Бу күннэргэ Тылгыны нэһилиэгэр, талааннаах тренер, үөрэтэр, дьарыктыыр оҕолоро улуус, өрөспүүбүлүкэ, бүтүн Арассыыйатааҕы таһымнаах араас күрэхтэһиилэргэ ситиһиилээхтик кыттан, тренердэрин үөрдэр чулуу киһилэрэ Халабышев Георгий Владимирович кэлэн оҕолорго сүбэ-ама, араас -маастар кылаастары биэрэн, кикбокса кистэлэҥнэригэр оҕолору уһуйан барда.
Тылгыны оҕолоро успуорт араас көрүҥнэринэн дьаныардаахтык дьарыктаналлар, күрэхтэһиилэргэ кыттан ситиһии кынаттаналлар, кыайыы өрөгөйүн билэллэр. Волейбол, футбол, остуол тенниһэ, оҕунан ытыы, хабылык, хаамыска, атах оонньуутун куруһуоктарыгар дьарыктанан иллэҥ кэмнэрин туһалаахтык атаараллар. Кэнники сылларга успуорт уонна ыччат дьыалаларыгар специалиһа Аян Егорович Григорьев кикбоксаҕа оҕолору дьарыктыыр.
Бүлүү куоратыгар бу успуорт көрүҥүнэн төрөөбүт Тылгыныбытыттан төрүттээх биир дойдулаахтарбыт тапталлаах оҕолоро, сиэннэрэ Георгий Владимировичка дьаныардаахтык дьарыктанан, бүтүн Арассыыйа таһымнаах араас күрэхтэргэ ситиһиилээхтик кыттар инники эрэллэрбитинэн, кэнчээри ыччаттарбытынан буолаллар: Иванов Коля, Типанов Андрей, Васильева Роксана.
Кырачаан Коля араас дойду таһымнаах күрэхтэргэ куруук ситиһиилээхтик кыттар, кыайыы өрөгөйүн билэрин бары билэбит. Оҕолорбутугар өссө да үгүс ситиһиилэр, успуорт бу уустук көрүҥэр кыайыылар мэлдьи кэлэ турдуннар диэн алгыспытын аныыбыт. Тапталлаах Тылгыныларын аатырда турдуннар.
Георгий Владимирович өрөспүүбүлүкэҕэ биллэр-көстөр үлэлээх, тарбахха баттанар үчүгэй тренердэртэн биирдэстэрэ буолар. Кини СӨ Физкультураҕа уонна спорка туйгуна, «СӨ эбии үөрэхтээһин сайдыытыгар кылаатын иһин» бэлиэ хаһаайына , «Бүлүү улууһугар физическэй култуура уонна спорт сайдыытыгар кылаатын иһин» анал бэлиэлээх, оҕо туһугар үлэлиир бастыҥ тренер. Билигин Георгий Владимирович күөх Ньурба улууһугар Хаҥалас сэлиэнньэтигэр оскуола дириэктэринэн ситиһиилээхтик үлэлии сылдьар. Үөрэнээччилэрэ үгүс күрэхтэргэ кытталлар, ситиһии кынаттаналлар.
Тылгыныбыт оҕолоро үөрэ-көтө маастар кылаастарга дьарыктаннылар, араас сүбэ-ама ыллылар, кикбокса дьарыктарыгар сырыттылар. Биһиги нэһилиэктэн Ванесса Лущевская араас күрэхтэргэ боксанан дьарыктанан кыттар, ситиһии кынаттанар. Ванесса Уһук Илиҥҥи бэдэрээлинэй уокурук призера (ДВО), кикбоксаҕа уонна боксаҕа Саха өрөспүүбүлүкэтин хас да төгүллээх чемпиона. Алексеева Алина эмиэ дьарыктанар. Кини өрөспүүбүлүкэ кикбоксиҥҥа чемпионатын призера. Кыргыттары Ванесса аҕата Аян Егорович дьарыктыыр. Маны таһынан , тылгынылар күтүөппүт, Попов Владимир кэлэн Георгийдыын иккиэн тэҥҥэ оҕолорбутун дьарыктаатылар. Владимир Попов Уһук Илиҥҥи бэдэрээлинэй уокуругун кикбоксиҥҥа уонна бүтүн Арассыыйатааҕы турнирдар кыайыылааҕа, кикбоксиҥҥа лоу кик салааҕа Арассыыйа первенствотын боруонса призера буолар. Владимир кикбокса араас кистэлэҥнэригэр оҕолорбутун үөрэттэ.
Нэһилиэкпит аҕа баһылыга Егор Афанасьевич Георгий Владимирович Халабышевтыын көрсөн истиҥник сэһэргэстэ.
Иллэҥ кэмнэригэр айылҕаҕа сынньанан, аар саарга аатырар Илин Эбэбитигэр балыктаатылар. Кэрэ айылҕалаах Илин Эбэҕэ саха норуодунай суруйааччыта Далан «Тулаайах оҕо» романыгар суруйбут былыр кыргыс үйэтин саҕана биһиги Тиит Арыыбытыгар буолбут кыргыһыы сиригэр сылдьан, историческай миэстэни сөрү диэн сөҕө көрдүлэр-иһиттилэр. Эбэ минньигэс бөдөҥ соботун тото-хана сиэтилэр. «Дьандахаар» диэн сиргэ өрүс балыгын балыктаан дуоһуйа сынньанан, ийэ айылҕаттан күүс-уох ылан успуорду уонна сынньалаҥы дьүөрэлээн аҕыйах хонук биллибэккэ ааста.
Георгий Владимирович иитиллээччитин, үөрэппит оҕотун Халбаакыттан сылдьар Дмитрьев Дисары илдьэ кэлэн, нэһилиэкпит эмчитигэр Егор Христофорович Васильевка эмтэтэн үөрэн -көтөн барда. Егор Христофорович араас ыарыһахтары (чуолаан уҥуох тостуутугар) имэрийэн, томоруйан эмтиир сүдү киһибит буолар. Дисар Уһук Илиҥҥи бэдэрээлинэй уокурук уонна Арассыыйа кубогын призера, кикбоксанан утумнаахтык дьарыктанар.
Дьэ, бу курдук, Тылгыныбыт нэһилиэгэр олус туһалаах дьарыктар аһаҕас халлаан анныгар газоҥҥа ыытыллан, аҕыйах хонук нэһилиэкпит боксердар уйалара буолан ньиргийэн-ньирилээн ааста. Успуорт специалиһыгар Аян Егоровичка олохтоохтор ааттарыттан бу маннык тэрээһини тэрийбиккэр, Бүлүү куоратыттан тренердэри аҕалан-илдьэн оҕолорбутугар умнуллубат түгэннэри бэлэхтэппиккэр махталбытын тиэрдэбит. Георгий Владимировичка үлэҕэр ситиһиилэри, үөрэтэр оҕолоруҥ ситиһии кынаттанан, араас күрэхтэргэ килэбэчигэс мэтээллэри иилинэн үөрдэ турдуннар диэн баҕа санаабытын этэбит. Владимирдаах Дисарга үгүс кыайыыны -хотууну, дьаныардаах дьарыктары баҕарабыт.
Үүнэр көлүөнэбит, успуордунан дэлби дьарыктан, чэгиэн -чэбдик олохтоох буол, инниҥ диэки ситиһии көтөллөнөн баран ис диэн алгыспытын аныыбыт.
Виталина Григорьева, Тылгыны.
Хаартыскалары Аян Григорьев тиксэрдэ.