Бүгүн «Хомустаах» арочнай спортивнай саалатыгар кик-боксиҥҥа норуоттар икки ардыларынааҕы кылаастаах спорт маастара, боксаҕа спорт маастарыгар хандьытаат Александр Григорьев бирииһигэр өрөспүүбүлүкэтээҕи аһаҕас турнир түмүктэннэ.
Бэс ыйын 13-14 күннэригэр ыытыллыбыт турнирга барыта 79 эдэр файтердартан састааптаах 11 хамаанда кытынна. Ол иһигэр, Дьокуускайтан элбэх хамаанда, Ньурбаттан, ыраах Уус Дьааҥыттан тиийэ кытыннылар.
Бүлүү улууһун хамаандата үксэ Халбаакы спортсменнарыттан сүүмэрдэннэ. Былырыын «Азия оҕолоро» оонньууларыгар Халбаакы тириэньэрэ Артур Васильев иитиллээччитэ Аман Иванов чемпион үрдүк аатын ылбытын санатыахха сөп.
8-16 саастаах эдэр кикбоксердар — кыргыттар уонна уолаттар Бүлүү рингэтигэр сытыы киирсиилэри көрдөрдүлэр.
Чемпион үрдүк аатын Костя Мартынов, Егор Николаев, Айыстаан Иванов (Халбаакы), Эрсан Сивцев «Дохсун», Проня Петров (Бүлүү), Семен Иванов (Ньурба), Саян Николаев, Айылҕан Михайлов, Сандаман Томскай (Халбаакы), Артур Герасимов (Ньурба), Георгий Панченко (Хатас), Антон Томскай, Коля Иванов «Саһарҕа», Уйгулаан Васильев (Ньурба), Айсар Томскай, Саир Слепцов (Уус Дьааҥы) , Всеволод Фаломеев (Халбаакы), Андрей Сивцев » Олимпик», Никита Пинигин (Хатас), Савелий Воронов «Саһарҕа», Марк Павлов «Олимпик», Ярослав Павлов , Дисар Дмитриев (Халбаакы) ылары ситистилэр.
Кыргыттарга чемпионнарынан Таня Силина, Милана Васильева, Инесса Назарова, Камилла Корякина буоллулар.
Турнир бочуоттаах ыалдьыттарынан боксаҕа спорт маастара Гаврил Саввин, биллиилээх кикбоксердар Алексей Уваров, Николай Иванов, улуус баһылыгын бастакы солбуйааччы Иван Евсеев, экология иниспиэксийэтин салайааччы Алексей Евсеев уо.д.а. буоллулар.
Сэттис төгүлүн тэриллибит турнир бэрт ситиһиилээхтик ааспытын бэлиэтиэххэ сөп.
— Бүлүү эдэр кикбоксердара кэлиҥҥи сылларга араас таһымнаах элбэх күрэхтэһиилэргэ ситиһиилээхтик кытталлар, сыллата аайы биллэ-көстө эбиллэн иһэллэр, — диэн Александр Григорьев турнир түмүгүнэн санаатын үллэһиннэ.
Николай Куприянов.