Бүлүү куоратын М.Н.Жирков аатынан култуура дыбарыаһыгар Балаҕаччы нэһилиэгин талааннаахтарын айар киэһэтэ буолан ааста . “Мин мантан сэриигэ барбытым” тэрээһин икки чаастан турар: бастакы чааһа “Хорсун быһыы, үйэлээх аат” икки дьоруойдаах нэһилиэк киэн туттууларыгар, Советскай Союз Геройдарыгар Алексей Афанасьевич Мироновка, Николай Саввич Степановка кинилэр сырдык ааттарыгар ананар.
Дьоруойдар күннэригэр сөп түбэһиннэрэн Аҕа дойду сэриитин дуораана 80 сылы уҥуордаан тиийэн кэлбит ньиргийэр тыаһа ой дуораана буолбут билиҥҥи хаан тохтуулаах байыаннай дьайыыга сылдьыбыт байыастары чиэстээтилэр. Дьоруойдар үтүө холобурдарыгар үөрэнэн, оҥорбут хорсун быһыыларын, тэлбит суолларын батыһан күн бүгүн уоттаах сэриигэ эйэлээх олоҕу туруулаһа сылдьар ,олохторун толук уурбут байыастарга анаан Улуус баһылыгын социальнай боппуруостарга солбуйааччы Александр Игорьевич Комаров киһини эрэ уйадытар тыллары эттэ. Дьоруойдар күннэринэн истиҥник эҕэрдэлээтэ. Баһылык С.Н.Винокуров аатыттан байыаннай дьайыы кыттыылаахтарыгар өйдөбүнньүк бэлиэлэри, махтал суруктары үрдүк сыанаҕа туттартаата, олохторун толук уурбут, сэрии хонуутугар хаалбыт байыастар ийэлэригэр, эдэркээн оҕоҕо аҕатын наҕараадатын туттарыыта долгутуулаах түгэнинэн буолла. Итини сэргэ Балаҕаччы нэһилиэгин баһылыгар Семён Семёнович Филипповка махтал суругу туттарда. Байыастары Дьоруойдар күннэринэн Владимир Буслаев күүстээх куолаһынан эҕэрдэлээтэ.
Дьоруой Алексей Афанасьевич Миронов аатын сүгэр Мастаах орто оскуолатын, кини үбүлүөйдээх сылыгар аналлаах музыкальнай-хореографическай туруоруулара көрөөччүнү долгуттулар. Үҥкүүһүттэри “Айылҕа оҕолоро” түмсүү салайааччыта музыкальнай оскуолаҕа хореограф Наталия Святославовна Яковлева дьарыктыыр. Манна даҕатан эттэххэ, түөрт көлүөнэ үҥкүүһүттэри иитэн таһаарбыт култуура туйгуна.
Уоттаах сэрии бүтэн Улуу Кыайыы үөрүүлээх өрөгөйө “Үөрүүлээх олох дьиэрэйэр тойуга” саала устун уһунна. Нэһилиэк талааннаахтара Николай Никифоров, Айсен Александров, Сардана Степанова, Ильда Семёнова уонна оскуола үөрэнээччилэрэ Айаал Александров, Роман Дмитриев гитара доҕуһуоллаах дуэттарын, оскуола үөрэнээччилэрин үҥкүүтүн бөлөҕүн, Розалия Мандарова салайааччылаах көрдөөх сыанкаларын ытыс тыаһынан көрүстүлэр. “Алаас далбардара” бөлөх үҥкүүһүттэрэ, наскылдьыйан Сахабыт сирин мааны хатыҥнарын санаттылар. Оскуола эдэркээн учууталларын “Туйаарыма” үҥкүү бөлөҕө “Күбэйэ” бөлөх нарын куоластаах ырыаһыттара көрөөччү биһирэбилин ылыахтарын ыллылар. Ити курдук уоттаах сэрии сыллара, кыайыы өрөгөйө, эйэлээх олох тойуга киинэ лиэнтэтинии субуллан ааһа оҕустулар.
Бу тэрээһин бастакы чааһын Александра Иванова, Александр Иванов икки тылынан иилээн-саҕалаан ыыттылар. Иккис чааһын биир дойдулаахтара култуура туйгуна Николай Афанасьевич Афанасьев-Айдаман, Ирина Иванова үүннээн-тэһииннээн салайдылар.