2022 сыл балаҕан ыйын 29 күнүгэр Бүлүү улууһуттан быстах байыаннай хомуурга ыҥырыллыбыт, дойдуларын көмүскүү сылдьар хорсун уолаттарбытыгар утары туттуллар малынан, таҥаһынан, эминэн, аһынан көмөлөһөр сыаллаах “Бүлүү улууһа эһигинниин бииргэ” көмө оҥорор пууну тэрийэн тиһигин быспакка үлэлээбиппит 2026 сыл балаҕан ыйын 29 күнүгэр түөрт сыла буолла.
Биһиги пууммут 8 хайысханан үлэлиир.
Бастакы хайысхабыт—иистэнии:
Дьыл кэминэн көрөн сөп түбэһэр таҥаһы, камуфляжнай халыҥ, чараас, плащевай, флисовай көстүүмнэри, кууркалары, сэлиэччиктэри, толстовкалары тигэбит. Ону таһынан трикотажнай, флисовай матырыйаалтан балаклава, бэргэһэ, үтүлүк, футболка, ардахтан харыстанар пончалары, сахалыы кэтиинчэлэри, куллукулары, ардахха илийбэт матырыйаалтан үс гына хомуллар, иһигэр халыҥ пенофоллаах, курдаах олбохтору, таба түүтэ симиллибит олбохторун, уолаттарбыт барахсаттарга сиргэ сыталларыгар сылаас буоллун диэн 1,5-2 сантиметр халыҥнаах пенофол истээх, 2 метр уһуннаах, 60-70 сантиметр кэтиттээх плащевай матырыйаалтан ковриктары, саа стволун ардахтан, бадараантан харыстыыр чехоллары, харысхал угуллар мөһөөччүктэрин, аптечкалары, пятиточниктары, биэрэн ыытар таҥастарбытын, малларбытын угарбытыгар анаан вещмешоктары тигэттиибит.
Иккис хайысхабыт — араас оҥоһуктары оҥоруу: сиэлтэн харысхаллары, сиэлтэн угунньалары валяниелаан, өрөн оҥоруу, кыра дэйбиирдэри, блендажнай чүмэчилэри, уһуннук умайар испиискэлэри, сухой армейскай душтары, розжигтары.
Үһүс хайысхабыт — эмтээх, ыраастыыр оттору хомуйуу: сайын аайы пуун үлэһиттэрэ, нэһилиэк уопсастыбаннай түмсүүлэрэ Бүлүүгэ үүнэр эмтээх оттору, ыраастыыр күүстээх үүнээйилэри хомуйан хатаран, анал мөһөөччүктэри тигэн, барытын онно уган бэлэмниибит. Ол мөһөөччүктэрбит биир өттүгэр харысхал бэлиэлээхтэр, биир өттүгэр Бүлүү улууһун гербэтэ.
Төрдүс хайысхабыт — өстөөх хараҕыттан, дронтан харыстанар сиэккэлэри, нашлемниктары өрүү: техникаҕа, индивидуалкаҕа эҥин диэн тус-туспа, матырыйааллаах сиэккэлэринэн арааран, хас да араас схеманан харыстанар сиэккэлэри өрөбүт.
Бэһис хайысхабыт:
бааһырбыт байыастарбыт бэрэбээскилэнэллэригэр, укуолланалларыгар таҥастарын устарга, кэтэргэ эрэйдэммэтиннэр диэн, ойоҕосторун сиигин оннугар липучканан туттарыллар ыстааннары, ис таҥастары, Илизаров аппарааттаахтар атахтарыгар кэтэллэригэр анаан чараас, халыҥ кэтиинчэлэри тигэбит. Ону таһынан атахтарын, илиилэрин эчэппиттэргэ көмө буоллун диэн валиктары, бубликтары, косточкалары, сыттыктары, копчиктарын анныгар угуллар ортотунан хайаҕастаах, иһигэр халофайбер симиллибит сыттыктарын, тигэбит.
Алтыс хайысхабыт: анал байыаннай дьайыы кыттыылаахтарыгар уонна кинилэр дьиэ кэргэттэригэр анаан көмө акциялары оҥоробут, Өрөспүүбүлүкэҕэ ыытыллар араас акцияларга кыттабыт.
Сэттис хайысхабыт: аадырыстаммыт баһыылкалары ыыталааһын;
2022 сылтан Бүлүү улууһуттан, Саха сириттэн анал байыаннай дьайыыга сылдьар буойуннарбытыгар баһыылка оҥорон ыыталыыбыт.
