“Бүлүү улууһа эһигинниин бииргэ!” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун волонтердара, биир дойдулаахтарбыт, уопсастыбаннай түмсүүлэр өйөбүллэринэн, 3 сылын тиһигин быспакка элбэх үлэни ыытабыт, көмө оҥоробут.
2 Күүлэт баһылыга Юрий Иванович Спиридонов нэһилиэк олохтоохторо “Барыта Кыайыы туһугар” диэн акцияҕа кыттыһан 77650 солкуобай хомуйбут харчыларынан, Саха сиригэр оҥоһуллубут “Чуоккай ас” 4 араас бородууксуйатын-180 устууканы, тактическай 4 көстүүмү, 5 бейсболка, 5 тактическай рюкзак, наскы, перчатка, футболка, соттор, влажнай салфетка, иискэ аналлаах фурнитура Дьокуускайтан сакаастаан аҕалтарбытын улуустааҕы көмө оҥорор пууҥҥа аҕалан туттардылар.
Бу күннэргэ улууспут делегацията СВО-ҕа гуманитарнай көмөнү илдьэ барарыгар көмө оҥорор пуун иистэнньэҥэ Семен Семенович Афанасьев 9х7 кээмэйдээх “Вилюйский улус” диэн суруктаах 39 шеврону биир күн иһигэр оҥорбутун Ян Анатольевичка биэрэн ыыттыбыт.
Бу өрөбүллэргэ уоппускаҕа кэлэ сылдьар, контрагынан сулууспалыы барар уолаттарбытын көмө оҥорор пуунтан улууспут уопсастыбаннай түмсүүлэрин ийэлэрэ, иистэнньэҥ уолаттара илиилэрин сылааһынан тикпит таҥастарын, аптечкалары (толору эмтээх), харыстанар сиэккэ, коврик, спальнай мешок, тактическай рюкзак, шеврон, барыта 42 араас малы–салы биэрэн, ийэлии сыллаан, “Сыа Бүлүү” оҥорбут сиробун, барыанньатын дойдуларын аһа сэниэ-кыах биэрдин диэн алҕаан туттаран ыыталаатыбыт.
* * *
Олунньу 12 күнүттэн кулун тутар 24 күнүгэр диэри Саха сирин дьахталларын хамсааһыннарын 100 сылыгар аналлаах өрөспүүбүлүкэтээҕи “Женщины Якутии-надежный тыл страны” диэн видеонан куонкуруска “Бүлүү улууһа эһигинниин бииргэ!” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун 5 видеонан кытынныбыт. Куонкуруска барыта 15 видео көрдөрүлүннэ, Хаҥалас-2, Мэҥэ Хаҥалас-1, Сунтаар-1, Амма-1, Алдан-2, Үөһээ Бүлүү-1, Бүлүү улууһа-5, Дьокуускайтан Сайсаар уокуруга-1, Автодорожнай-1.
Кулун тутар 25 күнүгэр Дьокуускайга куонкурус түмүгүн таһаарар тэрээһин уопсастыбаннай Киин саалатыгар буолла. Тэрийээччилэр «Биир ньыгыл Арассыыйа» Саха сиринээҕи отделениетын өрөспүүбүлүкэтээҕи толорор кэмитиэтин салайааччытын быстах кэмҥэ эбээһинэһин толорооччу Надежда Геннадьевна Селютина, «Саха Өрөспүүбүлүкэтин дьахталлар тэрилтэлэрин Сойууһа» уопсастыбаннай хамсааһын бэрэссэдээтэлэ, Арассыыйа дьахталларын Сойууһун Бюротун чилиэнэ, «Биир ньыгыл Арассыыйа иһинэн дьахталлар хамсааһына» федеральнай партийнай бырайыак координатора Анжелика Егоровна Андреева, «Биир ньыгыл Арассыыйа иһинэн дьахтар хамсааһына» бырайыагын уопсастыбаннай Сэбиэтин бэрэссэдээтэлэ Анна Афанасьевна Федорова дьахтар хамсааһынын туһунан кэпсээтилэр, наҕараадалары туттардылар. Куонкурус кыттыылаахтара төгүрүк остуол тула олорон бэйэлэрин уопсастыбаннай үлэбитин кэпсэттибит.
Куонкурус хас биирдии кыттааччытын Грамотанан, 5000 суумалаах сертификатынан, үс улуус 10000 суумалаах сертификатынан наҕараадаланна, Бүлүү улууһа Грамотанан уонна10000 суумалаах сертификатынан наҕараадаланан үөрэн-көтөн кэллибит.
Түгэнинэн туһанан, биһиги үлэбитин сыаналаан, өйөөн куоластаабыт дьоннорбутугар уонна Иккис Күүлэт нэһилиэгин олохтоохторугар, баһылык Юрий Иванович Спиридоновка “Бүлүү улууһа эһигинниин бииргэ!” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун аатыттан улахан махталбытын тириэрдэбит.
Мария Томская, Бүлүү куоратын бочуоттаах олохтооҕо, Бүлүү улууһун уопсастыбаннай түмсүүлэрин уонна СВО-ҕа көмө оҥорор пуун салайааччыта.