Украинаҕа байыаннай дьайыыга кыайыы туһугар сырдык олоҕун биэрбит Эр санааланыы уордьан кавалера Дмитрий Винокуров бириистэригэр баскетболга улуустааҕы күрэхтэһии икки күн бэрт сытыытык уонна күүрээннээхтик ааста.
Улуустааҕы күрэхтэһии Дмитрий ситиһиилээхтик үөрэммит Бүлүү куорат Г.И.Чиряев аатынан 1 №-дээх оскуолатын спорт саалатыгар тэрилиннэ. Дмитрий оскуолаҕа үөрэнэр сылларыгар волейболунан, баскетболунан утумнаахтык дьарыктаммыта, ити көрүҥнэргэ оскуолатыгар, улууска биир бастыҥ оонньооччунан билиниллибитэ.
Дмитрий Винокуров 2021 сыллаахха оскуоланы бүтэрбитэ, эһиилигэр 2022 сыллаахха АБДь кыттыылааҕынан буолбута. 2023 сыл бэс ыйыгар Запорожскай уобалас Новодаровка сэлиэнньэтин таһыгар геройдуу охтубута.
Дмитрий сырдык аатын кэриэстээн төрөппүттэрэ, оскуола, улуустааҕы спорт кэмитиэтэ, элбэх билэр дьоно-сэргэтэ, тэрилтэлэр сылын аайы баскетболга улуустааҕы күрэхтэһиини тэрийэллэр.
Быйылгы үһүс күрэхтэһиигэ Бүлүү куоратын 3 оскуолалара, гимназия, Кыргыдай, Халбаакы уонна Хампа оскуолалара кытыннылар. Барыта 11 хамаанда күөн көрсөн бастыҥ аатын былдьаста.
Икки күннээх күрэхтэһии түмүгүнэн кыргыттарга Г.И.Чиряев аатынан оскуола хамаандата бастаата, Герой Н.С.Степанов аатынан оскуола хамаандата иккис миэстэни ылла уонна үһүс үктэлгэ И.Л.Кондаков аатынан гимназия кыргыттара таҕыстылар.
Уолаттарга И.Л.Кондаков аатынан гимназия хамаандата бастыан бастаата, иккиһи — Г.И.Чиряев аатынан 1 №-дээх уонна үсүһү Г.С.Донской аатынан куорат 2 №-дээх оскуолалар хамаандалара ыллылар.
Кыайыылаах хамаандаларга харчынан сертификаттар, төрөппүттэриттэн, аймахтарыттан спорт тэриллэрин атыылаһарга диэн бастаабыттарга 30, иккистэргэ 25 уонна үһүстэргэ 20 тыһ солк суумалаах сертификаттар туттарылыннылар.
Бастыҥ оонньооччуларга, тириэньэрдэргэ элбэх сыаналаах бириистэри Дмитрий Винокуров төрөппүттэрэ, аймахтара үөрүүлээх быһыыга-майгыга туттардылар.
Былырыын Ким Семенов тириэньэрдээх И.Л.Кондаков аатынан гимназия хамаандалара иккитэ субуруччу кыайан турнир Кубогын бэйэлэригэр букатыннаахтык хаалларбыттарын бэлиэтиэххэ сөп.
Быйыл турнир көһө сылдьар Кубогын хаһаайынынан Бүлүү куорат Г.И.Чиряев аатынан 1 №-дээх оскуолатын хамаандата буолла!
Эдэркээн олоҕун Кыайыы туһугар анаабыт Дмитрий Винокуров туһунан сырдык өйдөбүл Бүлүү дьонугар үйэлэргэ өлбөөдүйүө суоҕа.
Николай Куприянов.