Тохсунньу 23 күнүгэр улуус дьаһалтатыгар спорт эйгэтин үлэһиттэрин быйылгы 2026 сылга физическэй култуура уонна маассабай спорт сайдыытын боппуруостарын дьүүллэһиигэ сүбэ-мунньахтара тэрилиннэ.
Сүбэ-мунньахха Утумнааһын уонна айымньылаах үлэ сылынан биллэриллибит 2026 сыл сүрүн тэрээһиннэрин улуус баһылыгын солбуйааччы Александр Комаров билиһиннэрдэ.
Спорт кэмитиэтин бэрэссэдээтэлэ Ольга Калачикова-Яковлева улууска 2026 сыллааҕы сүрүн спортивнай-маассабай тэрээһиннэри кэпсээтэ. Үгэс курдук, бүлүүлэри Геройдар, Д.А.Гуляев, байыаннай дьайыылар кыттыылаахтарын бириистэригэр саанан ытыыга,волейболга, атах оонньууларыгар «Бүлүү маастардара», хапсаҕайга В.А.Быкалыров, В.Г.Румянцев, остуол тенниһигэр К.К.Окоемов, мас-реслинҥэ Степан Быкалыров бириистэригэр өрөспүүбүлүкэтээҕи турнирдар, спорт адаптивнай көрүҥнэригэр улуустааҕы спартакиада, «Бүлүү Боотур» уо.д.а. улахан тэрэһиннэр күүтэллэр.
Спорт кэмитиэтин салайааччытын солбуйааччы Валентина Протопопова муниципальнай тэриллиилэр быйылгы кэлим спартакиадаларын балаһыанньатын, Саха Өрөспүбүлүкэтин норуоттарын IX спартакиадатыгар бэлэмнэнии туругун билиһиннэрдэ.
Муниципальнай тэриллиилэр хамаандалары туруоран кэлим спартакиадаҕа быйыл волейболга, мини-футболга, баскетболга, дуобакка, саахымакка, саанан ытыыга, чэпчэки атлетикаҕа, ГТО көрүҥнэригэр, остуол тенниһигэр, оҕунан ытыыга күрэхтэһиэхтэрэ.
Биллэрин курдук, быйыл сайын бэс ыйыгар спорт адаптивнай көрүҥнэригэр Бүлүү куоратыгар ыытыллыахтаах «Дьулуур» XV спартакиада от ыйын саҥатыгар Дьокуускай куоракка көһөрүллэн тэриллэр буолла. Ити туһунан бырабыыталыстыба таһымнаах тэрийэр хамыыһыйа уурааҕа ахсынньы ый эргэтигэр тахсыбыта.
2023 сыллаахха от ыйыгар Аммаҕа тэриллибит «Дьулуур» спартакиадаҕа бүлүүлэр ситиһилээхтик кыттан спартакиада былааҕын туппуттарын санатыахха сөп.
Спорт кэмитиэтин отделын салайааччы Пак Кюндюл Маар уола «Дьулуур» спартакиадаҕа бэлэмнэнии туһунан иһитиннэрии оҥордо. Быйылгы спартакиадаҕа оҕунан ытыы саҥа көрүҥ киирэн биэрдэ.
Бүлүү улууһугар ГТО киинин салайааччы Степан Федоров Бүлүү улууһун сүүмэрдэммит хамаандаларын чилиэннэрэ ГТО нормативтарын кэмигэр туттаралларыгар этиннэ.
Сүбэ-мунньахха быһаччы уонна видео-сибээһинэн кыттыбыт нэһилиэктэр баһылыктарын элбэх ыйытыктарыгар улуус баһылыгын э.т. Иван Евсеев, спорт кэмитиэтин салайааччы, эппиэттээх үлэһиттэрэ толору хоруйдаатылар.
Мунньаҕы салайан ыыппыт Иван Евсеев болҕомтону «Дьулуур» спартакиадаҕа ситиһиилээхтик кыттарга, спорт сүрүн көрүҥнэригэр бааҥҥа счеттаах федерациялары тэрийэргэ, муус устар ыйга нэһилиэктэр икки ардыларыгар хапсаҕай Кубогын күрэхтэһиитин ыытарга туһаайда.
Николай Куприянов.