Бүлүү дьоно-сэргэтэ СВО-ҕа көмө оҥорор пуун үлэтигэр күннэтэ улахан күүс-көмө буолаллар

Анал байыаннай дьайыы саҕаланыаҕыттан “Бүлүү улууһа эһигинниин бииргэ” диэн СВО-ҕа улуус көмө оҥорор пууна байыаннай дьайыы кыттыылаахтарыгар уонна кинилэр дьиэ кэргэттэригэр араас хабааннаах көмөнү оҥорор.
Ол курдук Бүлүү улууһуттан анал байыаннай дьайыыга ыҥырыллан, бэйэлэрэ баҕа өттүнэн барар уонна уоппускаҕа кэлэ сылдьар биир дойдулаахтарбытыгар улуус уопсастыбаннай түмсүүлэрин амарах санаалаах ийэлэрэ, эбэлэрэ, иистэнньэҥ уолаттар ис сүрэхтэриттэн, илиилэрин сылааһынан тикпит байыаннай көстүүмнэрин, араас таҥастарын, оҥоһуктарын, харысхалларын, нэһилиэк олохтоохторо, тэрилтэлэр үлэһиттэрэ, үрүҥ көмүс волонтердар, пуун үлэһиттэрэ өрбүт харыстанар сиэккэлэрбитин, барыта 37 араас утары туттуллар малы-салы бэйэбит тикпит вещмешокпутугар толору уган биэрэн, сыллаан-алҕаан атаартыыбыт. “Бу тигэр көстүүмнэргит маҕаһыыҥҥа 6-8 тыһыынчалаахтар, биэрэр таҥастаргытын, малларгытын барытын маҕаһыынтан ылан барарбыт буоллар наһаа элбэх харчыны ороскуоттуо эбиппит”, -диэн уолаттарбыт барахсаттар махтанан бөҕө бараллар. Сорох уолаттар уоппускаҕа кэлэн үсүһүн ыллыбыт диэн астыналлар, сорохтор 2-3 көстүүмү көрдөөн ылаллар, биһиги 9 араас көстүүмү тигэбит.
Ону таһынан 2022 сылтан уолаттарбытыгар анал баһыылкалары оҥорон ыыталыыбыт. Тоҥ астаах баһыылкаларбытын Саҥа дьыл саҕана ахсынньы 20 күнүгэр ыыппыппытын бары туппуттара, аны олунньуга Аҕа дойду көмүскээччитин күнүн көрсө кэһии ыытаары бэлэмнэнэ сылдьабыт.
Маны сэргэ, ахсынньы 25-26 күннэригэр анал байыаннай дьайыы кыттыылаахтарын дьиэ кэргэттэрин Саҥа дьылынан эҕэрдэлээн, Елена Яковлевна массыынатынан дьиэлэригэр сылдьан, 65 оҕоҕо минньигэс бэлэхтэри туттарбыппыт. Онно минньигэс бэлэххэ сүрүн көмөнү “Свето- фор” маҕаһыын дириэктэрэ Игорь Иванович, фруктанан Джулустан Майоров, “Байдам” маҕаһыыҥҥа фрукта атыылыыр уолаттар көмөлөстүлэр.

Тэрилтэлэртэн, нэһилиэктэртэн, биирдиилээн дьонтон көмө тохтообокко кэлэ турар, Бүлүү куорат эдэр ыччата, иистэнньэҥ, 5 оҕо амарах аҕата Семен Афанасьев 32 аптечканы тигэн, “Фарм+” аптека салайааччыта Саргылана Федоровна, “Наша аптека” салайааччыта Зоя Васильевна наадалаах эмтэри, биинтэ, йод спонсордаабыттарын аптечка иһигэр толору
угаттаан, ханнык эмп туохха туттуллалларын суруйан бэлэмнээбиппитин уолаттар ылаттаан бара тураллар.

Тылгыны нэһилиэгин иистэнньэҥэ Иван Прокопьев 5 араас бейсболкалаах байыаннай көстүүм кэмпилиэгин тигэн, тохсунньу 28 күнүгэр киллэрэн туттарда. Иван таҥаһын барытын бэйэтэ муодалаан быһар уонна тигэр.

