Бу күннэргэ кырдьаҕас Бүлүү куоратыгар ыраах Японияттан сылдьар Рика Дохи ыалдьыттаан ааста.
Рика Дохи билигин Новосибирскай куоракка олорор эбит, манна педагогическай университет устудьуоннарыгар япон тылын үөрэтэр. Кини бэйэтин сүрүн үлэтин таһынан саха норуотун төрүт култууратын, ырыатын-тойугун, фольклорун уонна хомуһун чинчийэр. Ол иһин Сахабыт сирин улуустарынан экспедиция быһыытынан Үрүҥ Тунах Ыһыахтарга сылдьан олус астыммытын, элбэҕи билбитин-көрбүтүн үөрэ-көтө кэпсиир.
Киэҥ сураҕырбыт Сунтаар ыһыаҕыттан СӨ култууратын үтүөлээх үлэһитэ, “Алгыс” национальнай култуура киинин уус-уран салайааччыта Августина Евсееваны кытта Бүлүү куоратыгар бииргэ айаннаан кэлэн хонон-сынньанан барда. Ол туһунан Августина Евсееваттан кэпсииригэр көрдөстүбүт.
- Рика Дохини кытта аан бастаан Сунтаарга көрсүбүппүт, өрөспүүбүлүкэтээҕи Хомус музейын үлэһиттэрэ эрдэттэн миэхэ эппиттэрэ. Онон уруккуттан билсэр дьон курдук Сунтаар сириттэн уһуннук бииргэ айаннаан кэллибит.
Кини Бүлүүгэ хайаан да хомус музейыгар сылдьыахтаахпын диэн сыаллаах-соруктаах этэ. Онон бэс ыйын 23 күнүгэр П.Х. Староватов аатынан Бүлүүтээҕи кыраайы үөрэтэр музейга тиийэн лааҕыр оҕолорун кытта көрсүстэ. Оҕолор олус интэриэһиргээн киниэхэ элбэх ыйытыылары биэрдилэр, онно барытыгар Рика Дохи сиһилии эппиэттээтэ. Бу кэнниттэн И.Ф. Захаров-Кылыадьы Уус аатынан хомус музейыгар сылдьан, биһиги ааттаах-суоллаах уустарбыт хомустарын астына-дуоһуйа көрдө, олус кэрэхсээн элбэҕи ыйыталаста.
Рика Дохи японнуу, английскайдыы саҥарар уонна нууччалыы билэр буолан кэпсэтэргэ, быһаарсарга тугу да ыарырҕаппатыбыт, түргэнник хардарыта өйдөһөн кэпсэтии бэркэ барда.
Кини Япония айны диэн норуотун бамбуктан оҥоһуллубут муккури хомуһугар оонньуур уонна саха хомуһун олус кэрэхсиир, интэриэһиргиир эбит.
Төһө да сынньалаҥ күнэ буоллар, биһиги музейдарбыт үлэһиттэрэ Мария Андреевна уонна Екатерина Прокопьевна Михайлова ыраахтан кэлбит ыалдьыты наһаа истиҥник көрсөн, барытын сиһилии көрдөрөн кэпсээбиттэрин иһин тус бэйэм ааппыттан кинилэргэ улахан махталбын тириэрдэбин, — диэн эттэ Августина Платоновна.
Салгыы кини ыалдьытын Рика Дохины саҥа тутулла турар Бүлүү эбэ Набережнайынан күүлэйдэппит, Ийэ скверин, Албан Аат болуоссатын сиһилии көрдөрбүт.
Ити киэһэ Японияттан сылдьар ыалдьыт Рика Дохи Үөһээ Бүлүү ыһыаҕар ыҥырыллан салгыы айаннаабыт. Бүлүүгэ кылгас кэмҥэ сылдьыбытын олус истиҥник саныырын, музейдары уонна кырдьаҕас Бүлүү куоратын көрөн олус астыммытын биллэрбит, итиэннэ ис сүрэҕиттэн махтанарын эппит.
Ити курдук соһуччу түгэн үөрүүтэ-көтүүтэ ырааҕынан тэнийбит. Айан аргыстаах, суол доҕордоох диэн мээнэҕэ эппэттэр эбит.
Муза Федорова.