2022 сыл балаҕан ыйын 29 күнүгэр “Бүлүү улууһа эһигинниин бииргэ!” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун Бүлүү куоратыгар тэриллибитэ.
Ийэ дойдуларын көмүскүү сылдьар биир дойдулаахтарбытыгар, Саха сириттэн сылдьар буойуннарга таҥас тигэн, харыстанар сиэккэ өрөн, аадырыстаммыт баһыылкалары ыыталаан, туох кыахпыт баарынан үһүс сылбытын араас хабааннаах көмөнү оҥорон үлэлии сылдьабыт.
Олунньу 21 күнүгэр Дьокуускай куоракка бараммыт НВК-ҕа “Саҥа күн” биэриигэ 2022 сылтан уолаттарбытын тугунан таҥыннаран, тугу биэрэн ыыталыырбытын, 3 сыллаах үлэбитин көрдөрөн уһуллан кэллибит. Өрөспүүбүлүкэҕэ, улууспутугар ыытыллар СВО-ҕа аналлаах акцияларга улуус уопсастыбаннай түмсүүлэрэ тиһигин быспакка кыттыһан, Сахабыт сириттэн анал байыаннай дьайыыга сылдьар уолаттарбытыгар бу сыллар тухары элбэх араас таҥас-сап, аптечка тигилиннэ, блиндажнай чүмэчилэр, харысхаллар, сиэлтэн угунньалар оҥоһулуннулар, харыстанар сиэккэлэр өрүлүннүлэр уонна да араас утары туттуллар малы-салы “Якутия с тобой” диэн Дьокуускайдааҕы кииннэммит көмө оҥорор пууҥҥа илдьэн туттартыыбыт. 2025 сылга биир дойдулаахтарбытыгар балтараа туонна аадырыстаммыт баһыылка, ону таһынан Саха сириттэн сылдьар 20 буойуҥҥа Аҕа дойдуну көмүскээччи күнүнэн эҕэрдэлээн туран, оҕолор суруктарын, минньигэс астаах баһыылкалары ыыппыппыт.
Аан бастаан 9 араас көстүүмү тигэр буоллахпытына, билигин сезонуттан көрөн 17 араас көстүүмнэри, ону таһынан сэлиэнчиктэри, толстовкалары, кууркалары, термобельелары, балаклавалары тигэбит. 2023 сылтан Тылгыны нэһилиэгин олохтооҕо, улуустааҕы “Көмүскэл” диэн иистэнэр эр дьоннор түмсүүлэрин салайааччыта Иван Прокопьев, Бүлүүттэн Семен Афанасьев диэн иистэнэр уолаттар, 1 Күүлэттэн “Дьүөгэ” түмсүү салайааччытын солбуйааччыта Валентина Захарова, Кыадаҥдаттан “Күндэли” түмсүү салайааччыта Варвара Чиряева, Тааһаҕартан “Күбэйэ”, Хампаттан “Чэбдигирии”, Баппаҕаайыттан “Сүрэҕим баҕатынан”, Чочуттан “Утум ситимэ”, Кыргыдайтан “Дайыы”, Хаҕынтан “Аҕам саас”, Бөтүҥтэн “Дьүөгэлэр”, “Иис абылаҥа”, Тыымпыттан “Сарыада” түмсүүлэр Далбар хотуттара, Бороҕонтон иистэнньэҥ Саргылана Каратаева, Бүлүүттэн урбаанньыт Валентина Григорьева көстүүм, таҥас арааһын, кэтиинчэ, куллуку тигэннэр күүстээхтик көмөлөһө сылдьаллар, СВО-ҕа сылдьар уолаттарбыт атахтара куруук сылаас уонна кураанах буоллун диэн сиэлтэн угунньа оҥороннор, Бороҕонтон Августина Мальцева, Антонина Федорова, Бүлүүттэн Сергей Игнатьевич Павлов, Тааһаҕартан “Күбэйэ» түмсүү далбардара наһаа үчүгэй кыра дэйбиирдэри оҥороннор, Бороҕонтон Мария, Варвара Тимофеевалар, Бүлүүттэн Каролина Харлампьева бэйэлэрэ хомуйбут эмтээх, ыраастанар отторун аҕалан көмөлөһөллөр.
СВО-тан уоппускаҕа кэлэ сылдьар, контрагынан барар уолаттарбытыгар бэйэбит тикпит байыаннай, флис көстүүмнэрбитин, футболкабытын, ардахтан харыстанар понча, толстовка, коврик, аптечка (толору эмтээх), берца, харыстанар сиэккэ, коврик биэрэн, уопсайа 37-42 араас малы-салы тикпит вещмешокпутугар уган, кинилэри сыллаан, алҕаан атаартаатыбыт.
Бу күннэргэ 10-ча уол барда. Бүлүүбүт улууһун эрэллээх, эдэр эрчимнээх ыччаттара эйэлээх олох түстэнэрин туһугар олохторун кэрэйбэккэ, Ийэ дойдуларын көмүскүү сылдьар уолаттарбыт уоппускаҕа кэлэн, төрөөбүт төрүт дойдуларын ыраас салгынынан толору тыынан, күүстэригэр күүс, сэниэлэригэр сэниэ эбинэн, дьонноруттан алгыс ылан, бу күннэргэ төттөрү айаҥҥа туруннулар.
