Соторутааҕыта Кыргызстаҥҥа кочевниктар 6-с Бүтүн аан дойдутааҕы оонньууларыгар биир кыһыл көмүс, икки боруонса мэтээллэри биир тэҥинэн ылары ситиспит Бөтүҥ оскуолатын физкультураҕа учуутала, оҕунан ытыыга Россия спордун маастара Клара Дмитриевна Спиридонованы биир дойдулаахтара — Бөкчөҥөө нэһилиэгин олохтоохторо истиҥник көрсөн эҕэрдэлээтилэр, бу улахан өрөгөйдөөх кыайыытынан кинини чиэстээһин дьоро киэһэтин тэрийэн ыыттылар.
Нэһилиэк баһылыга Альберт Иванович Прокопьев Клара Дмитриевнаны ис сүрэҕиттэн эҕэрдэлээн туран, Бөкчөҥөө нэһилиэгин бочуоттаах олохтооҕун бэлиэтин үөрүүлээх быһыыга-майгыга туттарда.
Нэһилиэккэ үлэлиир тэрилтэлэр, түмсүүлэр, ыраахтан-чугастан кэлбит аймахтара Клараны истиҥник эҕэрдэлээтилэр, инникитин өссө үрдүк ситиһиилэри, кыайыылары баҕаран үтүө санааларын эттилэр, иһирэх ахтыылары оҥордулар. Ол быыһыгар ырыанан-тойугунан эҕэрдэлээһин көрсүһүүнү эмиэ олус киэргэттэ.
Клара Спиридонованы чиэстээһин дьоро киэһэтин Саха Өрөспүүбүлүкэтин култууратын туйгуна Николай Афанасьев-Айдаман салайан ыытта.
Россия спорка министиэристибэтин 2026 сыл балаҕан ыйын 11 күнүнээҕи бирикээһинэн Клара Дмитриевна улахан уола Самсон оҕунан ытыыга Россия спордун маастарын аатын ылбытын туһунан үөрүүлээх сонун кэллэ.
Алтынньы ыйга Соҕуруу Кореяҕа ыытыллыахтаах улахан күрэхтэһиигэ кыттар Россия сүүмэрдэммит хамаандатын састаабыгар киирсэн, Клара Дмитриевна дойдутугар кэлэн үс хоноот, Москваҕа сборга бэлэмнэнэ көттө. Биир дойдулаахпытыгар үрдүк таһымнаах улахан күрэхтэһиигэ ситиһиилэри, кыайыылары баҕарабыт.
Муза Федорова.