С.М.Аржаков аатынан дьиэ кэргэҥҥэ иитиини өйүүр Бүлүүтээҕи киин “Сэрии кэмин оҕолоро” диэн акция чэрчитинэн Улуу Кыайыы 75 сылыгар улуус нэһилиэктэрин кэрийэн хомуйбут матырыйаалын билиһиннэрэбит.
Григорьев Иван Фомич ахтыыта:
Мин 1 Күүлэккэ 1930 сыллаахха төрөөбүтүм, ону кырдьаҕас эбэм бутуйан, 1932 сыллаахха төрөөбүт диэн суруттарбыт. Оскуолаҕа 1938 сыллаахха үөрэнэ киирбитим. 1941 сыллаахха бэс ыйын 22 күнугэр фашистар Сэбиэскэй Сойууска саба түспүттэрин нэдиэлэ буолбутун кэннэ, биһиэхэ сэбиэт бэрэссэдээтэлэ , кырдьаҕас бартыһаан Ильин Уйбаан диэн киһи мунньах тэрийэн биллэрбитэ. Оччолорго 1 Күүлэттэн балтараа көстөөх “Сууртаах” диэн сиргэ туспа дэриэбинэҕэ олорбуппут. Ол мунньахха мин дьоммун батыһан барсыбытым, ол саҕана уонтан тахса саастаах оҕо барытын өйдөөбүтүм. Билигин санаатахха, ол мунньахха Сэбиэт бэрэссэдээтэлэ сэриигэ Кыайыы туһугар дьону барытын күүскэ үлэлииргэ ыҥырар этэ уонна дойдуга байыаннай балаһыанньа биллэриллибитин туьунан тиэрдибитэ. Онно Сэбиэт бэрэссэдээтэлэ Степанов Алексей Николаевич, бу бөһүөлэги төрүттээбит киһи, ол мунньахха эмиэ тыл эппитэ.
Ол кэнниттэн атырдьах ыйын бүтүүтэ элбэх киһини армияҕа илдьэ барбыттара. Сылын аайы эдэр, чэгиэн дьоммутун фроҥҥа ыыта турбуттара. Манна колхуоска кырдьаҕастар, оҕолор, дьахталлар хаалбыттара, техника суох буолан барыта илиинэн үлэлииллэрэ. Ат уонна оҕус көлөлөөхпут, инчэҕэй тирбэҕэ быстыбатынан олорбуппут. Сэрии сылларыгар аччыктаан, хоргуйан киһи бөҕө өлбүтэ. Ситэтэ суох ахсаанынан 12 киһи өлбүт диэн суруллубут, дьиҥинэн, биһиги нэһилиэкпитигэр сүүстэн тахса киһи суох буолбута аччыктаан. Кыралаан муҥхалаан, ферматтан эриллибит үүтү түҥэтэн, бэрт кыра бурдугунан одурааннаан аһаан-сиэн сылдьаахтаабыппыт.
Елена Якимова,
социальнай үлэ исписэлииһэ.