Муус устар 29 күнүгэр Госдума депутата Федот Семенович Тумусов “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор Пуун волонтердарын күүстээх үлэлэрин көрөн-истэн, сөҕөн, улаханнык махтанан барда.
Федот Семенович волонтердарга туһаайан бэйэтин санаатын маннык эттэ:
-Бу Бүлүү улууһун волонтердарыгар мин ааспыт сырыыбар эмиэ сылдьыбытым, кинилэр көмө оҥорор үлэлэрин билсэн баран сүрдээҕин сөхпүтүм уонна махтана санаабытым. Ол иһин Бүлүү куоратыгар балыыһа иккис саҥа комплексын үөрүүлээх арыллыытыгар кэлэ сылдьан, көмө оҥорор Пууҥҥа иккиһин сырыттым.
Пуун салайааччыта Мария Петровна биир дойдулаахтарыгар эрэ буолбакка, анал байыаннай дьайыыга Саха сириттэн сылдьар буойуннарга, госпитальга сытар уолаттарга барыларыгар көмөлөһөллөрүн туһунан кэпсээтэ. Кинилэр көмөлөһөр үлэлэрэ сүрдээх улахан суолталаах. Ол суолтата диэн кинилэр сүрэхтэрин сылааһа уонна иэйиилэрэ бу биһиги анал байыаннай дьайыыга сылдьар уолаттарбытыгар тиийэн күүс-көмө буолар, күүстэригэр күүс эбэр уонна харыстыыр, араҥаччылыыр, арчылыыр диэн этиэххэ наада. Көмө оҥорор Пуун волонтердарын кыһамньыларыгар өссө төгүл сүгүрүйэн туран, Государственнай Дума депутатын аатыттан дириҥ, истиҥ махталбын тириэрдэбин. Ол махталым бэлиэтин кинилэргэ Махтал суруктары туттарабын:
Ити курдук Федот Семенович Махтал суруктарын Пуун салайааччытыгар Мария Петровна Томскаяҕа, үрүҥ көмүс волонтердарга Екатерина Герасимовна Алексееваҕа, Татьяна Николаевна Петроваҕа, Валентина Афанасьевна Захароваҕа, Валентина Михайловна Кононоваҕа, Ирина Васильевна Волковаҕа туттарда.
-Араас таҥастары олус үчүгэйдик тигэллэр, уолаттарга анаан малы-салы, харыстанар сиэккэ хас да арааһын оҥороллор эбит. Маннык үчүгэйдик, хаачыстыбалаахтык, туһалаахтык оҥороллоро сэдэхтик көстөр. Волонтердар үлэлэрэ өссө да ситиһиилээх буоллун диэн баҕа санаабын тиэрдиэхпин баҕарабын,-диэн түмүктээтэ Федот Семенович.
Муза Федорова.