Муус устар 4 күнүгэр биир дойдулаахпыт,
уһулуччулаах судаарыстыбаннай уонна политическай деятель, 17 сыл тухары өрөспүүбүлүкэни салайбыт, Сахатын
сирин историятыгар сайдыы сырдык суолун хаалларбыт Гавриил Иосифович Чиряев
төрөөбүтэ үбүлүөйдээх 100 сылыгар аналлаах миитин, кини бүүһүгэр сибэкки ууруутун үөрүүлээх тэрээһинэ төрөөбүт дойдутугар Кыадаҥдаҕа буолан ааста.
Тэрээһини «Күндэ» СК дириэктэрэ Кристина Буслаева иилээн — саҕалаан ыытта.
Кэлбит ыалдьыттары, олохтоохтору кэрэ- бэлиэ күнүнэн эҕэрдэлээтилэр: Бүлүү улууһун дьаһалтатыттан баһылык бастакы
солбуйааччыта Иван Евсеев, улуус Сэбиэтин дьокутаата Прокопий Захаров, Чочу нэһилиэгин тыа сирин түөлбэтин дьаһалтатын исписэлииһэ Сергей Трофимов.
Чочу нэһилиэгин баһылыгын солбуйааччы Надежда Евсеева үбүлүөйдээх сылы көрсө ыытыллыбыт үлэлэри, инники былааннары билиһиннэрдэ, көмөлөспүт туһааннаах тэрилтэлэргэ, икки нэһилиэк олохтоохторугар махталын биллэрдэ, истиҥник эҕэрдэлээтэ.
Сааскы дьыбардаах сарсыарда үөрүүлээх күн кынатынан буолбут ырыа дьиэрэйдэ.
Бүлүү улууһун, Чочу нэһилиэгин бочуоттаах олохтооҕо Кыадаҥда нэһилиэгин 91саастаах ытык саастааҕа Диамид Томскай Гавриил Иосифович Чиряевы кытта алтыһан ааспыт түгэннэриттэн ахтан Улуу киһини кыл түгэнэ чугаһатан ылла, ис киирбэхтик төгүрүк остуол тула олорор курдук сэһэргээтэ. Арай кини кэннигэр хаалларбыт кэриэһэ туолбатаҕыттан хомойорун эттэ…
Икки нэһилиэк олохтоохторо, тэрилтэлэрин салайааччылара, үлэһиттэрэ, оскуола оҕолоро кыттыыны ыллылар.
Диамид Гаврильевич бэлиэтээн аһарбытын курдук, бэҕэһээ халлаан былытынан бүрүллэн хаардыы турбут буоллаҕына, бүгүн сып — сырдык
чаҕылхай күннээх, көҕөрөр үрдүк халлааннах анаабыт курдук ыраас күн буолла. Мэктиэтигэр бүүһүгэр сырдык мичээр түспүккэ дылы…
Тэрээһин Гавриил Иосифович Чиряев бүүһүгэр сибэкки ууруунан түмүктэннэ.
Мария Буслаева, Чочу.