Кыадаҥда олохтооҕо Андрей Федоров күннэтэ 13 ынах сүөһүнү, ол иһигэр 5 ыанар ынаҕы көрөр-истэр, сылгы эмиэ ииттэр. Ол эрэн, Андрей Николаевич биир сүрүн дьарыгынан …хортуоппуй харайыыта буолар. Кини 20-чэ сыллааҕыта бэйэтин кыаҕынан эргэ хотону чөлүгэр түһэрэн, хортуоппуй харайар сир оҥостубута.
— Хортуоппуй харайар дьиэ икки оһохтоох, сылааска сарсыарда сылгыларбын көрө таарыйа кэлэн оһохторбуун оттон ааһабын, тымныы түстэҕинэ иккитэ оттобун. Күҥҥэ хаста да кэлэн барабын, көрө-истэ сылдьабын. Былырыын күһүн эргэ тутуу аҥар өттө сууллубутун бэйэм өрөмүөннээбитим, — диэн кэпсээтэ Андрей Николаевич.
Андрей Николаевичка хортуоппуй уурдарар былдьаһык — эрдэттэн үлэһэн кэпсэтиэххин наада. Кыадаҥдаттан, Чочуттан, Бүлүү куоратыттан эрэ буолбакка, ыраах Халбаакыттан, Дьөккөнтөн, Үөһээ Бүлүүттэн тиийэ биир куулу 350 солк уурдараллар эбит. Сүрэхтээх-бэлэстээх, толкуйдаах Андрей Федоров хортуоппуй хараллыытыгар үлэтинэн эппиэттэһэр. 20 сыл тухары дьон хайҕабылын эрэ истэн кэллэ. Саас, сайын хортуоппуйгун күһүн хайдах уурдарбыккынан ыларыҥ бэрт буоллаҕа! Хортуоппуй харайар сирдэри тутууга төһөлөөх үтүмэн үп барара буолуой, онтон төһөтө аналынан туттуллара буолла? Бэйэ кыаҕынан иккис «килиэппитин» тоҥорбокко, сытыппакка үчүгэйдик харайар сир оҥостубут Андрей Федоров курдук үлэһит дьоҥҥо көҕүлүүр соруктаах үбүлээһин булгу көрүллүөн наада. Саатар биирдэ.
Николай Куприянов.