Бүлүү улууһун баһылыгын социальнай эйгэҕэ солбуйааччы, байыаннай сулууспалаахтарга көмөлөһөр улуустааҕы хамыыһыйа бэрэссэдээтэлэ Александр Прокопьев салалтатынан Бүлүү улууһун дэлэгээссийэтэ СВО буола турар сиригэр үһүс төгүлүн баран кэллэ.
Александр Прокопьев байыаннай эпэрээссийэ инники кирбиитигэр сылдьар биир дойдулаахтарын көрсүбүттэрин, туох-ханнык гуманитарнай көмөнү, байыаннайдар сакаастарынан тугу атыылаһан илдьибиттэрин бу курдук билиһиннэрдэ:
— СВО буола турар сиригэр Бүлүү улууһун дэлэгээссийэтигэр киирсэн иккис төгүлүн Баппаҕаайы нэһилиэгин баһылыга Егор Николаев, Кыһыл Сыыр бөһүөлэгин баһылыга Юрий Гвызин уонна бастакытын Дьөккөн баһылыга Антон Михайлов, Кыһыл Сыыртан оройуон Сэбиэтин депутата Иван Кайкы барса сырыттылар.
Кулун тутар ый бүтүүтэ Москубаҕа көтөн тиийэн биир нэдиэлэ кэриҥэ СВО-ҕа сылдьар уолаттар сакаастаабыт араас тэриллэрин атыыласпыппыт. Бүтэһик сырыы кэннэ байыаннайдар сайаапкаларын хомуйан киирэн барбыппыт. Итини сэргэ, Москуба араас госпиталларыгар эмтэнэр түөрт биир дойдулаахтарбытын көрсүбүппүт. Урутаан эттэххэ, Донецкай уонна Стаханов куораттар госпиталларыгар эмиэ сылдьан эчэйии ылан эмтэнэ сытар икки уолбутун көрсүбүппүт, дойдуларын кэһиилэрин туттарбыппыт.
СВО-ҕа үһүс сырыыбытыгар Бүлүүттэн таһаҕас тиэниилээх улуус дьаһалтатын УАЗ микроавтобуһа уонна Баппаҕаайы нэһилиэгин дьаһалтатын «Соболь» массыыналара барбыттара. Массыыналары байыаннай биир дойдулаахтарбытыгар туттараары көрөн-истэн, бэлэмнээн, учуоттан устан фураларга уган ыыппыппыт.
Улуус массыыналарыгар уопсастыбынньыктар бэйэлэрэ оҥорбут маскировочнай сиэккэлэрин, байыаннай сулууспалаахтар дьонноро ыыппыт баһыылкаларын, тэрилтэлэр, нэһилиэктэр аҕалбыт көмөлөрүн толору тиэйэн ыыппыппыт. «Сыа Бүлүү» кэпэрэтиип аһын-үөлүн, үгүлээттэр ыыһаммыт балыктарын кэһии гынан илдьибиппит.
Бу сырыыга 6 матасыыкыл, сааҕа олордуллар 20 тепловизоры, 24 коллиматоры, 20 тахса пламегасителлары, оптиканы, 20 инверторнай, 5 улахан дизель генератордары ылбыппыт. Үрүксээктээх, утуйар мөһөөччүктээх, сытарга, олорорго аналлаах олбохтордоох, таҥастардаах уо.д.а. сээкэйдээх 75 кэмпилиэк илдьибиппит.
Итини сэргэ, эрбиилэри, гайковертары, шуруповертары, рациялары, тактическай фонариктары, комплект таҥастары уо.д.а. атыыласпыппыт. Таанкаҕа сылдьар уолаттарга анаан 5 улахан күлүүс набордарын ылбыппыт.
РФ Бэрэсидьиэнигэр Бастайааннай Бэрэстэбиитэл, Саха Өрөспүүбүлүкэтин Бырабыыталыстыбатын Бэрэссэдээтэлин бастакы солбуйааччы Андрей Федотов салайар координациялыыр киинин, координатор Олег Шаранцев көмөлөрүнэн маршрутарбытын оҥорбуппут. Биһигини кытта опорник уолаттара сылдьыстылар, массыыналарбытын туһаммыппыт. Юрий Гвызин биир маршрутунан, Егор Николаев атын маршрутунан, биһиги бэйэбит туспа маршрутунан сылдьан үлэлээбиппит көдьүүстээх буолла.
IMG_3033 
СВО буола турар сиригэр 12 күн үлэлээтибит, бастаан Запорожье өттүттэн саҕалаабыппыт, атыыласпыт тэриллэрбитин уолаттарга туттарбыппыт. Саха сирин, Бүлүү былаахтарын оҥорторон илдьибиппитин тарҕаттыбыт. Биир дойдулаахтарбыт — байыаннайдар илии баттаабыт былаахтарын илдьэ кэллибит.
Массыына тиэниилээх фураларбыт хойутаан кэлэн уолаттарга иккистээн төхтөрүйэн киирбиппит. Уопсастыбынньыктар, дьонноро ыыппыт малларын, кэһиилэрин булгу илиилэригэр туттарыахтаахпыт диэн тиийэн көрсүбүппүт.
Уолаттар туруктара, настырыанньалара үчүгэй, дьонноругар, Бүлүү улууһугар көмөлөрүн иһин махтаналлар, көмө кэлэрин олуһун диэн кэтэһэллэр, үөрэллэр, биирдиилээн кэлэн ылан бардылар. СВО-ҕа сылдьар уолаттар үүт, ыыһаммыт балык амсайан улаханнык үөрбүттэрэ.
Илдьибит малларбытын барытын тарҕаттыбыт, инники кирбиигэ сылдьар уолаттарбытыгар эрэ туттарбакка хаалбыппыт. Кэлин уолаттар ылбыттарын туһунан биллэрбиттэрэ, махтаммыттара. Ити курдук, барытын түҥэтэн кэллибит. Бүлүү улууһуттан СВО-ҕа сылдьар уолаттары барыларын кэриэтэ көрсөн кэллибит.
Ил Түмэн депутата Александр Гоголев биир дойдулаахтарыттан киирбит сайаапкалары тутатына көрөн, икки УАЗ массыына ыыппыта штурмовиктварга хаалла.Улуус дьаһалтатын массыынатын инники кирбииттэн бааһырбыт дьону таһаарар Бүлүү уолугар туттарбыппыт, баппаҕаайылар массыыналарын эмиэ инники кирбиигэ сылдьар биир дойдулаахтарыгар туттардылар.
СВО буола турар сиригэр Бүлүү улууһун дэлэгээссийэтэ быйыл от ыйын-атырдьах уонна ахсынньы ыйдарга барара былааҥҥа турар.
Николай Куприянов.