Улуус баһылыгын социальнай боппуруостарга солбуйааччы Александр Комаров анал байыннай дьайыы буола турар сиригэр биир дойдулаахтарыгар гуманитарнай көмөнү тиэрдиэхтээх Бүлүү улууһун дэлэгээссийэтин сырыытын туһунан билиһиннэрдэ:
— Гуманитарнай көмөнү тиэрдэр Бүлүү улууһун дэлэгээссийэтин састаабыгар киирсибит Бүлүү куорат баһылыга Ян Попов, Кыһыл Сыыр бөһүөлэгин баһылыга Юрий Гвызин, Чернышевскай нэһилиэгин баһылыга Антон Амбросьев, ЕДДС сулууспатын салайааччыта Николай Иванов Москубаҕа тиийэн байыаннай сулууспалаахтар сайаапкаларынан үлэлээн эрэллэр.
Москубаҕа биир нэдиэлэ курдук устата кэмҥэ ичигэс таҥаһы-сабы, брониктары, байыаннай дьайыыга туттуллар тэриллэри — прицеллэри, дроннары, матасыыкыллары, дизель-генератордары уо.д.а. атыылаһыахтара.
Биһиги гуманитарнай көмөнү — быһа холоон, тонна аҥара ыйааһыннаах тоҥ аһылыгы: биирдии сүөһү, убаһа этин, ыһаары собону, эт аһылыгы, үрүҥ аһы сөмөлүөтүнэн ыытыахтаахпыт.
Дэлэгээссийэ Москубаҕа сырыытын түмүгэр сөмөлүөтү көрсүөхтээхтэр уонна салгыы анал байыаннай дьайыы буола турар сиригэр айанныахтаахтар. 10-ча күн таһыахтаахтар.
9 мөл. солк. курдук сайаапка киирдэ. «Кыайыы пуондатыттан 6 мөл. солк. киирдэ, улуус дьаһалтата 3 мөл. солк. көрүлүннэ. Ити суумаҕа 42 киһи биэрбитэ. Тоҥ ас, саха быһахтара, харысхал бэлиэлэрэ.
Сайаапканан Тааһаҕартан харысхал биир дьааһыгы, Чернышевскай дьаһалтата уонна нэһилиэннэтэ 7 дьааһык, Чинэкэ «Сулусчаан» детсада 4 дьааһык, Чинэкэ музыкальный оскуолата 1 дьааһык тоҥ аһы эти, балыгы бэлэмнээтилэр.
Үгүлээт нэһилиэгэ 6 дьааһыкка балык кэтилиэтин, тоҥ эти, балыгы олус бэркэ дьаһайан, I Тоҕус дьаһалтата 2 дьааһык ыһаарыламмыт балыгы, эти ыыттылар.
«Кыайыы» пуондатыгар киирбит харчыттан биир биэ этэ, иһин кытта барыта сууйуллан, сороҕо буһарыллан, тоҥоруллан ыытылынна уонна биир улахан сүөһү этэ атыылаһыллан, эрбэтиллэн барда. Эти эттээһиҥҥэ «Сыа Бүлүү» тэрилтэтэ эрбээн көмөлөстө. Маны таһынан, биирдиилээн байыаннай дьайыыга сылдьан уолаттар дьиэ кэргэттэрэ тоҥ аһылык баһыылкаларын ыыттылар.
Барыта холбоон бүгүн Бүлүүттэн 700 кг. кэринэ тоҥ ас барда. Улуус салалтатын суоппара Евгений Тихонов, дьаһалта социальнай уонна ыччакка политикатын отделын сүрүн испэсэлииһэ Харысхан Дмитриев илдьэ бардылар. Бу күннэргэ сөмөлүөтүнэн ыытыахтаахтар.
Николай Куприянов.