Баппаҕаайы нэһилиэгин баһылыга Егор Афанасьевич СВО саҕаланыаҕыттан биһиэхэ күүстээхтик көмөлөһөр, бу күннэргэ этиҥ түспүт маһын элбэҕи аҕалла, ол мастарбытын маһынан уһанар дьоҥҥо биэрэн харысхаллары оҥорторуохпут. “Солнышко” уһуйаан бэйэтин көмөтүн оҥордо, салайааччы Токарская Анна Валерьевна, 1 Күүлэттэн “Дьүөгэ” түмсүү далбардара баайбыт наскыларын, кэтиинчэ, үтүлүк уонна госпитальга анаан косточка, бублик, сыттык, копчик анныгар угуллар сыттыктары тикпиттэрин салайааччыны солбуйааччы Валентина Афанасьевна Захарова киллэрэн туттарда уонна салгыы таҥас тигэ хаалла.
Үгүлээт нэһилиэгин олохтоохторо, баһылык Октябрь Иванович Лукин, 8 куул балыгы ыыппыттарын Бүлүү куоратыттан СВО-ҕа сылдьар уолаттар дьиэ кэргэттэригэр биэрээри 106 ыалга бэлэмнээтибит. Бөтүҥ нэһилиэгин олохтооҕо Седалищев Данил Николаевич 20 киилэ сылгы этин аҕалбытын СВО-ҕа сылдьар 4-5 оҕолоох ыалларга биэрдибит.
Тохсунньу 29 күнүгэр Өкүндү нэһилиэгин олохтоохторо, “Холумтан” түмсүү далбардара кыттыһан оҥорбут көмөлөрүн Өкүндү нэһилиэгин баһылыга Никифор Владимирович Петров уонна “Холумтан” түмсүү салайааччыта, бэтэрээн Сэбиэтин бэрэссэдээтэлэ Федосия Алексеевна Мандарова киллэрэн туттардылар
Бөтүҥ нэһилиэгин «Дьүөгэлэр» уонна «Иис абылаҥа» түмсүүлэрэ улуустааҕы көмө оҥорор пууҥҥа хортуоппуй, ынах, сылгы этин пуун үлэһиттэригэр, волонтердарыгар түбүктээх үлэҕэ сылдьан үрдүттэн аһыылларыгар анаан кэһии гынан киллэрэн биһигини улаханнык үөртүлэр, санаабытын көтөхтүлэр.

Тааһаҕар нэһилиэгиттэн “Күбэйэ” түмсүү далбара Григорьева Наталья Дмитрьевна-10 000, Бүлүү куорат кырдьаҕас олохтооҕо Волгина Анна Ивановна уонна Ксенья Афанасьевна Бубякина 10 000 харчыны биэрбиттэринэн Дьокуускайтан фурнитура ыллыбыт.
Бүлүү куорат олохтооҕо Чорохоев Виктор инвалиднай коляска аҕалан туттарда.
Дойдубут көмүскэлигэр анал байыаннай дьайыыга кытта сылдьар биир дойдулаахтарбытыгар куруук күүс-көмө, өйөбүл буолар амарах санаалаах күндү дьоннорбутугар, улуустааҕы көмө оҥорор пуун үлэһиттэригэр, үрүҥ көмүс волонтердарга, уопсастыбаннай түмсүүлэргэ, нэһилиэктэр олохтоохторугар, тэрилтэлэр салайааччыларыгар, үлэһиттэригэр, урбаанньыттарга, Баппаҕаайы нэһилиэгин баһылыгар Егор Афанасьевич Николаевка, Үгүлээт нэһилиэгин баһылыгар Октябрь Иванович Лукиҥҥа, “Сыа Бүлүү” СХППК дириэктэригэр Алексей Алексеевич Кондратьевка, Тылгыны иистэнньэҥэр Иван Владимирович Прокопьевка, Бүлүү иистэнньэҥэр Семен Семенович Афанасьевка, аптекалар салайааччыларыгар Саргылана Федоровна Егороваҕа, Зоя Васильевна Протопоповаҕа, «Дьүөгэлэр» түмсүү далбардарыгар, салайааччы Сусанна Прокопьевна Семеноваҕа, «Иис абылаҥа» түмсүү далбардарыгар, салайааччы Ирина Зиновьевна Афанасьеваҕа, Тааһаҕар нэһилиэгин “Күбэйэ” түмсүү далбара Григорьева Наталья Дмитрьевнаҕа, Бүлүү куорат кырдьаҕас олохтооҕо Волгина Анна Ивановнаҕа уонна Ксенья Афанасьевна Бубякинаҕа, II Күүлэт орто оскуолатын коллективыгар уонна үөрэнээччилэригэр, дириэктэр Мария Павловна Васильеваҕа, “Солнышко” уһуйаан үлэһиттэригэр, салайааччытыгар Анна Валерьевна Токарскаяҕа эһиги ахсаабат кыһамньыгытынан Кыайыыны чугаһатарга көмөҕүт иһин анал байыаннай дьайыы кыттыылаахтарыгар уонна дьиэ кэргэттэригэр “Бүлүү улууһа эһигинниин бииргэ” диэн улуустааҕы көмө оҥорор пуун волонтердарын уонна тус бэйэм ааппыттан улахан махталбытын тириэрдэбит.

Быйыл Улуу Кыайыы 80 сылынан, Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сыллара биллэриллибитинэн инникитин да Кыайыы туһугар бары бииргэ сомоҕолоһон, биир санаанан түмсэн үлэлиэхпит диэн эрэнэбин.

Мария Томская, улуустааҕы СВО-ҕа көмө оҥорор пуун салайааччыта, Бүлүү куоратын бочуоттаах олохтооҕо.

Читайте дальше