«Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр көмө оҥорор пууҥҥа күн аайы үлэ күөстүү оргуйар.
Бүлүү куоратын дьаһалтатын исписэлиистэрэ көмө оҥорор пуунтан плащевай матырыйаал ылан, 2 миэтэрэ уһуннаах, 65 сантиметр кэтиттээх сиргэ сытар 20 устуука ковриктары тиктилэр. 
Туттарыллар эрэһиинэлэригэр “Вилюйский улус вместе с вами” диэн суруйан аҕалбыттарын бу күннэргэ пуун үрүҥ көмүс волонтердара иһигэр фольгированнай пенофолу Елена Сивцева кээмэйигэр сөп гына кырыйан биэрбитин, ковриктар ячейкаларыгар угаттаан бэлэмнээбиттэрин, Валентина Захарова барытын тигэн бүтэрдэ. Уопсайа 45 коврик тигилиннэ, СВО-ҕа барар уолаттарбытыгар утары биэртэлээн ыыталыыбыт.
Бүлүү улууһун уопсастыбаннай түмсүүлэрин 2024 сылы түмүктүүр тэрээһиммитигэр улууспут баһылыга Сергей Николаевич Винокуров «Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр көмө оҥорор пууҥҥа икки профессиональнай массыынаны уонна электрическэй таҥас быһар массыыҥкалары ыларбытыгар сертификат туттарбыта. “Победа” фондаттан “Швейный парк” маҕаһыыҥҥа счетунан харчы аһардыллан, ол массыыналарбытын Дьокуускайтан таксистар Евгений Жирков, Андрей Харлампьев сыа-сым курдук упаковкалаан, тиэйэн аҕалан биэрбиттэрэ. Бу эдэр уолаттар бу сыллар тухары биир-биэс харчыта суох СВО-ҕа ыытар баһыылкаларбытын барытын бэйэлэрэ тиэйэн, Дьокуускайга илдьэн опорнай пууҥҥа туттаран, фураҕа тиэйсэн ыыталлар уонна Дьокуускайтан атыыласпыт рулонунан тигэр таҥастарбытын, сеткаларбытын, фурнитураларбытын, аспытын куруук тиэйэн аҕалан, массыынаттан барытын сүөкээн, көмө оҥорор пууҥҥа киллэрэн биэрэллэр.
Тылгыны нэһилиэгин кэнсиэригэр көмө оҥорор пуун иистэнньэҥэ Иван Владимирович СВО-ҕа бэйэтэ тикпит таҥастарын быыстапкалаата уонна сыанаҕа оҕолорго кэтэрдэн таһааран кэнсиэри көрөөччүлэри сөхтөрдө, дойдутун Тылгыны кэнсиэрин өссө киэргэттэ диэтэхпинэ сыыспатым буолуо. Иваны массыыналарбытын туруортаан, установкалаан баран тахсаар диэн көрдөһөн хааллараммыт, иистэнньэҥ уолбутун Семену кытары түргэн баҕайытык остуолларын таҥа охсон, массыыналары туруортаан, установкалаан, футболкалары быһан, оверлоктуу охсоннор, чааһы кыайбат кэм иһигэр 4 футболка тигилиннэ, уолаттар түргэннэриттэн сөхтүбүт.
Үчүгэйкээн, кып-кыра тыастаах иистэнэр массыыналанаммыт үөрүү-көтүү бөҕө буола сылдьабыт.
Убаастабыллаах түмсүү салайааччылара, СВО-ҕа сылдьар уолаттарбытыгар көмөлөһүөн баҕалаах улууспут иистэнньэҥнэрэ, тигэр таҥастарбыт матырыйаалларын бэлэмнээтибит, баһаалыста, кэлэн ыларгытыгар көрдөһөбүт. Тигиллэр таҥастар элбэхтэр (көстүүм хас да арааһа, футболка, пончо, балаклава).
Түгэнинэн туһанан, улууспут баһылыгар Сергей Николаевич Винокуровка, Бүлүү куоратын дьаһалтатын исписэлииһигэр Диана Новгородоваҕа, төһө да ыалдьа сырыттар, өрөбүл күнү аахсыбакка, видеолары ылаллара аҕыйах чаас хаалла, көмөлөс диэн көрдөһүүбүн ылынан, Саха сирин дьахталларын хамсааһыннарын 100 сылыгар аналлаах өрөспүүбүлүкэтээҕи “Женщины Якутии-надежный тыл страны” диэн видеонан куонкуруска кыттарбытыгар 5 видеоны 4 чаас иһигэр оҥоро охсон биэрэн, кыайыылаах аатын ылбыппытыгар, коврик тигэн аҕалбыт исписэлиистэргэ Дария Никитична Томскаяҕа, Наталья Валентиновна Ивановаҕа, Елена Васильевна Еремееваҕа, “Сыа Бүлүү” коллективыгар, дириэктэр Алексей Алексеевич Кондратьевка, иистэнньэҥ уолаттарбытыгар Иван Владимирович Прокопьевка, Семен Семенович Афанасьевка, икки снайпер уолаттарбыт сакаастаабыт маскировочнай таҥастарын спонсордаабыт Иван Иванович Ивановка, Константин Константиновичка, таксист уолаттарбытыгар Евгений Жирковка, Андрей Харлампьевка, “Бүлүү улууһа эһигинниин бииргэ” диэн СВО-ҕа улуустааҕы көмө оҥорор пуун волонтердарын уонна тус бэйэм ааппыттан улахан махталбытын тириэрдэбит. Амарах санаалаах күндү дьоннорбутугар тус олоххутугар байылыат олоҕу, саха алмааһыныы кытаанах доруобуйаны, дьолу баҕарабыт.
Мария Томская, Бүлүү куоратын бочуоттаах олохтооҕо, Бүлүү улууһун уопсастыбаннай түмсүүлэрин уонна СВО-ҕа көмө оҥорор пуун салайааччыта.