Авторга оттооһун туһунан айымньыларын, сүбэлэрин иһин дьон-сэргэ махтала улахан. Олортон эһиги болҕомтоҕутугар Сахабыт сирин улуустарын хаһыаттарыгар араас кэмҥэ тахсыбыт ыстатыйалартан аҕалыахха.
«Отчут сүбэһитэ»
“Олох суола» хаһыат 1996 с. от ыйын 30 күнэ. Редактор А. Яковлев:
— Үлэһит киһиэхэ үүнэр күн ахсын үлэ үмүрүйэн бүппэт. Оттон сүрэҕэ суохха өрүү үлэ суох, үлэлиэҕэр мэһэйдиир сүүс олуурдаах сылтах күөрэс гынар. Анатолий Егорович үлэһит киһи диэн, саба быраҕан, сыана быһан этэр дарбатыыта суох сиэрдээх сыанабыл дии саныыбын. Оҕо эрдэҕиттэн илдьэ кэлбит кичэм баҕа санаатын кынат оҥостон, үүнэр күн ахсын хайдах эмис ынаҕынан, сылгынан иитиллэн олорор тыа сирин, саха дьонун кыһалҕатын уустук, бутуурдаах, үп-харчы татымырбыт кэмигэр чэпчэтистэрбин диэн баҕалаах үлэлиир.
Кини 1967 с. Калуга к. баҕа өттүнэн соҕотоҕун тиийэн үөрэнэн, гидромелиоратор идэтин ылбыт күнүттэн ыла, уу сутугар ылларбыт Бүлүүгэ ходуһа, мэччирэҥ сири таһаарар соруктаах үгүс күөлү хорууга идэлээх исписэлиис быһыытынан, билиитин, сыратын ууран үлэлэстэ. Кини үлэтин туоһулара – күөх дуолга сууламмыт, долгулдьуйа суугунуур ходуһалар, быйаҥынан илгийэр мэччирэҥнэр. Ити да түмүгэр үгүс нэһилиэктэргэ оту үлүскэнник оттууллар, сүөһүнү, сылгыны тоҕуорута иитэллэр.
«Оттуур сэп-сэбиргэл» диэн кинигэтин ырытыһа түһэр санаалаахпын. Бэлиэр техника уматыгын булунуу, алдьаммыт чааһы атыылаһарга, үп-харчы кумахха ууну куппут курдук тыа ыалын абытайдык хаарыйталаан эрэр. Оччотугар, били хотуурбун, күн уотуттан хайа хаппыт мэтэгэр уктаах харбыырбын, мултуйа элэйбит үөрбэбин сүгэммин өлүүкэ аҕыйах суотайдаах сирбин илиибинэн оттоотохпуна ороскуотум, барыыһым төһө-хачча буолуо этэй?
Мин илиинэн оттуурум төһө да бытаанын иһин, оттооһунум хаачыстыбата хайа да техника үлэтинээҕэр ордук. Ороскуотум да дьоҕус буолуо. Аны туран техника уйдаран киирбэт инчэҕэй сирдэрин оттооммун тимир көлөлөөх отчуттааҕар элбэҕи оттуохпун эмиэ сөп.
Дьэ, онон күндү ааҕааччы, Анатолий Егорович кинигэтэ илиинэн оттууру умнан эрэр отчукка туһата элбэх. Автор саха саарыннара оттуур сэптэрин-сэбиргэллэрин хайдах оҥостоллорун туһунан сиһилии, бэл схемалаан, чертежтаан суруйар. Онон бу кинигэ отчут методикатынан сыаналаныан сөп.
Экономическай кризис кэмигэр кинигэ саха отчутугар быһаччы туһалыа. Өскө оскуола паартатыттан сахалыы үгэһи салгыыр өйдөөх-санаалаах, от сэбин-сэбиргэлин сатаан оҥорор, оту оттуур, ол аата оҥойор айаҕын ииттэр кыахтаах ыччат оскуолаттан производствоҕа кэлэригэр үлэ уруоктарыгар да пособие буолуох этэ.
Сахалина Павлова хаартыската.