Прокопьевна Тимофеева уонна “Күбэйэ” түмсүү чилиэнэ Людмила Егоровна Иванова бурятскай үҥкүүнү толордулар.
Түмүккэ биһиги этэрээппит иккис миэстэ буолан, минньигэс бириис ыллыбыт. Маннык күүстээх хамаандабынан, туохха барытыгар дэгиттэр талааҥҥытынан киэн туттан тураммын, күндү дьоннорбор барҕа махталбын тиэрдэбин.
Биһигини иилээн-саҕалаан илдьэ сылдьыбыт күндү оҕобут Нарыйаана!
«Ай-кут» диэн аҕам саастаахтарга аналлаах лааҕырга Бүлүү курдук ыраах сиртэн сынньана кэлбиппитигэр биһиэхэ баһаатайынан ананан, истиҥ сыһыаҥҥынан, болҕомтоҕунан, биһиги араас хаппырыыстарбытын барытын ис сүрэххиттэн толорон, тулуйан күүс-көмө буолбуккар бараммат махталбытын тиэрдэбит. Баҕарабыт оҕобутугар Нарыйаанаҕа, саха алмааһыныы кытаанах доруобуйаны, күн сиригэр баар бары үтүөнү, кэрэни, сырдык ыра санаа кынаттанан, дьол-үөрүү аргыстанан, үрдүк ситиһии үктэллэнэн, быйаҥнаах, чөл-чэгиэн туруктаах үтүө олоҕу. Үөрэххин ситиһиилээхтик бүтэрэн, бэйэҥ баҕа санааҕынан талан ылбыт идэҕин баһылыыргар. «Бүлүү улууһа эһигинниин бииргэ» диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор Пуун волонтердара, салайааччы Мария Петровна Томская.
Түгэнинэн туһанан, “Бүлүү Далбардара” этэрээт “Үрүҥ көмүс” волонтердарын ааттарыттан Намҥа барар-кэлэр көлөнөн хааччыйбыттарыгар улууспут баһылыгар Сергей Николаевич Винокуровка, улуус дьаһалтатын дьыалаларын дьаһайааччы Клара Валериановна Гаврильеваҕа, суоппарбытыгар Еремей Ермолаевка, сэттэ күнү быһа биһигини арыаллаан, араас сэргэх тэрээһиннэри, күрэхтэри, сынньалаҥ биэчэрдэри тэрийэн бииргэ сылдьыбыт тэрийээччилэрбитигэр, бу бырайыак ааптардарыгар “Лебедь” аһымал фондатын дириэктэрэ, Намнааҕы педколледж дириэктэрин иитэр үлэҕэ солбуйааччы Мария Петровна Дьяконоваҕа, дириэктэри үөрэх чааһыгар солбуйааччы Миролюба Ивановна Семеноваҕа, лааҕыр салайааччытыгар, педколледж дириэктэригэр Елена Вячеславовна Никитинаҕа, түүннэри-күнүстэри биһиги доруобуйабытын бэрэбиэркэлээн, сүбэ-ама биэрбит Варвара Сергеевна Слепцоваҕа, лааҕыр начальнигар Алита Григорьевна Сокольниковаҕа, биир нэдиэлэни быһа биһиэхэ күүстээхтик көмөлөспүт, сүбэ-ама биэрбит күндү киһибитигэр Оксана Николаевна Григорьеваҕа, ойуулуур-дьүһүннүүн отделение сэбиэдиссэйигэр Диана Денисовна Николаеваҕа, хас сарсыарда аайы доруобуйаны чэбдигирдэр гимнастикалары оҥотторбут устудьуон уолаттарбытыгар Айтал Монастыревка, Ньургустан Христофоровка, дэлэй, минньигэс астаах-үөллээх педколледж остолобуойун үлэһиттэригэр Айталина Николаевна Панкратьеваҕа, Лидия Васильевна Сухановаҕа, Иван Иванович Сивцевкэ, маастар-кылаас ыыппыт дьоннорбутугар, биир дойдулаахпытыгар Нарыйаана Семеновна Татариноваҕа, бары тэрийээччилэргэ бука барыгытыгар улахан махталбытын тиэрдэбит. Баҕарабыт эһиэхэ саха алмааһыныы кытаанах доруобуйаны, аҕам саастаах дьоннорго күүс-көмө буолар, араас тэрээһиннэри тэрийэр түбүктээх үлэҕит үтүө түмүктээх буоллун.
Мария Томская,
«Бүлүү улууһа эһигинниин бииргэ» диэн анал байыаннай дьайыы кыттыылаахтарыгар
уонна кинилэр дьиэ кэргэттэригэр улуустааҕы көмө оҥорор Пуун салайааччыта, Бүлүү куоратын бочуоттаах олохтооҕо.