Бэҕэһээ Кыадаҥдаҕа Саха Өрөспүүбүлүкэтигэр бэлиэтэнэр Ийэлэр күннэринэн Н.Х. Константинов аатынан «Күндэ» сынньалаҥ киинигэр «Күн күбэй ийэлэргэ махтал» эҕэрдэ кэнсиэр үрдүк таһымҥа буолан ааста.
Кулуупка дириэктэринэн саҥа ананан тахсыбыт Егор Евдокимов үөлээннээхтэрэ, табаарыстара, Бүлүү улууһун ылбаҕай ырыаһыттара Тамара Фомина, Гаврил Иванов, Анна Игнатьева, Розалия Васильева, Ренат Иванов, Иван Данилов, Иван Максимов, «Аккорд» баянистар бөлөхтөрө — Егор Евдокимов, Виктор Платонов, Алексей Иванов, Геннадий Егоров, Иван Туласынов — дьоро киэһэни нэһилиэк олохтоохторугар, кэлбит ыалдьыттарга күндүттэн күндү күн күбэй ийэҕэ ананар ырыаларын буор босхо бэлэх ууннулар, истиҥник эҕэрдэлээтилэр.
Тамара Фомина, Гаврил Иванов үрдүк сыанаҕа тахсан үҥкүүлээн долгулдьуйа уһуннулар.
Бүлүү биллиилээх ырыаһыта, күөрэгэйэ Матрёна Сивцева иилээн-саҕалаан ыытта, үрдүк халлаантан кутуллар тойугунан тэрээһини ситэрэн биэрдэ.
Айылҕаттан бэриллибит талааннар мустубут түһүлгэлэригэр олорон бу бэлиэ умнуллубат түгэнтэн сэргэхсийэн, талааннарыгар сүгүрүйэн, кинилэрдиин биир эйгэҕэ киирэн аара хаалбыт эдэр сааспытын санаатыбыт, астына сынньананныбыт, уҕараабат ытыс тыаһыттан сүргэлиин көтөҕүллэн тарҕастыбыт.
Мария Буслаева.