Улууспут түмсүүлэрин ийэлэрэ, иистэнньэҥ уолаттара, нэһилиэктэр олохтоохторо Кыайыыга кынаттыыр санаа күүһэ тиийдин диэн эрэлинэн салайтаран, ис сүрэхтэриттэн, илиилэрин сылааһынан тикпит, оҥорбут харысхаллара уолаттарбытыгар тиийэн күүс-уох эптин, дойдуларын тыынын кынат оҥостон Кыайыы көтөллөөх, бары этэҥҥэ эргиллэн кэллиннэр диэн эрэнэ күүтэбит.
Дойдуларын көмүскүү сылдьар уолаттарбытын көрсө барарга бэлэмнэнии үлэтэ күүскэ барар.
Бу күннэргэ улууспут дэлэгээссийэтэ СВО зонатыгар айанныахтаах, биир дойдулаахтарбыт сакаастаабыт техникаларын, тепловизор, дрон, рация, булат уонна да атын малы-салы атыылаһан илдьиэхтэрэ, биһиги ыыппыт баһыылкаларбытын тиэрдиэхтэрэ. Кулун тутар 12 күнүгэр “Бүлүү улууһа эһигинниин бииргэ!” диэн улуустааҕы көмө оҥорор пуун волонтердара аадырыстаммыт баһыылкалары, барыта 500-тэн тахса киилэ гуманитарнай көмөнү бэлэмнээбиппитин Кыһыл Сыыр бөһүөлэгин баһылыга Юрий Гвызин икки массыынаҕа тиэнэн барда. Хас биирдии баһыылка аайы Дьөккөн, Тааһаҕар, Бөтүҥ нэһилиэктэрин олохтоохторо, биирдиилээн дьоннор биэрбит Саха сиригэр оҥоһуллубут “Чуоккай ас” диэн бородууксуйалара, Дьөккөн нэһилиэгин урбаанньыта Сидор Ионов спонсордаабыт бэйэлэрэ оҥорбут тушенкалара, барыта 9 араас дойдубут астара, сакаастаабыт уолаттарга бэйэбит тикпит таҥастарбыт уонна утары туттуллар мал-сал, ас арааһа угулунна.
Маны сэргэ байыастар дьиэ кэргэттэригэр, ийэлэригэр Дьөккөн нэһилиэгин олохтоохторо “Барыта Кыайыы туһугар“ диэн акцияҕа кыттыһан балык ыһаарылаан туттарбыттарын 8 дьиэ кэргэҥҥэ, кулун тутар 17 күнүгэр Бүлүүттэн урбаанньыт Николай Большаков биир куул кус аҕалан биэрбитин 13 СВО-ҕа сылдьар уолаттарбыт ийэлэригэр, кэргэттэригэр үөрдэ-көтүтэ дьиэлэригэр илдьэн күндүлээтибит. Бөтүҥ нэһилиэгин аҕам саастаахтарын, бэтэрээннэрин ааттарыттан-26500, Тааһаҕартан — 24000, Чочуттан Анисия Николаевна Николаева-10000, Елена Дмитриевна Протопопова 3000 суумалаах харчыны ыыппыттарынан Саха сиригэр оҥоһуллубут “Чуоккай ас” бородууксуйалара атыылаһыллан уолаттарга ыытылынна.
“Бүлүү улууһа эһигинниин бииргэ!” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун кулун тутар 24 күнүттэн “БАРЫ БИИРГЭ-БАРЫТА КЫАЙЫЫ ТУҺУГАР” диэн акцияны саҕалыыр.
Убаастабыллаах улууспут олохтоохторо, атын даҕаны сиргэ олорор биир дойдулаахтарбыт, СВО-ҕа сылдьар уолаттарбытыгар малынан-салынан көмөнү “Бүлүү улууһа эһигинниин бииргэ!” диэн улуустааҕы көмө оҥорор пууҥҥа үлэ күннэригэр сарсыарда 10-тан киэһэ 6 чааска диэри аҕалан туттарыаххытын сөп: спальнай мешок, кыра тиэрмэс, ырааҕы тыктарар фонарик, телефон иитэр пауер банк, кыра кыптыый, чараас х/б наскы, ис таҥас, маайка, футболка, тапочка, суунар мочалка, хараҥа өҥнөөх кыра соттор, кусачки для ногтей (книпсеры) улаханы, сигарета, зажигалка. Ас өттүттэн: «Чуоккай ас» бородууксуйатын, кофе, «Чан рамен» сырный.
Бүлүү улууһун дьоно-сэргэтэ бары биир сомоҕо буолан, уолаттарбыт Кыайыы кынаттаах дойдуларыгар этэҥҥэ эргиллэн кэлэллэрин туһугар күүспүтүн ууран, туох кыалларынан барытынан көмөлөһүөххэйиҥ.
