2024 сыл Саха сиригэр Оҕо саас сылынан биллэриллибитэ.
Оҕо — биһиги сарсыҥҥыга эрэлбит, кэскили түстээччибит, удьуору утумнааччыбыт, олохпут кэрэ сибэккилэрэ буолаллар. Оҕолорбут доруобай, үөрэхтээх, инникигэ эрэллээх буолалларын туһугар хас биирдии ийэ, аҕа, уопсастыба, норуот барыта кыһаллар буоллаҕына-бу олус үчүгэй.
И.Н.Ханды аатынан Тылгыны орто оскуолатыгар туйгун, үчүгэй үөрэхтээх, бастыҥ спортсмен, бастыҥ чинчийээччи, талааннаах ырыаһыт, үҥкүүһүт, тарбаҕар талааннаах иистэнньэҥ, араатар оҕолор элбэхтэр. Оскуолаҕа оҕону сайыннарар араас куруһуоктар, тэрээһиннэр тиһигин быспакка сыл устата ыытыллаллар. Учууталлар сыралаах үлэлэрин түмүгүнэн, үөрэнээччилэр олимпиадаларга ситиһиилээхтик кытталлар.
Бүгүн «Олох суола»хаһыат ааҕааччыларыгар анаан, оскуола үчүгэй үөрэнээччитин, ситиһиитин туһунан сырдатыам.
Григорьева Маша, 8-с кылаас үөрэнээччитэ. Маша кыра кылаастан олимпиадаларга ситиһиилээхтик кыттар. Ордук дьаныһан туран, нуучча тылын олимпиадатыгар кыттааччы. Быйылгы үөрэх дьылыгар улуустааҕы омук тылын (английскай) уонна обществознание олимпиадаларыгар ситиһиилээхтик кыттан, 2-с миэстэлэри ылаттаабыта. Омук тылын уруогар алын кылаастан сөбүлээн үөрэнэр, бэйэтэ эбии дьарыктанар. Маны таһынан, улуустааҕы «Инникигэ хардыы»эдэр чинчийээччилэр билим кэнпириэнсийэлэригэр бочуоттаах 3-с миэстэни бииргэ үөрэнэр доҕоро Герасимова Каролиналыын ылбыттара. Чинчийбит тиэмэлэрэ: «Тылгыны нэһилиэгин үһүйээннэрэ, номохторо» диэн.
Маша маны таһынан кинигэ ааҕарын олус сөбүлүүр. Улуу нуучча омук суруйааччыларын кинигэлэрин, айымньыларын ааҕарын ордорор. Иллэҥ кэмигэр М.Н.Жирков аатынан Бүлүүтээҕи оҕо ойуулуур-дьүһүннүүр уонна ускуустуба оскуолатын Тылгынытааҕы филиалыгар дьарыктанар, гитараҕа оонньуурун сөбүлүүр. Машаҕа үөрэҕэр үрдүк ситиһиилэри, саҥаттан саҥа дабайыылары баҕарабын.
Үүммүт оҕо саас сылынан бука бары оотой-тоотой оҕолорбутун эҕэрдэлиибин. Эһиги баар буолаҥҥыт биһиги толору дьоллоохпут, эһиги үөрүүгүтүн, ситиһиигитин тэҥҥэ үллэстэ сылдьарбытыттан олус үөрэбит. Оҕолорбут өрүүтүн биһигини үөрдэ турдуннар.
Виталина Григорьева,Тылгыны.