Атырдьах ыйын 18 күнүгэр Бүлүү куоратыгар П.Х.Староватов аатынан кыраайы үөрэтэр музей үлэһиттэрин көҕүлээһиннэринэн «Балыктааһын — бүлүүлэр төрүт дьарыкпыт» диэн балыксыттар күрэхтэрэ ыытылынна.
Кыттааччылар Эбэ кытылыгар туран, спинниннарын бырахтылар. Этиллибит бириэмэҕэ аргыый аҕай кэпсэтэ-кэпсэтэ, Эбэ бэлэхтэрин хомуйдулар. Барыта 30-ча киһи кытынна. Улахан дьону кытта оҕолор эмиэ көхтөөх кыттыыны ыллылар.
Күрэх түмүгэр балыктары ыйааһыннаан көрдүлэр, кыайыылаахтары быһаардылар. Ол курдук, улахан дьоҥҥо Быканова Прасковья — 3 миэстэ, Николаева Анджелина — 2 миэстэ буоллулар, саамай элбэх балыгы тутан кыайыылааҕынан Софронеева Ульяна Егоровна буолла.
Оҕолорго 1 миэстэ — Егоров Сергей, 2 миэстэ — Андреев Дьулусхан, 3 миэстэ — Иванова Туйгууна.
Маны таһынан, араас номинациялары туттардылар: «Бастакы хаппыт балык», «Саамай кыра кыттааччы», «Саамай аҕа саастаах кыттааччы».
Дьон-сэргэ сөбүлүүр дьарыктарынан күрэххэ кыттан, сертификат, бириис, анал аат ылан, үөрэн-көтөн тарҕастылар, тэрийээччилэргэ махталларын биллэрдилэр.
Василина Татаринова.