«Бэрэсидьиэни кытта бииргэ» диэн баннерга Бүлүү улууһун норуотун маастара, Саха сирин тимир уустарын холбоһугун кыттыылааҕа, Бүлүү улууһун тимир уустарын түмсүүтүн салайааччы, Саха сиригэр киэҥник биллэр тимир ууһа, быһах, хомус оҥорор айылҕаттан айдарыылаах Егор Федоров тахсыбытын Бүлүү дьоно сэргээтилэр.
Кини охсор быһахтара кэлиҥҥи сылларга дьон сэҥээриитин ылан, Саха сирин араас муннуктарыттан булчуттар, балыксыттар кэлэн атыылаһан бараллар. Былырыыҥҥы Олоҥхо ыһыаҕар быһах оҥорооччуларга бастаабыта да элбэҕи этэр.
Ааспыт сайын Ил Дархан Айсен Николаев Бүлүүгэ кэлэ сылдьан Егор Федоров мастарыскыайыгар анаан-минээн тиийэн тимир ууһун кытта көрсөн сэһэргэспитэ, быһах охсуутугар кыттыбыта. Былырыын Айсен Николаев биллэр тимир ууһугар истипиэндийэ туттарбытын бэлиэтиэхэ сөп.
Биһиги Егор Федоровтан аҕыйах ыйытыкка хоруйдууругар көрдөстүбүт.
— Егор Петрович, тимиринэн уһанарга хаһааҥҥыттан ылсыбыккыный?
— 2017 сылтан быһах оҥоруутунан дьарыктанан барбытым. Бүлүүгэ биллэр тимир ууһа Михаил Мальцев быһах хайдах оҥоһулларын көрдөрбүтэ. Үксүн Хаҥалас ууһугар Александр Даниловка сылдьыбытым, Реворий Чомчоевка-Чөмчөө ууска эмиэ үөрэммитим.
— Эн СВО кыттыылаахтарыгар быһах оҥороргун Ил Дархан кэлэ сырыттаҕына истибитим.
— Иллэрээ сылтан СВО кыттыылаахтарыгар быһах оҥоруутунан дьарыктанабыт. Кинилэргэ үксүн биһиги оҥорбут быһахтарбытын туттараллар.
— Үчүгэй тимири сакаастаан ылаҕыт?
— Кытаанах мааркалаах тимири сакаастыыбыт, онтон кытардан охсобут, хатарабыт.
— Итиччэ элбэх быһаҕы бэйэҥ оҥороҕун дуо?
— Хамаандабытыгар үспүт: Семен Томскай, Степан Осипов бааллар. Үлэбит кээмэйэ элбэх, сарсыардаттан түүҥҥэ диэри тохтообокко үлэлиибит. Ол иһин кэлин дьонтон сакаас да ыла сатаабаппын. Нэдиэлэ аайы оҥорбут быһахтарбытын Дьокуускайга ыытабыт.
— Баннерга тахсыбыккынан Арассыыйа Бэрэсидьиэнигэр сыһыаныҥ?
— Дойду Бэрэсидьиэнэ Владимир Путин ураты киһи, Арассыыйа дьиҥнээх лидерэ буолар. Кэлиҥҥи сылларга Арассыыйаҕа, Саха сиригэр, Бүлүү улууһугар элбэх үчүгэй уларыйыы тахсыбытын бары билэ-көрө сылдьабыт. Кини салалтатынан элбэх үлэ ыытыллар, дойдутун сайдыытыгар дьиҥнээхтик кыһаллар дии саныыбын.
Николай Куприянов.