Муус устар 4 күнүгэр биир дойдулаахпыт, саха саарына, уһулуччулаах судаарыстыбаннай уонна политическай деятель Гавриил Иосифович Чиряев тѳрѳѳбүтэ 100 сылын туолар.
Гавриил Иосифович 95 сыллаах үбүлүѳйүн бэлиэтиирбитигэр 2025 сылга 100 сыллаах үбүлүѳйүгэр бэлэмнэнэн 5 сыл устата дойдутугар араас хабааннаах үлэлэр бардылар. Олортон ордук суолталаахтарын бэлиэтээн ааһыам. Ол курдук, ааспыт сайын Сыдыбыл сэлиэнньэтигэр «Якутскэнерго» тэрилтэ дэриэбинэ иһинээҕи уот линиятын толору сип-кабельга кѳһѳрдѳ, эргэ баҕаналары саҥаларга уларытта. Нэһилиэк икки сэлиэнньэтигэр баар олох-дьаһах хаһаайыстыбатын эбийиэктэригэр ГУП ЖКХ ѳрѳмүѳн үлэтин ыытта. «Сахатранснефтегаз» тэрилтэ эргэ гаас турбаларын саҥарта.
Чочу нэһилиэгиттэн Мииринэй куоракка бара сылдьан, «АЛРОСА» хампаанньаны кытта сѳбүлэҥ түһэрсибитим түмүгэр «АЛРОСА» акциялаах хампаанньа Гавриил Иосифович Чиряев тѳрѳѳбүт Ураһалаах алааһын чѳлүгэр түһэриигэ 7 мѳлүйүѳн кѳрбүтэ. 
Бу кѳмѳҕѳ Кыадаҥдаттан Ураһалаах алааска диэри суол ѳрѳмүѳнэ барда, «Г.И.Чиряев тѳрѳѳбүт сирэ» диэн тимир арка турда, алаас эргиччи күрүѳлэннэ, 7,5х7,5 иэннээх буруус дьиэ тутулунна. Маны сэргэ, хампаанньа түмэлэ кимберлитовай боруода, алмаас копиятын, промышленность сайдыытын историятын кэпсиир литератураны Г.И.Чиряев түмэлигэр бэлэх ууммута. Онон «АЛРОСА» хампаанньаҕа ѳр сыллаах олохтоохтор ыра оҥостубут баҕа санаалара туолбутугар махталбыт мунура суох.
Урукку сылларга үлэҕэ киирбит Кыадаҥдатааҕы Г.И.Чиряев түмэлэ биллэ эргэрбитинэн, билигин саҥардыллыбыт оҕо садын дьиэтигэр кѳһѳр үлэтэ бара турар.Түмэл саҥардыллыбыт эбийиэккэ кѳһүүтүгэр ис-тас ѳттүн оҥоруутугар Бүлүү улууһун дьаһалтата үбүлээһинин ыытта. Саҥа мебелинэн, витриналарынан, стендэлэринэн толору хааччыйыыга, материальнай уонна техническай базатын хаҥатыыга олохтоох дьаһалта мѳлүйүѳн 700 тыһыынча сууманы кѳрдѳ.
Ааспыт сыл Чочу нэһилиэгин дьаһалтата Нерюнгри куоракка бара сылдьан, оройуон, куорат, түмэл, киин библиотека, Г.И.Чиряев пааркатын коллективтарын кытта инникитин улуу киһибит аатын үйэтиитигэ холбуу үлэ ыытарга кэпсэттэ. Беркакитка баар тимир суол түмэлиттэн саҥа уонна ураты экспонаттары бэлэх ууммуттара.
Г.И.Чиряев тѳрѳѳбүтэ 100 сыллаах үбүлүѳйүгэр бэлэмнэнии уонна тэрийии өрөспүүбүлүкэтээҕи былааныгар Сыдыбыл сэлиэнньэтиттэн Бүлүү куоракка диэри суол ѳрѳмүѳнэ, Кыадаҥдаҕа саҥа ФАП, Чочуга балыыһа тутуута пуун быһыытынан киирэ сылдьар.
Уһулуччулаах биир дойдулаахпыт Гавриил Иосифович Чиряев үтүѳ аатыгар сүгүрүйэн, Сахабыт сирин балысхан сайдыытыгар сүҥкэн кылаатын киллэрбит үтүѳтүн иһин, бу өрөспүүбүлүкэтээҕи былааҥҥа киирбит тосхоллор хайаан да олоххо киириэхтэрэ диэн чочулар, кыадаҥдалар бигэ эрэллээхпит.
Петр Догоюсов, «Чочу нэһилиэгэ» тыа сирин түѳлбэтин баһылыга.