Бороҕон нэһилиэгэр спорт сайдыытыгар сүҥкэн кылаатын киллэрбит норуот үөрэҕириитин туйгуна, «Саха Өрөспүүбүлүкэтин физкультураҕа уонна спорка туйгуна» бэлиэлээх, Бороҕон нэһилиэгин Бочуоттаах олохтооҕо, тыыл, үлэ бэтэрээнэ, ытыктыыр учууталбыт Иннокентий Тимофеевич Семенов аатын спорт саалаҕа иҥэрии үөрүүлээх тэрээһинэ ыытылынна.
Быйылгы сылга өссө биир суолталаах бэлиэ түгэнинэн нэһилиэкпитигэр спорду тэрийээччилэрбит көҕүлээһиннэринэн, олохтоохтор күүстэринэн маҥнайгы спорт саалата тутуллубута 50 сылын бэлиэтиибит. Ол кэмнэргэ Бүлүү оройуонун нэһилиэктэриттэн биһиэхэ бастакы спорт саала тутуллубута. Ол кэмтэн ыла үгүс көлүөнэ ыччаппыт эт-хаан өттүнэн сайдан, спорка ситиһиилэнэн кэллэхтэрэ. Дьону-сэргэни түмэр, чөл олоҕу түстүүр киэҥ уораҕайбытыгар үгүс элбэх тэрээһиннэр, күрэхтэр ыытыллаллар.
Иннокентий Тимофеевич нэһилиэк чөл туруктаах буоларын туһугар туруулаһан үлэлиирэ, чэгиэн олоҕу өрө тутан спорт араас көрүҥнэригэр оҕолору, олохтоохтору көҕүлээччи, энтузиаст уһуйааччы этэ.
Үөрүүлээх тэрээһиҥҥэ нэһилиэкпит баһылыга Анатолий Васильев, Иннокентий Тимофеевич оҕолоро, аймах-билэ дьонноро тыл эттилэр, эҕэрдэлэрин тиэртилэр. Иннокентий Тимофеевич оҕолоро нэһилиэк салалтатыгар, депутаттарыгар, нэһилиэк дьонугар улахан махталларын тиэртилэр, астыммыттарын биллэрдилэр, эдэр көлүөнэ оҕолорбут эти-сиини сайыннарар саалаҕа сылдьан эрчиллэн, спорт араас көрүҥэр үрдүк ситиһиилэри ылалларыгар баҕардылар.
Салгыы түөлбэлэринэн дуобакка, саахымакка, дартска күрэхтэһии тэрилиннэ.
Тыҥааһыннаах киирсиилэр түмүктэринэн дуобат күрэҕэр: 1 миэстэни «Кэскил» түөлбэ, иккиһи — «Күндэ» уонна үсүһү «Сарыал» түөлбэлэр ыллылар.
Саахымат күрэҕэр «Күндэ»түөлбэ бастаата, иккис — «Кэскил» түөлбэ, үһүс — «Сарыал»түөлбэ буоллулар.
Дартс күрэҕэр бастакы миэстэни «Сарыал» түөлбэ хамаандата ылла, иккис-үһүс «Күндэ» уонна «Кэскил»түөлбэлэрэ таҕыстылар.
Түөлбэлэрин чиэһин көмүскээбит, бары кыттыбыт спортсменнары эҕэрдэлиибит:
Спорду, чөл олоҕу куруук өрө тутуохха, маассабай спордунан дьарыктаныахха диэн барыгытын ыҥырабыт!