Аҕыйах хонуктааҕыта «РИК Автодор» Бүлүүтээҕи филиала Бүлүү куоратыгар Чапаев уулуссаттан саҕалаан «Бүлүү» федеральнай суол ааһар Ленин уулуссатыгар диэри Ион Попов, Интернациональнай уонна Аммосов уулуссаларыгар аспаал кутуутун түмүктээтэ.
Билигин ити уулуссаларга ыытыллар силигин ситэрэр үлэ туһунан «РИК Автодор» ААУо Бүлүүтээҕи филиалын дириэктэрэ Прокопий Протопопов билиһиннэрэр:
— 2,4 км уһуннаах Ион Попов, Интернациональнай уонна Аммосов уулуссаларынан ааһар Бүлүү куорат эргимтэ суолугар (ВКАД) аспаал ууруутун үлэтин бэлэмнээһини былырыын күһүҥҥүттэн саҕалаабыппыт.
Былырыын балаҕан ыйыгар Аммосов уулуссаҕа рециклеринэн щебенка, гравий, кумах, сиэмэн булкаһыгын кутан, дэхсилэтэн суолу бөҕөргөтүү үлэтин ыыппыппыт. Аммосов уонна Каландарашвили уулуссалар быһа охсуһууларын диэки уу олорор сиригэр бырайыагы таһынан ууну ыытар турбаны түһэрбиппит.
Быйыл бырайыагынан көрүллэр Ион Попов уулусса чугаһыгар Шахов уулусса диэки ууну ыытар турба түһэрдибит. Түмүгэр, куорат саҥа эргимтэ суолугар ууну ыытар икки турбаны түһэрдибит.
Саҥа аспаал ууруллубут уулуссаларыгар 5 сиргэ бытаардар үрдэтиилэр («лежачай полицейскайдар») оҥоһуллуохтара, элбэх суол знактарын туруоруохпут.
Бүгүҥҥү күҥҥэ «РИК Автодор» Бүлүүтээҕи филиалын үлэһиттэрэ аспааллаах уулуссаларга силбэһэр уулуссалар туорааһыннарыгар аспаал ууруу үлэтин ыыта сылдьаллар.
Уулуссалары аспааллаһыҥҥа бырайыагы таһынан элбэх үлэни оҥордубут. Эппитим курдук, ууну ыытар турбаны түһэрбиппит, Интернациональнай уулусса эргиирэ бырайыагынан кыараҕас соҕус этэ, ону кэҥэтэн биэрдибит. Култуура дыбарыаһын иннинээҕи бетон былаһаакканы аспааллаах уулуссаны кытта холбуурга эмиэ элбэх үлэ кэтэһэр. Уопсайынан, бырайыакка киирбэтэх элбэх үлэни толорбуппутун бэлиэтиэм этэ.
Аспаал суол бырайыагынан 6 м кэтиттээх, разметка оҥоруохпут. Үс уулуссаҕа кутуллубут 7 см халыҥнаах аспаал эрдэттэн бөҕөргөтүллүбүт суолга кутуллубута. Аспаалы уурар тиэхиньикэ, суолу бөҕөргөтөр рециклер Ньурбаттан кэлэн үлэлээтилэр.
Уулууссаларга аспаал кутуутугар бэйэбит тэрилтэбит тиэхиньикэтин туһанныбыт. Аспаал-бетон собуота бэйэбит киэнэ, собуокка Александр Николаев салайааччылаах биригээдэ үлэлиир.
Кэлэр нэдиэлэҕэ үлэбитин барытын ситэрэн түмүктүүр былааннаахпыт.
* * *
Суол пуондата, тырааныспар уонна суол хаһаайыстыбатын министиэристибэтэ Бүлүү куорат иһинээҕи эргимтэ суолу тутууга 117 мөл. солк., улуус дьаһалтата 30 мөл. солк. көрбүттэрэ, куорат эмиэ хос үбүлээһиҥҥэ кыттыбыта.
Үс уулуссаны аспааллааһын Бүлүү куорат дьаһалтата куорат олоҕун тупсарар, тэйиччи микро-оройуоннар олохтоохторо куорат киинигэр, тэрилтэлэргэ, оскуолаларга, оҕо уһуйааннарыгар түргэнник уонна судургутук тиийэллэригэр үлэтин түмүгэ буолар.
Саҥа суол куорат бары олохтоохторугар туһалыа, куорат олоҕун таһымын үрдэтиэ.
Николай Куприянов.