Саллаат уолаттарга Тылгыны иистэнньэҥин көмөтө

Анал байыаннай дьайыы кыттыылаахтара саа-саадах тутан, ыҥырыллан барбыттара номнуо үһүс сыла буолан эрэр. Сахабыт сирин, Бүлүүбүт улууһун, биһиги кыракый Тылгыныбыт нэһилиэгин олохтоохторо, бу анал байыаннай дьайыыга сылдьар биир дойдулаахтарбытыгар араас хабааннаах көмөнү оҥорон, күүс-көмө буола олоробут. Сүрүн көмөнөн ичигэс таҥас тигиитэ, хаххалыыр сиэккэлэр, атахтарын тилэҕин харыстыыр угунньулар, араас таҥас-сап, эмтэрин уктар аптечкалар, малларын сүгэр үрүсээктэр тигиллэн быыстала суох уолаттарга ыытылла турара олус хайҕаллаах.
Биһиги нэһилиэкпититтэн иистэнньэҥ Иван Владимирович Прокопьев илиитин сылааһынан тикпит таҥастарын Бүлүү улууһун гуманитарнай көмөнү оҥорор пуунугар (салайааччы М.П. Томская ) илдьэн туттарар.
Иван Прокопьевы көрсөн, аҕыйах ыйытыыга хоруйдууругар көрдөстүбүт.

Сүрүннээн туох, ханнык таҥастары тигэн күүс-көмө, өйөбүл буолаҕын?

-Мин ордук, сүрүннээн анал байыаннай ыстааннаах, үөһээ өттүлээх (спец.көстүүмнэри) тигэбин. Хас биирдии көстүүммүн илиим сылааһа уолаттарга тиийдин диэн санаалаах олорон тигэбин.

Матырыйаалларгын хантан ылаҕын?
— Миэхэ Бүлүү улууһун көмөнү оҥорор пууна матырыйаал, сап, молния, липучка ыытар. Онон бары өттүнэн толору хааччыллабын.

Хаһааҥҥыттан таҥас тигэн көмөлөһөҕүнүй? Улууска кимниин бииргэ үлэлиигиний?
— 2023 сылтан улуустааҕы көмөнү оҥорор пууну кытта, салайааччы Томская Мария Петровналыын бииргэ үлэлиибин.

Уолаттарга баҕа санааҥ?
-Уолаттарбыт сылаас, үрдүк хаачыстыбалаахтык тикпит таҥастарбын кэтэн, дойдубутугар Эйэ тосхойо охсон, иэримэ дьиэлэригэр кыайыы-хотуу аргыстаах, кылаабынайа, муус доруобай эргиллэн кэлэллэригэр баҕарабын.

Иван Владимировичка, махтанабыт. Илииҥ сылааһынан угуттаан тикпит таҥастарыҥ кыайыыны-хотууну аҕаллыннар.

Дьэ, бу курдук Тылгыныбыт иистэнньэҥэ Иваҥҥа өссө да ситиһиини,айымньылаах үлэни баҕарыаххайыҥ.
Сахабыт сирин, Бүлүүбүт улууһун, Тылгыныбыт нэһилиэгин уолаттарыгар саалаахтан самнымаҥ, охтоохтон охтумаҥ, кыайыы кынаттаах, үөрүүү көтөллөөх төрөөбүт дойдугутугар этэҥҥэ эргиллэн кэлиҥ диэн алгыспытын аныыбыт.

Виталина Григорьева, Тылгыны.

Хаартыскалар Иван Прокопьев архыыбыттан.

Читайте дальше