Бу күннэргэ Бүлүү улууһун биллэр тимир уонна мас ууһа Николай Степанов биир уустук уонна мындыр үлэтин – саха омук ытык иһитин — чорооннору хаһан оҥорууну, оһуор-мандар кыһан түһэриини түмүктээтэ.
— Биһиэхэ улахан чорооҥҥо барсар модьу хатыҥ сэдэхтик үүнэр, ол иһин, үксүн киин сирдэртэн кээмэйин көрөн суруттаран ылабын.
Москуба таһынааҕы модьу хатыҥтан 43 см үрдүктээх үс атахтаах, Ленскэй хатыҥыттан 35 үрдүктээх биир атахтаах чорооннору хаһан, кыһан оҥордум.
Чорооннору тиит хатырыгын уутунан сууйдум, 1,5 киилэ кэриҥэ ынах арыытынан сотон иҥэрдим.
Мастарыскыайбар ынах арыытын сытынан дыргыйан саҥа чорооннор чочуллан, оһуорданан-мандардаан оҥоһуллан таҕыстылар, — диэн Николай Степанов оҥорбут чорооннорун туһунан үөрэ-көтө кэпсээтэ.
Былыргы саха улахан чорооно Нью-Йорк куоратын биир түмэлигэр көрдөрүүгэ турара биллэр. Норуот маастара ити чороону кинигэҕэ тахсыбыт хаартыскаттан үтүктэн оҥорбута улахан биһирэбили ылбыта. Кини 77 см үрдүктээх Тойон Айах чороонун оһуоругар-мандарыгар тиийэ үтүктэн 2 ый кэриҥэ чочуйбута чороону оҥоруу уустук үлэ буоларын өссө биирдэ итэҕэтэр.
Николай Куприянов.