Ахсыс хайысхабыт: СВО-ҕа контрагынан, уоппускаҕа кэлэн барар уолаттарбытын бэйэбит тикпит көстүүмнэрбитинэн, таҥастарбытынан таҥыннаран, коврик, пятиточник, наколенник, толору эмтээх аптечка, 4 араас схеманан өрбүт дронтан харыстанар сиэккэлэрбитин, спальник, буорту буолбат аһы уопсайа 50-тан тахса утары туттуллар малынан-салынан толору хааччыйабыт. Биир уолга биэрэн ыытар малларбыт 16-20 киилэ буолар.
Пуммут биһиэнэ сарсыарда 9 чаастан эбиэккэ тохтобула суох киэһэ 6-ҕа диэри үлэлиир, сорох күн сакаас элбэх буоллаҕына, өрөбүлэ суох киэһэ хойукка диэри үлэлиибит. Бу күннэргэ 8 контрагынан, 4 уоппускаттан барар уолаттарбытыгар 50-тан тахса таҥас-сап биэрэн, ийэлии сыллаан атаартаатыбыт. Ону таһынан уолаттар сакаастарынан аадырыстаммыт баһыылкалары ыыталаатыбыт.
Оҕолорбут барахсаттар түүнүн наһаа тымныы диэн флисовай көстүүмнэри, термобельелары ону таһынан сүүскэ кэтиллэр фонарьдары, 50 миэтэрэлээх удлинителлэри, паурбанк, спальник, портативнай электростанция, болгарка, аккумуляторнай шуруповерт, берцалары, саха быһаҕа, тепляк, рация сакаастыыллар. Тикпит көстүүмнэрбит, тигэр матырыйаалларбыт бүтэннэр, бу күннэргэ Ксения, Валерий Бубякиннар, Анна Волгина үһүөн кыттыһан 10 000, Анисия Николаева (Чочу) 6000, Елена Протопопова (5000), Бүлүүтээҕи пенсионнай сулууспа үлэһиттэрэ 8000 уонна пуун волонтердара бэйэбит харчы кыттыһан 54000 суумалаах флисовай матырыйаал атыылаһан көстүүмнэри тигэн саҕалаатыбыт.
Тааһаҕар нэһилиэгиттэн Туяра Максимова 5 көстүүм, “Күбэйэ” түмсүү 5 көстүүм, урбаанньыт Валентина Григорьева 5 көстүүм, Арыылаах нэһилиэгиттэн “Чэбдигирии” түмсүү 20 понча тигэр матырыйаалларын ылан таҕыстылар. Иистэнньэҥ уолбут Семен Афанасьев 12 байыаннай, камуфляжнай көстүүмнэри тигэн киллэрбитин утары ылан бардылар. 15 уолга посылканан бэйэбит тикпит камуфляжнай, флисовай көстүүмнэрбитин, 1 уолга 50 миэтирэлээх 12.150 солк. удлинитель, паурбанк 8000, портативнай электростанция 11000 барытын волонтердар бэйэбит харчы кыттыһан, саха быһаҕын уустарга спонсордатан ыыттыбыт.
4 сыл тухары биһиги волонтердарбыт күнү-түүнү аахсыбакка үлэлээтилэр.
Бу иннинээҕи ыстатыйаларбар суруйбутум курдук, көмө оҥорор пууммут мобилизация саҕаланыаҕыттан Бүлүү улууһун уопсастыбаннай түмсүүлэрин “Үрүҥ көмүс” волонтердарын, улуус, куорат олохтоохторун, тэрилтэлэрин, урбаанньыттарын, ВПК устудьуоннарын, оскуола үөрэнээччилэрин, уһуйаан оҕолорун көмөлөрүнэн күүстээхтик үлэлээн кэллэ. 4 сыл тухары күүс-көмө буолбут хас биирдии амарах сүрэхтээх дьоннорбутугар улахан махталбытын тиэрдэбит. Уолаттарбытыгар көмөбүт өссө да салҕаныа, туох кыалларынан көмөлөһө сылдьыахпыт.
Көмүс күһүн сылаас кутунан.
