Чочу нэһилиэгэр фельдшерскэй пуун 1948 сыллаахха арыллыбыта. Онон ол тутуубут аварийнай буолта хас да сыл буолла.
Ол иһин саҥа балыыһа тутулларыгар Правительство мунньаҕа буоллаҕын аайы туруорсубуппут ыраатта. Хата, быйыл саҥа баһылыкпыт Николай Мартович Прокопьев Ил Түмэҥҥэ депутаппыт Григорьев Егор Анатольевичтыын тэҥҥэ үлэлээн-хамсаан, балыыһабыт былааҥҥа киирэн тутуллар буолбутуттан нэһилиэк олохтоохторо олус үѳрэ сылдьабыт.
Тутууга сѳптѳѳх, табыгастаах сири талбыттар, саҥа балыыһа дьиэтэ дьэндэйэн таҕыстаҕына дэриэбинэбит тас кѳстүүтэ да тупсуо этэ. Сирин тэҥнээһиҥҥэ, бэлэмнээһиҥҥэ кѳмѳлѳспүт депутаппытыгар Протопопов Прокопий Владимировичка, олохтоох «Ампаардаах» хаһаайыстыбаҕа, салайааччы Томскай Симон Егоровичка биир күнүнэн буорун кутан, тэҥнээн биэрбиттэригэр улаханнык махтанабыт.
Бу сиргэ сайынын сылгы, сүѳһү сѳбүлээн хонор сирэ, былыргыттан сүѳһү үчүгэй тыыннаах сиргэ сытааччы, онон саҥа балыыһабыт да биһигини эмиэ абырыа диэн эрэнэбит.
Оҥоһуллубут, бэлэмнэммит сири сүѳһүлэр тэпсиэхтэрэ диэн, субуотунньук биллэриллибитигэр нэһилиэк эр дьоно элбэх буолан кэлэн икки чаас иһигэр күрүѳлээн кэбистилэр, күрүѳ маһын эрдэ субуотунньуктаан бэлэмнээбиттэрэ эмиэ хайҕаллаах дьыала буоларын бэлиэтиэххэ наада. Онон чахчы да норуот күүһэ — кѳмүѳл күүһэ диэн этии манна лоп-бааччы сѳп түбэһэр. Аны сотору тутар биригээдэ кэлэн, тутуутун саҕалаан, аны күһүн саҥа балыыһабыт үлэҕэ киириэ диэн былааҥҥа турбут, ону истэн олохтоохтор, ордук саастаах дьон, сэмээр үѳрэбит уонна кэтэһэбит.
Инникитин да нэһилиэк олохтоохторо бука бары сомоҕолоһон үлэлээтэхтэринэ иннибит диэки сайдан, үүнэн тупсан иһиэхпит. Бука бары этэҥҥэ эрэ буолуоҕуҥ.
Федора Николаева.