Биһиги аадырыспыт: Бүлүү куората, Чапаев уулуссатын 20 б нүөмэрдээх балаҕан дьиэтэ, “Вилюйский улус вместе с вами!” диэн бааннердаах улуустааҕы көмө оҥорор пуун.
Маннык хас биирдии түмсүү, тэрилтэлэр, урбаанньыттар, куорат, нэһилиэк олохтоохторо кыттан иһэллэрэ буоллар, уолаттарбыт өссө күүстээх харысхаллаах буолуо этилэр.
Билигин сайыҥҥы байыаннай көстүүмнэри, кууркалары, тактическай ырбаахылары, маайкалары, футболкалары тигэ сылдьабыт. Ону сэргэ тепловизор нөҥүө көстүбэт харысхаллаах плащтары, суорҕаннары тигэн көрөөрү сылдьабыт. Снайпердарга анаан бэйэлэрэ сакаастыыр таҥастарын тигиэхпит. Онон улуус иистэнньэҥнэрин көмө оҥорор пууҥҥа кэлэн эбэтэр матырыйаалы дьиэҕитигэр ылан тигэн көмөлөһөргүтүгэр ыҥырабыт.
2022 сылтан мэлдьи күүс-көмө, өйөбүл буолар Бүлүү улууһун уопсастыбаннай түмсүүлэригэр, “Сыа Бүлүү” СХППК кэллэктиибигэр, дириэктэр Алексей Алексеевич Кондратьевка, “Светофор” маҕаһыын дириэктэригэр Игорь Иванович Максимовка, биһиэхэ куруутун күүс-көмө буолар, массыынанан илдьэр, аҕалар Гордей Иннокентьевич Томскайга, “Фарм+” аптека дириэктэригэр Саргылана Федоровна Егороваҕа, “Наша аптека” дириэктэригэр Протопопова Зоя Васильевнаҕа, урбаанньыттарга Валерий Валерьевич Сивцевкэ, иистэнньэҥ Валентина Николаевна Григорьеваҕа, “Барыта Кыайыы туһугар” диэн акцияҕа кыттан көмөлөспүт Дьөккөнтөн “Ыллыкчаан”, Староватовтан “Кэнчээри”, Тааһаҕар нэһилиэгиттэн “Мичээр”, Бөтүҥ нэһилиэгиттэн“Мичил”, Бүлүү куоратыттан “Куобахчаан”, “Биһикчээн”, “Алмазик”, “Бүлүүчээнэ”, “Сардана” уһуйааннар кэллэктииптэригэр, Г.С.Донской аатынан иккис нүөмэрдээх орто уонна начальнай оскуола, Н.С.Степанов аатынан оскуола, Г.И.Чиряев аатынан оскуола, М.Н.Жирков аатынан Бүлүүтээҕи ускуустуба оскуолатын, Н.А.Кондаков аатынан гимназия кэллэктиибигэр, В.Г.Румянцев аатынан спортивнай оскуола иитиллээччилэригэр уонна төрөппүттэригэр, Г.Ф.Николаев аатынан оскуола, “Арчы” сынньалаҥ киинин, Мастаахтааҕы ускуустуба оскуолатын филиалын, Балаҕаччы А.А.Миронов аатынан оскуола кэллэктииптэригэр, Хаҕын нэһилиэгин олохтоохторугар, орто оскуолатын кэллэктиибигэр, Дьөккөн, Арыылаах, Тааһаҕар, Баппаҕаайы, Өкүндү, Халбаакы, Кыргыдай, Үгүлээт, 1 Күүлэт, Чернышевскай, Бөтүҥ нэһилиэктэрин олохтоохторугар, ЖКХ, Сбербанк, Энергосбыт, оҕо поликлиникатын кэллэктииптэригэр, иистэнньэҥ уолаттарбытыгар Иван Владимирович Прокопьевка, Семен Семенович Афанасьевка, спонсордарбытыгар Сидор Ионович Ионовка, Павлов Сергей Игнатьевичка, Сардана Алексеевна Павловаҕа, Наталья Семеновна Егороваҕа, Елена Дмитриевна Протопоповаҕа, Анисия Николаевна Николаеваҕа, Николай Вадимович Большаковка, улууспут күүс-көмө буолбут бары олохтоохторугар көмөҕүт, өйөбүлгүт иһин, үтүө санааҕыт хаһан да уҕараабатыгар, чэгиэн доруобуйаны, дьиэ кэргэттэргитигэр этэҥҥэ буолууну баҕаран туран, “Бүлүү улууһа эһигинниин бииргэ!” диэн анал байыаннай дьайыы кытыылаахтарыгар уонна кинилэр дьиэ кэргэттэригэр улуустааҕы көмө оҥорор пуун волонтердарын уонна тус бэйэм ааппыттан улахан махталбытын тириэрдэбит.
Мария Томская, Бүлүү куоратын бочуоттаах олохтооҕо,Бүлүү улууһун уопсастыбаннай түмсүүлэрин уонна СВО-ҕа көмө оҥорор пуун салайааччыта.