Быйыл өрөспүүбүлүкэ үрдүнэн биллиилээх судаарыстыбаннай уонна бэлитиичэскэй диэйэтэл, Бүлүүбүт чулуу уола Степан Аржаков төрөөбүтэ 125 сылыгар аналлаах тэрээһиннэр сыл устата ыытылла туралларыттан олус үөрэбит уонна киэн туттабыт.
Тылгыны оскуолатыгар эмиэ киниэхэ аналлаах тэрээһиннэр ыытылыннылар. Ол курдук «Бүлүү чулуу уола-Степан Аржаков» кинигэ быыстапката, «Степан Аржаков мэтириэтэ» уруһуй күрэҕэ уонна төрөөбүт күнүгэр үөрүүлээх тэрээһин үрдүк таһымҥа ааста.
Оскуола кэлэктиибэ, библиотеката бары кыттыһан тэрийбит, чулуу киһибитигэр анаммыт үөрүүлээх чаас Саха Өрөспүүбүлүкэтин Гиимниттэн саҕаланна. Тэрээһиҥҥэ оскуола үрдүкү кылааһын уолаттара Былатыан Ойуунускай «Көҥүл ырыата» диэн хоһоонун аахтылар. Учуутал Дмитрий Филиппов саха норуодунай бэйээтэ Михаил Тимофеев «С.М.Аржакову умнубаппыт» диэн хоһоонун үөрэнээччилэргэ, учууталларга ааҕан иһитиннэрдэ.
Оскуолабыт бэтэрээнэ, устуоруйа учуутала, үтүөлээх учууталбыт, билигин бочуоттаах сынньалаҥҥа олорор Васильева Анна Николаевна ыҥырыылаах ытык-мааны ыалдьыт буолан, оҕолорго, учууталларга олус үчүгэйдик Степан Аржаков туһунан дириҥ ис хоһоонноохтук кэпсээн үөрүүлээх тэрээһиммитин үрдүк таһымнаата. Анна Николаевна бэсиэдэтин кэнниттэн оҕолорго биктэриинэ ыытта. Кыайыылааҕынан 6 кылаас үөрэнээччитэ Алексеева Ира тахсан, Анна Николаевнаттан бэлэх тутта.
Оскуола дириэктэрин эбээһинэһин толорооччу И.И. Доранов Степан Аржаков төрөөбүтэ 125 сылынан эҕэрдэлээн тыл эттэ уонна Анна Николаевнаҕа кэлэктиип аатыттан махтанан туран, сэмэй бэлэх туттарда.
Дьэ, бу курдук, төһө да дьыл-хонук ааспытын иһин саха чулуу уола Степан Аржаков аата умнуллубат. Үйэттэн үйэҕэ, көлүөнэттэн көлүөнэҕэ бэриллэн, устуоруйа чахчыта буолан аата ааттана туруоҕа диэн туран Тылгыны оскуолатыгар ыытыллыбыт Степан Аржаковка аналлаах тэрээһиннэр түмүктэннилэр .
Виталина Григорьева.
