«Дьүрүһүй, хомуһум!» Н.С.Шишигин аатынан өрөспүүбүлүкэтээҕи киэҥ далааһыннаах, үрдүк таһымнаах күрэх кулун тутар 20 күнүгэр Дьокуускай куоракка Саха тыйаатырын сырдык уораҕайыгар буолан ааста. Манна Бүлүүттэн сылдьар эдэр хомусчут Дорофеев Рудольф үрдүк ситиһиилэннэ.
Күрэххэ өрөспүүбүлүкэбит араас муннуктарыттан: Дьокуускай куораттан, Намтан, Хаҥаластан, Мэҥэ Хаҥаластан, Уус Алдантан, Амматтан, Чурапчыттан,Томпоттон, Булуҥтан, Дьааҥыттан, Бүлүүттэн, Ньурбаттан, Сунтаартан, Миирнэйтэн кэлэн барыта 450 эдэр кэскиллээх хомусчут кэлэн кыттыыны ылла. Олортон 80 оҕо соҕотохтуу толорооччулар, 35 ансаамбылынан толорооччулар.
Бу күрэххэ Н.И.Протопопова аатынан «Кэскил» оҕо айар-тобулар дьоҕурун сайыннарар киин иитиллээччилэрэ: Дорофеев Байар Хан, Эверстова Саина, Дорофеев Рудольф ситиһиилээхтик кыттан, элбэҕи билэн-көрөн кэллилэр. Дорофеев Рудольф бэйэтин бөлөҕөр 1 истиэпэннээх лауреат үрдүк ааты ылары ситиһэн, олуһун долгутта, үөрүүбүтүн үксэттэ.
Кыттааччылар толорууларын таһыма үрдээбитэ көстөр, импровизатор -хомусчуттартан итэҕэһэ суох тартылар. Киһи эрэ истэ олоруох хоһуйуулара бааллар. Оҕолор таҥастара-саптара, сыанаҕа тутта-хапта сылдьаллара олус үчүгэй. Биир идэлээхтэрбитин кытта санаа атастаһан, атын оҕолору көрөн-истэн, биһиэхэ бары өттүнэн эргиччи туһалаах күрэх буолла диэн бэлиэтиибин.
Буолар сирэ олус табыгастаах: киэҥэ-куоҥа, сырдыга, ырааһа, чугаһа. Ыйан-кэрдэн биэрэр волонтердар баар буоланнар, ыраахтан кэлбит ыалдьыт муна-тэнэ сылдьыбат. Бириистэр олус үчүгэйдэр, кыайыылаахтарга элбэх хомуһу
туттардылар.
Чахчы даҕаны саха хомуһун музыката сайдар кэскиллээх, кэлэр көлүөнэ ыччат ымыы гынан илдьэ сылдьара олус хайҕаллаах.
Елизавета Дорофеева,
Н.И. Протопопова аатынан «Кэскил» оҕо айар-тобулар дьоҕурун сайыннарар киин педагога.