Тыа сиригэр сүөһү иитиитинэн дьарыгырар дьоҥҥо сайынын сүөһү-сылгы аһылыгын бэлэмнээһин үлэтэ тыын боппуруос буолар. От кэмигэр атын үлэ үксэ иккис күөҥҥэ сыҕарыйар, арай кэлэ-кэлэ түһэр, араас таҥара күннэрдээх ардах иннин биэрбэккэ харгыстаан ыллар даҕаны, быыс-арыт булан, сорох дьон уонтан тахсалыы оту туруоруммуттар. Маннык туругунан буоллаҕына дьон син кыстык отторун ылыахтарын сөп курдук.
Окко киириэх иннинээҕи түгэни ылан көрдөххө, самаан сайын кэлиитин саха дьоно ыһыаҕынан уруйдаан-айхаллаан көрсөр. Быйыл Арыылаах нэһилиэгэ урукку даннайдары чуолкайдаан биһиги нэһилиэкпит, оччотооҕу аатынан Өргүөт нэһилиэгэ 385 сылын бэрт тэрээһиннээхтик бэлиэтээтибит. Быйыл ыһыах сорох тэрээһиннэрэ Арыылаахха эрэ буолбакка, дэриэбинэттэн чугас Унаардаах алааска ыытыллыбыта. Онно ППМИ программатынан стадион, концертнай трибуна, күрүө, ат сүүрэр сирэ оҥоһуллубуттара.
Хампаҕа ат сүүрүүтэ буолбатаҕа ырааппыт буолан, улахан сэҥээриини, болҕомтону ылбыта. Онно атын нэһилиэктэртэн уонна олохтоох сүүрдээччилэрбит көхтөөхтүк кыттыбыттара. Петр Николаев бастаан, үөрүү өрөгөйүн билбитэ. Элбэх спонсордар ыһыах бары тэрээһинин өйөөбүттэрэ. Ыһыах сүрүн чааһа урукку ыһыахтыыр сирбитигэр Арыылаах алааска ыытыллыбыта. Быйылгы ыһыах уратытынан саха биллиилээх ырыаһыта Виталий Очиров ыһыаҕы алгыһынан арыйыыта уонна табаарыһын кытта концертаабыта ыһыах дьонун сэргэхсиппитэ сонун иэйии этэ.
Суол-иис оҥоһуута биир улахан боппуруоһунан буолар. Кэбээйилэргэ, Тоҕустарга, Бороҕотторго уонна бэйэбитигэр да буоллун, суолбут ааһар сирэ оскуола аттынан буолбакка атын сиринэн көһөрүллэн оҥоһуллуохтаах. Ардах ардыгар абыраллаах курдук буолан, баһаар биһиги диэки ама курдук.
Сайыҥҥы от үлэтигэр бэлэмнэнэн мелиорация үлэтэ барбыта, урукку совхоз саҕанааҕы ханаабалары, сайаапка түһэрэн үп-харчы тиийбэтинэн сороҕун, ол курдук Тамах, Арыылаах диэн сирдэр ыраастаммыттар.
Салгыы сонунунан арыллан турар реабилитационнай киин быйыл опорно-двигательнай ыарыһахтарга ананыахтаах. Балыыһабытыгар бэйэбит эдэр уолаттарбыт, кыргыттарбыт үлэлииллэрэ кэрэхсэбиллээх.
Нэһилиэкпитигэр үрүҥ ас — арыы, сүөгэй, быырпах атыыта мэлдьи баар. Маслоцехха 12 ыал үүт туттарар. Өссө биир сонуммутунан олохтоох уолбут Степан Алексеев тыа хаһаайыстыбатын чэрчитинэн бэйэтин хаһаайыстыбатын тэринэн эрэрэ буолар. Кини куонкуруска кыайан соц. контрагынан көмө ылан номнуо үлэтин саҕалаан эрэр, аны “Агростартапка” кытта сылдьар.
Ити курдук ыччаттарбыт араас үтүө хайысхаларга кыттыһан олорор нэһилиэкпит чэчирии сайдыытыгар тирэх буолуохтара.
Раиса Евсеева-Дьүөгэ.