Бүгүн Улуу Кыайыы Знамята “Бары бииргэ – Кыайыыга” эстафета чэрчитинэн Бүлүү сиригэр-уотугар кэллэ. Знамяны үөрүүлээх көрсүү сиэрэ-туома Бүлүү уонна Горнай улуустарын икки ардыларынааҕы аартыкка олус долгутуулаахтык, өрө көтөҕүллүүлээхтик ааста. Бүлүү улууһун иннинэ Кыайыы Знамята Саха сирин 14 улууһугар сырытта.
Бэлиэ түгэҥҥэ тэриллибит миитиҥҥэ Улуу Кыайыы Кыһыл Знамятын Горнай улууһун дэлэгээссийэтин салайааччы, оройуон Сэбиэтин бэрэссэдээтэлэ Маргарита Константинова депутаттар оройуоннааҕы Сэбиэттэрин бэрэссэдээтэлигэр Гаврил Корякиҥҥа туттарда.
Кини Улуу Кыайыы Кыһыл Знамятын өрөспүүбүлүкэтээҕи эстафетата сүҥкэн суолталааҕын, улууска Улуу Кыайыы Кыһыл Знамятын көрсүүгэ элбэх тэрээһин ыытыллыаҕын бэлиэтээтэ.
Улуу Кыайыы Кыһыл Знамятын Бүлүү улууһун сиригэр-уотугар көрсүүгэ улуус баһылыгын социальнай эйгэҕэ солбуйааччы Александр Комаров, бэтэрээннэр Сэбиэттэрин салайааччы Федор Николаев, Лөкөчөөн баһылыга Анна Доргонова, Баппаҕаайы баһылыга Егор Николаев уо.д.а. кытыннылар.
Улуу Кыайыы Кыһыл Знамятын Геройдар дойдуларыгар — Дьөккөҥҥө, Хампаҕа, Балаҕаччыга, Бүлүү куоратыгар, итиэннэ Халбаакыга, Чочуга, Кыадаҥдаҕа көрсүөхтэрэ.
Вероника Харлампьева, Илбэҥэ.