Ыам ыйын 16 күнүгэр Каландарашвили аатынан уулусса уонна ТУСМ түөлбэ олохтоохторугар бэлиэ түгэн буолла. Куорат Сэбиэтин депутата Елизавета Загитова көҕүлээһининэн, Улуу Кыайыы 80 сылыгар «Помним! Гордимся!» диэн бу эҥэртэн төрүттээх, манна үлэлээн-хамнаан, олорон ааспыт сэрии уонна тыыл бэтэрээннэрин сырдык ааттарын үйэтитэр баннер арыллыыта буолла.
Үөрүүлээх тэрээһиҥҥэ түөлбэ билиҥҥи уонна урукку олохтоохторо муһуннулар. Мустубут дьон ыаллыы олорбут дьонун көрсөн үөрэрэ, көрсүбэтэҕэ өр буолбут доҕоттор куустуһаллара тэрээһиҥҥэ өссө эбии долгутуулаах тыыны эбэн биэрдэ.
Елизавета Георгиевна былырыын Бүлүү куората 390 сылыгар анаан «Суугунуур күөх хатыҥнаах тапталлаах уулуссам» диэн Каландарашвили уулусса историятын кэпсиир баннер арыллыбытын кэпсээтэ. Быйыл арыллыбыт баннер ол аттыгар турар буолла.
Бу сквер куораппыт, улууспут туһугар үгүс сыраларын ууран туран үлэлээбит үтүөкэн дьоммут ааттарын үйэтитэр, Каландарашвили уулуссатын бэлиэ сиринэн буолара саарбаҕа суох. Эдэр ыччат, кэлэр көлүөнэ төрөөбүт куораттарын баай историятын билэллэригэр олус туһалаах буоларыгар саарбахтаабаппыт.