Бүгүн Бүлүү куоратыгар П.Х. Староватов аатынан кыраайы үөрэтэр мусуойга анал байыаннай дьайыы кыттыылаахтарыгар уонна волонтердарга анаммыт «Билиҥҥи кэм геройдара” быыстапка арылынна.
Быыстапка Улуу Кыайыы 80 сылын көрсөр тэрээһиннэр чэрчилэринэн ыытылынна. Көрөөччүлэр болҕомтолоругар Бүлүү улууһуттан төрүттээх анал байыаннай дьайыы кыттыылаахтарын хаартыскалара, тутта сылдьыбыт маллара, таҥастара, докумуоннара уонна волонтердар ыытар үлэлэрин көрдөрөр экспонаттар турдулар.
Төһө даҕаны дьыл-хонук аастар Аҕа дойду кырыктаах сэриитигэр Кыайыыны уһансыбыт саллааттар хорсун быһыылара умнуллубат, киһи аймах өйүттэн-сүрэҕиттэн сүппэт. Оттон билигин биһиги уолаттарбыт Украинаҕа үөскээбит фашизм саҥа көрүҥүн утары охсуһаллар, дьоруойдуу быһыылары оҥорон кыайыыны чугаһаталлар.
Быыстапка арыллыытыгар «Бүлүү улууһа (оройуона)» муниципальнай оройуон баһылыгын социальнай политикаҕа солбуйааччы Александр Игоревич Комаров, «Бүлүү куората” муниципальнай тэриллии баһылыга Ян Анатольевич Попов, Бүлүү куорат депутаттарын Сэбиэтин бэрэссэдээтэлэ Николай Николаевич Харлампьев, анал байыаннай дьайыыга оҕолоро, сиэннэрэ, кэргэттэрэ, аҕалара хорсуннук сэриилэһэ сылдьар дьон аатыттан Ксения Максимовна Семенова, Бойобуой дьайыы бэтэрээннэрин ассоциациятын салайааччыта Васильев Борис Николаевич тыл эттилэр, быыстапка үүнэр көлүөнэни патриотизм тыыныгар иитиигэ, СВО-ҕа кыайыы туһугар сырдык тыыннарын биэрбит биир дойдулаахтарбыт ааттарын үйэтитиигэ туһуламмытын бэлиэтээтилэр.
“Бүлүү улууһа эһигинниин бииргэ» улуустааҕы көмө пуун салайааччыта Мария Петровна Томская уонна «Бүлүү харысхал” салайааччыта Светлана Тарасовна Иванова Бүлүү улууһугар волонтердар хайдах быһыылаах-майгылаах үлэлии-хамсыы сылдьалларын кэпсээтилэр. Түмсүүлэр кыттыылаахтара сүбэлэрин холбоон, өрөбүл, үлэ күнэ диэн араарбакка сүрэхтэрин баҕатынан кыайыыны уһансаллар. Анал байыаннай дьайыыга сылдьар уолаттарга күннэтэ араас көмө оҥорон ыыта тураллар. Ол онтон хас биирдии буойун санаата көтөҕүллэр, кыайыыга дьулуура бөҕөргүүр.
Быыстапкаҕа «Бүлүү улууһа эһигинниин бииргэ» уонна «Бүлүү харысхал” түмсүүлэр буойуннарга илиилэрин сылааһынан оҥорбут харысхаллара, байыаннай таҥастар көрүҥнэрэ, эмтээх оттор турдулар.
Быыстапкаҕа барыта 17 буойун олоҕун кэрчиктэрин билсиэххэ сөп. Уопсайа мусуой фондатыгар СВО-ҕа аналлаах 80-ча экспонат киирбит.
Быыстапканы тэрийиигэ П.Х. Староватов аатынан кыраайы үөрэтэр мусуой коллектива, анал байыаннай дьайыы кыттыылаахтарын дьиэ кэргэттэрэ, “Бүлүү улууһа эһигинниин бииргэ» улуустааҕы көмө оҥорор пуун (салайааччы М.П.Томская), «Бүлүү харысхал” волонтерскай хамсааһын (салайааччы С.Т.Иванова), Саха Өрөспүүбүлүкэтин «Защитники Отечества» судаарыстыбаннай фонда филиала (социальнай координатор Л.Н.Унаров) бэйэлэрин кылааттарын киллэрдилэр.
«Олох суола».