Оҕону иитии. Бэйэ холобурунан уонна үлэнэн оҕону иитии суолтата билиҥҥи кэмҥэ өссө ордук улаатта.
Хас биирдии киһи, ыал олоҕо бэйэтэ туспа суоллаах-иистээх, хаһан да майгыннаспат уратылаах буолар. Дьиэ кэргэн оҕону иитиигэ үгэстэриттэн биир кэрчиги бүгүҥҥү ыалым холобурдарыгар көрүөхпүт.
Бүлүү куоратыгар билиҥҥи кэмҥэ сүөһүлээх ыал олох аҕыйах. Ол да буоллар Поповтар дьиэ кэргэттэрэ сүөһү туппуттара ыраатта, аҕалара, эһэлэрэ Николай Ильич хаһаайыстыбатын бэйэтэ көрөр-дьаһайар. Онтон сайыҥҥы от үлэтэ бу ыалга бэйэтэ туспа бырааһынньык, бэлиэ түгэн курдук суолталанар. Томороон тымныылаах кыһыммытыгар олорон самаан сайын былдьаһыктаах күннэрин ахтан-санаан ааһыаҕыҥ. Ол сиэринэн ыал ийэтэ, эбэтэ Валентина Егоровна кэпсээнини истиэҕиҥ:
Эһэлэрэ бэйэлэригэр сөптөөх үлэлиир тэриллэрин оҥорон хааччыйар, мин астарын-үөллэрин бэлэмниибин, таҥастарын-саптарын көрөбүн. Дьэ оннук тэринэн от, атырдьах ыйдарыгар ходуһа дьоно буолабыт. Сибиэһэй салгын, айылҕа мүөттээх сыта, охсуллубут от сыта – барыта олус үчүгэй, хатыламмат ураты эйгэҕэ сылдьабыт. Мунньууга туһунан кэбиһээччилэр, бастаан кыраларыгар, биллэн турар, иннинэн-кэннинэн барыы диэн, кыратык сүрэҕэлдьээн ылыы диэн ханна барыай. Ол эрээри нөҥүө күнүгэр син биир ходуһабытыгар бары күргүөмүнэн киирэбит, дьиэҕэ ким да хаалыан баҕарааччыта суох.
Аны туран, салгыы көмөлөһө доҕотторбут, дьүөгэлэрбит кэлээччилэр. Ол буоллаҕа дии биир туспа сабыытыйа: өр көрсүбэтэх дьон ирэ-хоро кэпсэтэбит, айылҕаҕа көҥүл сылдьабыт, төгүрүччү олорон ыһыкпытын тото-хана сиибит сонун аспытынан күндүлэһэбит, күүс-сэниэ ылабыт. Сиэннэр дьэ ону кыһыны быһа умнубаттар, эһиил сайын эмиэ кэлиэхпит, оттуохпут, ходуһаҕа ооньуохпут, сүүрүөхпүт-көтүөхпүт диэн баҕа санааларын этэллэр.
Ити курдук аныгы ыал үтүө үгэһэ өссө да салҕанан бара турарыгар баҕарабыт.
Муза Федорова.