Бүлүүтээҕи И.Л.Кондаков аатынан гимназия үөрэнээччитэ, өрөспүүбүлүкэтээҕи «КүнЭко» эколааҕыр хас да төгүллээх кыттааччыта Лиза Архангельская эбээтин Тамара Васильевна Фоминаны кытта эмтээх оттору хомуйар үгэстээхтэр. Ол курдук соторутааҕыта эмтээх «оҕонньор отун» хомуйан кэллилэр.
Тамара Васильевна «Бүлүү Харысхал» волонтер пуунун салайсааччы буоларын быһыытынан байыаннай дьайыыга сылдьар уолаттарга сүрүн баһыылкалары кытта эмтээх оттору анал мөһөөччүктэргэ уган ыытар. Элбэх киһи туһанан, истиҥник махтанан суруйаллар уонна эбии сакаас оҥороллор.
Оҕонньор отун хайдах туттарга маннык сүбэлииллэр:
Оҕонньор отун (Вероника седая) сибэккилиир кэмигэр – бэс ыйыгар уонна от ыйыгар хомуйуллар.
Хомуйарга эмиэ сэрэнэбит, силиһэ кылгас уонна буорга дириҥэ суохтук үүнэр. Онон кыптыыйынан кырыйыллар.
Дьайыыта:
Сүрэх үлэтин тупсарар;
Тыҥа сүһүрүүтүн эмтиир (тымныйыы уонна коронавирус содулларын), токсиннары таһаарар;
Микробтары, вирустары өлөрөр;
Тымырдары бөҕөргөтөр;
Куртах, бүөр үлэтин, оһоҕос микрофлоратын тупсарар уо.д.а.
Көөнньөһүгү оҥоруу:
Балтараа остолобуой ньуоска оту 1 ыстакаан (200 мл) итии ууга көөнньөрүллэр, эмиэ эмалированнай куруускаҕа оргуйа турар уу үрдүгэр эбэтэр тиэрмэскэ кутан, хаппахтаан баран 15-20 мүнүүтэ көөнньөрөбүт. Сойбутун кэнниттэн сиидэлиибит. Ыстакаан 1/3 күҥҥэ үстэ-түөртэ, аһаан баран чаас курдугунан сылаастыы, уон хонуктан икки нэдиэлэҕэ тиийэ иһэбит.
Оҕонньор отун иһэр көҥүллэммэт:
?сахарнай диабеттаах дьоҥҥо;
?сүрэх-тымыр систиэмэтигэр кэһиллиилээхтэргэ;
?хааннарын баттааһына үрдүүр дьоҥҥо.
Изольда Загитова.