Оҕо сайыҥҥы сынньалаҥын, бириэмэтин туһалаахтык атаарарын туһугар Бүлүүтээҕи оройуоннай оҕо библиотекатыгар аралдьытар-сайыннарар, билиилэрин хаҥатар, интэриэһинэй уонна умсугутуулаах буоларыгар туһаайан оҕо библиотекатын үлэһиттэрэ “Веселые страницы лета” сынньалаҥ лааҕырын бэс ыйын 8-15 куннэригэр уонна бэс ыйын 29-от ыйын 3 күннэригэр үлэлэттэ.
Араас оскуолартан алын сүһүөх үөрэнээччилэрэ бэйэ-бэйэлэрин үчүгэйдик билсиһэллэрин наадатыгар лааҕырбыт бастакы күнүгэр элбэх араас оонньуулартан, викториналартан саҕаламмыттара.
Ол курдук оҕолор РФ Бэрэсидьиэнэ Владимир Владимирович Путин 2026 сылы Арассыыйа норуоттарын сомоҕолоһууларын сылынан биллэрбитинэн “Калейдоскоп народов России” диэн Россия араас муннуктарыгар олорор омуктар регионнарын, олохторун-дьаьахтарын, национальнай бүлүүдэлэрин, дойдуларын суон сураҕырдыбыт биллиилээх дьоннорун билистилэр. Татар омук “Тюбетейка” диэн көрдөөх оонньуутун астына оонньоон, киэҥник биллибит “Чак-чак” бүлүүдэни астааннар, дьонноругар амсатаары үөрэн мичилиспит харахтара көрүөхтэн ураты этэ.
Ааҕыыга болҕомтону уурар сыаллаах “Ааҕыы – дьиэ кэргэни түмэр күүс” диэн оҕолору сахалыы ааҕыыга угуйан, Дмитрий Кононович Сивцев-Суорун Омоллоон төрөөбүтэ 120 сылын көрсө оҕолорго аналлаах кэпсээннэрин аахтылар, таабырыннары таайан, аахпыт кэпсээннэригэр сыһыаннаах оонньуулары оонньообуттара. Оҕолор кэпсээннэртэн ааҕаннар, туох-хайдах буолбутун, учугэй, сүөргү быьыылары, суруйааччы туохха болҕомтотун уурбутун ырытан, толкуйдаан, сөптөөх сыанабылы биэрдилэр.
Оҕолор бэйэлэрин ыра баҕа санааларын уруьуйдаан, талааннарын көрдөрөн, астыммыт сирэйдэрэ олуһун үөртэ. Ордук Дьокуускай куораттан кэлбит кырачаан 6 саастаах Полина Анисимова тургэнник тардыалаан, сатабыллаах уруһуйа улаханнык сөхтөрдө, араас тиэмэҕэ кырачаан дэппэккэ, толору хоруйдары биэрэрэ, саҥата-иҥэтэ лоп курдук чуолкайа астыннарда.
Тимофей Сметанин, Яков Стручков суруйбут “Мэхээлэчээн булчут туундараҕа сырыылара” кэпсээни билсэннэр, быһа тардан ааҕаннар кэпсээн тула боппуруостарга эппиэттээннэр, анал оҥоһуллубут оонньуунан Мэхээлэчээн бултаабыт мүччүргэннээх сырыыларын хатылаатылар.
Лааҕыры түмүктүүр күҥҥэ сынньалаҥ пааркаҕа сибиэһэй салгыҥҥа көрдөөх оонньуулары дуоһуйа оонньоон, аҕалбыт минньигэс астарын, утахтарын амсайан, хас биирдиилэригэр лааҕырга сылдьыбыт өйдөбүнньүк туоһу дипломнарын, бэлэхтэри тутан астынан, библиотекаҕа сайыҥҥы уһун сынньалаҥнарын атаара, ааҕа кэлэллэрин, бириэмэлэрин туһалаахтык атаараннар, үөрүү-көтүү көтөллөөх түмүктээтилэр.
Күнүн ахсын ыытыллыбыт араас тэрээһиннэргэ, оҕолор көхтөөхтүк астына кытыннылар, хас биирдии күнү уратытык атаардылар, билиилэрин-көрүүлэрин хаҥатар араас тэрээьиннэри сэргээтилэр, библиотекаҕа өссө да кэлэн, кинигэни, сурунаалы ааҕарга баҕа санааларын эттилэр. Оҕолоро библиотека лааҕырыгар үөрэ-көтө кэлэллэрин туһунан төрөппүттэр санааларын үллэстиилэрэ, махтал тылларын этиилэрэ лааҕыр үлэтин сыалын ситиспитин туоһутунан буолла.
Мария Егорова,
оҕо библиотекатын кылаабынай библиограба.