Бүгүн, олунньу 13 күнүгэр, Арыылаах нэһилиэгэр Кыайыы Знамятын көрсөр биир умнуллубат түгэн буолан ааста.
Кыайыы Знамятын көрсөр тэрээһиҥҥэ ыаллыы сытар Бөтүҥ, Тааһаҕар, Тыымпы, Бороҕон нэһилиэктэрин, Кыһыл Сыыр бөһүөлэгин баһылыктара, дэлэгээссийэлэрэ кытыннылар, Улуу Кыайыы 80 сыллаах үбүлүөйүн көрсө Кыайыы Знамятын туттулар.
Хампаҕа Кыайыы болуоссатыгар оройуон депутаттарын Сэбиэтин бэрэссэдээтэлэ Гаврил Корякин, Бүлүү улууһун баһылыгын социальнай эйгэҕэ солбуйааччы Александр Комаров, Бүлүү улууһун бэтэрээннэрин Сэбиэтин бэрэссэдээтэлэ Федор Николаев, нэһилиэк баһылыга Афанасий Тимофеев, Арыылаах нэһилиэгин бэтэрээннэрин Сэбиэтин салайааччы Людмила Павлова Сэбиэскэй Союз Геройа Николай Саввич Степанов бүүһүгэр гирлянда, сибэкки дьөрбөтүн уурдулар.
Салгыы «Эрэл» Сынньалаҥ киинигэр үөрүүлээх тэрээһиҥҥэ нэһилиэктэр баһылыктара Кыайыы Былааҕын Арыылаах нэһилиэгин баһылыгар Афанасий Тимофеевка туттардылар. Тыл эппиттэр Улуу Кыайыы Знамятын суолтатын туһунан тоһоҕолоон бэлиэтээтилэр.
Дьоро киэһэни нэһилиэктэр истиҥ, эҕэрдэ нүөмэрдэрэ киэргэттилэр.
Кыайыы Былааҕын өрөспүүбүлүкэтээҕи эстафетата салгыы Бүлүү куоратыгар айаннаата.
Галина Колодезникова,
Хампа.