П.Х. Староватов аатынан Бүлүүтээҕи кыраайы үөрэтэр түмэлгэ И.Ф. Захаров аатынан Хомус дьиэтин сэбиэдиссэйэ Наталья Сергеева тэрийиитинэн, атырдьах ыйын 24-28 күннэригэр биир кэрэ, ураты суолталаах аҕам саастаах дьоннору түмэр олус интэриэһинэй уонна туһалаах күһүҥҥү лааҕыр арыллан үлэлээтэ. Бүлүүтээҕи кыраайы үөрэтэр түмэлгэ, бу биэс күн иһигэр аҕам саастаах дьоннорбут бэйэ-бэйэлэрин кытта чугастык билсиһэн, дууһалыын арыллан, саҥа билиини-көрүүнү ыллылар.Манна биһиги волонтербут Екатерина Алексеева кытынна.
Лааҕыр бастакы күнэ үөрүүлээх көрсүһүүнэн арылынна.
Күн саамай долгутуулаах өрүтэ Наталья Сергеева уонна Анна Васильева акриловай кыраасканан түргэн уруһуй маастар-кылааһын оҥордулар. Хас биирдии киһи бэйэтин ис дууһатын туругун, күһүҥҥү айылҕа кэрэтин кумааҕыга түһэрдэ. Анна Васильева араас кэмҥэ уруһуйдаабыт хартыыналарын быыстапкатын көрдүлэр.
«Хомустаах» уус кыһатыгар экскурсиялаатылар. Наталья Прокопьевна Бүлүү улууһун уустарын туһунан сиһилии кэпсээтэ, тимири хайдах оһоххо уһаарары көрдөрдө. КЭК ураты сэргэх эбийиэктэрин таһыгар хаартыскаҕа түһүү буолла.
Түмэлгэ ураты сэһэннээх тематическай экскурсия ыытылынна. Уруһуйдаатылар, уруһуй кистэлэҥнэригэр үөрэттилэр, араас сэргэх хамсаныылаах интерактивнай оонньуулары ыыттылар. күлүү-үөрүү аргыстаах оонньоотулар.
Сахабыт сирин эмтээх үүнээйилэрин хаһан хайдах хомуйары, үүнээйилэр туох эмтээхтэрин үөрэттилэр уонна саха төрүт үгэстэрин туһунан сэргэх викторина буолла.
Лааҕыр саамай долгутуулаах түгэнэ, истиҥ чэйдээһининэн, лааҕыр кыттыылаахтара бэйэлэрин илиилэринэн оҥорбут үлэлэрин быыстапкатынан түмүктэннэ. Быыстапка саамай чаҕылхай киэргэлинэн биһиги үрүҥ көмүс волонтербут Екатерина Алексеева үлэлэрэ буоллулар, кини бэйэтин уруһуйдарын таһынан, оҕуруонан олус ураннык тиһэн оҥорбут киэргэллэрин дьон дьүүлүгэр таһаарда.
Тэрээһин үөрүүлээх кэмигэр аҕам саастаахтарбыт бэйэлэрин ис талааннарын арыйан, хоһоон ааҕан, ырыа ыллаан дуоһуйа үөрдүлэр. Тэрийээччилэр көрдөөх оонньуулары, куонкурустары ыыттылар. Арыылаах Харыстаана Айан кыыһа хомуска оонньоон санааны сааһылааһын буолла, дьүрүскэн тыас хас биирдии киһи дууһатын, иһирэх санааларын сааһылаан, уоскулаҥы бэлэхтээтэ. Түмүккэ кыттыылаахтарга сертификаттары, сэмэй бэлэхтэри туттардылар. Аҕам саастаах дьоммутугар саҥа олох тыынын, айар кут арыллыытын уонна истиҥ алтыһыыны бэлэхтээбит И.Ф. Захаров аатынан Хомус дьиэтин сэбиэдиссэйигэр Наталья Сергееваҕа уонна биһиги “Үрүҥ көмүс” волонтербут Екатерина Алексеева уҥкучаҕар уу киирэн улахан хоромньуну таһаарбытын Бэстээх уокуругун депутата Александр Колтовской куорат дьаһалтатын үлэһиттэрин кытары муоста оҥорон биэрбиттэригэр “Бүлүү улууһа эһигинниин бииргэ!” диэн СВО-ҕа улуустааҕы көмө оҥорор пуун волонтердарын уонна Екатерина Алексеева аатыттан улахан махталбытын тириэрдэбит. Маннык күһүҥҥү лааҕырдар сылын аайы арыллан, сылаас уйа буолан, аҕам саастаах дьоннорбутун өрүү түмэн, үөрдэ-көтүтэ турдуннар!
Мария Томская, «Бүлүү улууһа эһигинниин бииргэ» анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор Пуун салайааччыта, Бүлүү куоратын бочуоттаах олохтооҕо.