600-кэ диэри нэһилиэнньэлээх муниципальнай тэриллиилэргэ кыайыылаах — Тааһаҕар нэһилиэгэ;
600-тан тахса нэһилиэнньэлээх муниципальнай тэриллиилэргэ — Чернышевскай нэһилиэгэ.
Тааһаҕар нэһилиэгин баһылыга Семен Каратаев:
— Ааспыт сыл түмүгүнэн куонкурус-бэстибээл хас да көрүҥэр бастаатыбыт. Итини тэрилтэлэр, уопсастыбаннай түмсүүлэр, нэһилиэк дьоно-сэргэтэ бары биир киһи курдук түмсүбүттэрин, биир тыынынан үлэлээбиттэрин-хамсаабыттарын түмүгэр ситистибит диэххэ наада. Тэрилтэлэр салайааччыларын, бааһынай хаһаайыстыбалары киллэрэн туран, улахан оруолларын бэлиэтиэхпин баҕарабын.
2025 сылы Тыа хаһаайыстыбатыгар оҥорон таһаарыы сылынан биллэрбиппит. Үүт туттарыытыгар кэлиҥҥи сылларга ситиһиллибэтэх көрдөрүүбүтүн – 104 тонна үүтү туттарары ситистибит. Аҕыйах сыллааҕыта хотон туттубут Ким Прокопьев, Евгений Потапов курдук эдэр дьон хаһаайыстыбалара 70 т үүтү туттаран төһүү күүс буоллулар.
Сайын устата 69 ыанар ынаҕы тутар 5 үлэһиттээх сайылык бэркэ үлэлээтэ, элбэх үүтү туттарда.
Ааспыт сылга ынах сүөһүбүт ахсаанын 8 төбөнөн элбэттибит, Тааһаҕарга билигин 537 ынах сүөһүнү кыстыкка туруорабыт. Бааһынай хаһаайыстыбалар сүөһүлэрин 24 төбөнөн элбэппиттэрин бэлиэтиэххэ сөп. Сылгы ахсаанын эмиэ тутан хааллыбыт. Кыстыгы туоруур оппутун, эбии 40 т саппаас оту оттообуппут.
Тимир уһаарар Николай Шамаев быһах, хомус оҥорор урбаанньыт буолбута. Биһиэхэ саҥа көрүҥ буолар.
Култуура эйгэтигэр бары былааннаммыт тэрээһиннэр, ол иһигэр, Улуу Кыайыы 80 сыла таһымнаахтык ыытылыннылар. Саҥа, сырдык, сылаас кулуупка дьон, эдэр ыччат көхтөөхтүк сылдьар, үҥкүү ансаамбыллара элбээтилэр, олоҥхобутун салгыы сайыннарабыт, саха киинэлэрин биримиэйэлэрин көрөбүт.
Улуу Кыайыы 80 сылыгар «Зеленый пояс Вилюя» экология пуондата 20 тахса араас маһы олордубута кэрэхсэбиллээх.
Николай Куприянов.